متلازمة اليد الغريبة ناقشها فيلم تامر حسني (مش أنا) واللي كتب قصة وسيناريو وحوار الفيلم بنفسه، بيتناول مرض اسمه متلازمة اليد الغريبة اللي بيعجز الشخص عن التحكم في إيده وبتتحرك بشكل منفصل عنّه وممكن تتصرف بطريقة تورطه في مشاكل مع المحيطين زي اللي واجهه تامر حسني ضمن أحداث الفيلم، واتسجلت أول حالة إصابة بالمرض ده سنة 1909.
تعريف متلازمة اليد الغريبة
- اضطراب نادر بيحصل في حركة الأطراف اللاإرادية مع الإحساس بعدم القدرة على السيطرة على حركة الأطراف
- الموضوع مش مرتبط بمنطقة واحدة في المخ ولكن تغيرات كتيرة في أكتر من منطقة
- بينتج عن التغيرات دي نشاط مختلف للروابط العصبية وبالتالي بيفقد الشخص التحكم في أحد أطرافه
- الموضوع ممكن يصيب أطراف القدمين أو الذراعين لكن في أغلب الأحيان بيصيب اليد الأضعف
الأسباب
- ظهور آفات بينتج عنها اضطرابات في القشرة الحزامية الأمامية في المخ والقشرة المخية الحركية
- الإصابة بسكتات دماغية أو الإصابة بعدوى في الدماغ
- أشعة المخ عند المصابين بتأكد وجود أنشطة معزولة عن باقي المخ وتحديدًا عند منطقة القشرة الجدارية الخلفية
- التعرض لصدمات قوية في الحياة زي وفاة المقرّبين أو الإحساس بالعجز
- تمدد بعض الأوعية الدموية أو انتشار السرطان في الجسم
- مواجهة مرض التصلب اللوحي وهو مرض بيشجع جهاز المناعة على تدمير الغشاء المحيط بالأعصاب
- مرض التنكس العصبي وهو فقدان تدريجي لوظائف الخلايا العصبية في المخ وتلفها
- ممكن تحصل نتيجة مضاعفات جراحات المخ خصوصًا اللي بتعالج الصرع
الأعراض
- الإحساس بوجود طرف إضافي متركب في الجسم ودخيل عليه
- بتقوم الإيد بأفعال معاكسة للإيد التانية في نفس اللحظة وبتبقى تصرفات الإيد نفسها موجهة لهدف معيّن ومش بتتحرك بعشوائية
- زي ارتداء أو نزع الملابس والتقاط الأشياء أو الاعتداء بالضرب على شخص معيّن
- على عكس المتوقع فالإيد المصابة أعصابها قوية ومش ضعيفة ولكنها بتتحرك عكس إرادة المخ
- في أغلب الأوقات بيبقى الهدف اللي الإيد بتتحرك عشان تنفذه عكس أهداف الشخص ونيته المسبقة وبتدمر إنتاجه
- السبب الرئيسي للإصابة في أحيان كتير بتحصل بعد فشل خطة مهمة بالنسبة للشخص المريض
العلاج
- مفيش علاج نهائي للمرض ده لكن بعض الأطباء بيحاولوا مع المريض تخفيف حدة الأعراض
- بعض أدوية التحكم في العضلات بتساعد على تخفيف حدتها لكن مش لمدة طويلة
- الدراسات بتقول إن أحيانًا مع علاج بعض حالات الجلطات في المخ ممكن يخف تأثير المتلازمة على المريض
- أغلب الأطباء بيشتغلوا مع المريض على العلاج المعرفي السلوكي ومحاولة التعايش مع المرض وتخطي الأزمات في حياته
