أدوية
أضرار جرعات الأدوية والمكملات الغذائية الزائدة عن الطبيعي
إزاي تعرف أعراض الجرعات الزائدة من الأدوية؟
المحتويات
الأدوية هي أساس الشفاء من الأمراض ولكن بجرعات محددة حسب الحالة الطبيعة وبعد إشراف طبيب متخصص يقدر يحدد النوع المناسب للمريض، عن طريق اختيار دواء مادته الفعالة ممكن تساعد في تحسين حالته، وفي نفس الوقت بيراعي التاريخ المرضي للمريض عشان يتجنب أي آثار جانبية خصوصًا لو المريض بيعاني من آثار جانبية نتيجة رد فعل تحسسي من مكونات الدواء، وتناول المكملات الغذائية بكميات كبيرة بدون استشارة طبيب متخصص ممكن يزوّد فرص ظهور أعراض خطيرة.
الإصابة بمتلازمة السيروتنيون
- بتزيد فرص تراكم مادة السيروتونيون في الجسم (ناقل عصبي في الجسم بيأثر على الحالة المزاجية وبيسمى هرمون السعادة) مع تناول أدوية الاكتئاب بكميات كبيرة بجانب أدوية علاج المسكنات والصداع النصفي وبعض أدوية الحموضة
تلف أعضاء الجسم
- بتزيد فرص الإصابة بتلف البنكرياس والتهابه الشديد والفشل الكلوي وفشل الكبد خصوصًا مع الاستمرار في تناول جرعات كبيرة من دواء معيّن له تأثير جانبي على الكبد لمدة طويلة
مقاومة البكتيريا لجهاز المناعة
- دراسات كتير بتأكد إن الإفراط في تناول المضادات الحيوية سبب رئيسي في مقاومة البكتيريا للمناعة وعدم القدرة على القضاء على البكتيريا الضارة
- بتقتل المضادات الحيوية البكتيريا المفيدة اللي بتحمي من الالتهابات الفطرية فبتزيد التهابات الفم والحلق
- بتزوّد فرص الإصابة بمضاعفات الفيروسات اللي ممكن تؤدي للوفاة نتيجة عدم استجابة الجسم للعلاج
أضرار الإفراط في أدوية الحموضة
- دراسة أمريكية بتقول إن أدوية الحموضة من أكتر أنواع الأدوية اللي بيستخدمها المرضى بجرعات كبيرة بدون التفكير في تأثيرها الجانبي
- بتتفاعل المادة الفعّالة فيها (كربونات الكالسيوم) مع بعض أحماض المعدة وبينتج عنها شوارد الكالسيوم وبيزيد امتصاص الكالسيوم في الجسم بكميات كبيرة ممكن تأثر على صحة الكلى والقلب
- بيقل امتصاص الجسم لبعض الفيتامينات ومع الوقت بتسبب أنيميا شديدة وفي بعض الحالات ممكن توصل المضاعفات للإصابة بفشل كلوي
- دراسة ألمانية بتقول إن الإفراط فيها بيزود فرص هشاشة العظام وأمراض الخرف
- بتنشط هرمون الجاسترين اللي بيزود إفراز نمو الخلايا السرطانية وبتقل حامضية المعدة وبترتبط بأعراض جانبية زي الإسهال اللي ممكن يسبب جفاف وبتزيد فرص الإصابة بعسر الهضم المزمن
تأثير الإفراط في تناول المكملات الغذائية
- المكملات بتعوض الجسم بالفيتامينات الناقصة فيه بسبب عدم أكل أغذية معينة لكن دراسات كتير بتقول إن استخدامها الغلط ممكن يبقى ليه آثار جانبية على الصحة وإن بعض الشركات المصنعة بتزود جرعة الفيتامين فممكن تضرك
- الإفراط في فيتامين A ممكن يسبب الصداع وألم في العظام وتليف الكبد
- فيتامين الحديد ممكن يسبب قىء وإسهال وحرقان في المعدة
- الفيتامينات اللي بتدوب في الدهون زي (A, D, E, K) استهلاكها الزيادة بيسبب تسمم نتيجة تراكمها في الجسم
- الإفراط في فيتامينات ( B, C) بيسبب اضطرابات في الجهاز الهضمي وشعور بالضعف والكسل وآلام في الراس والبطن
أعراض الإفراط في جرعات الأدوية
- اضطراب ضربات قلب سواء سريعة أو بطيئة
- ضيق التنفس والنهجان الشديد
- الرغبة الشديدة في النوم وعدم القدرة على السيطرة على النفس
- ارتعاش الجسم وتكرار النوبات التشنّجية
- مشاكل المعدة زي الغثيان والقيء والإسهال والتهاب المعدة الشديد
- تفاقم أعراض الربو وفشل القلب
- تضارب في درجة حرارة الجسم بين الارتفاع الشديد في بعض الحالات أو الانخفاض الشديد في حالات تانية واللي بينتج عنّه التعرّق الشديد أو الارتعاش غير المبرر
علاج الإفراط في تناول الأدوية
- استشارة طبيب متخصص وقت ظهور الأعراض ضرورة قصوى لأن ممكن الجرعة الزائدة تهدد حياتك
- طرق كتير بيتّبعها الأطباء لعلاج المرضى وتقليل خطر الجرعة الزائدة من الأدوية زي:
- تناول أقراص الفحم (بعد طحنها) لامتصاص الدواء من الجهاز الهضمي بسرعة
- تطهير مجرى الهواء وإدخال أنبوب لمجرى التنفس لحل مشاكل التنفس بشكل مؤقت حتى استقرار الحالة الصحية
- حقن السوائل عن طريق الوريد لطرد السموم من الجسم
- اتّباع طرق مختلفة لتحريض المريض على التقيؤ (لكن ضروري يحصل بمتابعة طبيب متخصص)
