المحتويات
نوستالجيا أو الحنين للماضي هو مصطلح ظهر في القرن الـ 17 وفضلت لفترة طويلة بتعامل على إنها اضطراب نفسي لحد القرن الـ 19، وبيشمل المصطلح الذكريات السعيدة اللي بتخفف صعوبة الحياة وبتحسسك بمتعة لحظية بتوزارن إحساسك بالضغوط عليك، وبالتالي مهم تعرف أصل الإحساس ده وتأثيره عليك بجانب بداية ظهور مصطلح النوستالجيا.
أصل ظهور مصطلح النوستالجيا
- سنة 1688 لاحظ الطبيب السويسري يوهانس هوفر على الجنود المرتزقة السويسريين اللي بيشتغلوا لصالح الجيوش الفرنسية والإيطالية أعراض القلق والاكتئاب مع رفض الأكل والنوم
- تطورت الأعراض مع الوقت وأصيب بعضهم بالحمى وبآلام في المعدة وضربات غير منتظمة في القلب
- ساءت حالتهم النفسية وقلت معنوياتهم وتملكتهم رغبة في العودة لبلدهم
- (يوهانس) راقب الجنود واكتشف إن ظهور الأعراض دي كان مرتبطة بسماعهم لموسيقى وأغاني من بلادهم
- وفسر الاضطرابات دي بإنها متصلة بالحنين الشديد للوطن وسماها نوستالجيا
- وهي كلمة يونانية بتترجم حرفيا لـ (ألم العودة إلى الوطن) وبتنقسم لجزئين:
- نوستوس (nóstos) يعني العودة للوطن وألجوس (álgos) يعني الألم
تفسير مصطلح النوستالجيا
- فضلت النوستالجيا لفترة طويلة لحد القرن الـ19 بتتعامل على إنها اضطراب نفسي سببه الحنين للوطن
- مع الوقت اتغيرت الفكرة وبقى يشمل المصطلح الحنين للذكريات السعيدة اللي بتخفف صعوبة الحياة وبتهون التجارب المؤلمة
- الحنين مختلف عن التذكر لأنك لما بتقرر تفتكر حاجة بيبقى عندك هدف وبتفتكر بكامل إرادتك
- سواء عشان تحكي حاجة لحد أو تسترجع معلومة وقت الامتحان
- أما الحنين فهو استجابة مدفوعة بحواس زي السمع والشم والنظر، وفي أغلب الوقت بتترجم لمشاعر بتحسسك بالراحة والسعادة
- بتعيد تجسيد أدق التفاصيل اللي عشتها قبل كده بس في خيالك، وبيتكرر حدوثها في الأوقات اللي بتحس فيها باليأس وبتمر بلحظات مؤلمة
عملية الشعور بالحنين داخل المخ
- الإنسان لما بيحب بيحصل لجسمه تغييرات كيميائية عصبية
- بيخلي الأدرينالين يعلى والهرمونات تفرز زي التستوستيرون والإستروجين والدوبامين
- لما بيغيب الطرف التاني وإفراز الهرمونات بيقل فبيحس بخلل
- الحنين حسب دراسات كتير بيقوي التحمل على تغيرات الحياة
- دراسة بتقول إن الحنين بيتولد في القشرة الأمامية للمخ وبيحسسنا بمشاعر زمان وإن افتقاد حد بيفعل خلايا عصبية في المخ
- دراسة لجامعة توهوكو بتقول إن الحنين بيحفز أجزاء المخ المرتبطة بالسعادة والمكافأة
- وإن الاحساس بيزيد كل ما الشخص كان قريب والعلاقة طويلة
- دراسة في جامعة ساوثهامبتون بتقول إن الحنين حالة دفاعية ضد الوحدة والملل وبتأكد إن اللي بيحسوا بيه متسامحين مع اللي حواليهم
تأثير النوستالجيا على الإنسان
- بتتسبب النوستالجيا في تحقيق نوع من السعادة والتعويض
- بتستخدم كعلاج لمشاكل واضطرابات الذاكرة بمساعدة الموسيقى اللي بتحسس المرضى بالحنين وبتحفز مراكز المكافأة والعاطفة في المخ
- وبترتبط بالأجزاء المسؤولة عن تخزين الذكريات والتاريخ الشخصي
- دراسة في جامعة ساوثهامبتون بتقول إن النوستالجيا بتقلل توتر وقلق الحياة اليومية
- وبتشتت الشخص عن إحساس الوحدة لأنها بتخلق رابط بين الشخص وبين علاقاته القديمة
- بتحفز الشخص على السلوكيات الصحية والرغبة في العودة لنمط حياة صحي كان مستمر عليه في الماضي
- مثلًا لما بتفتكر ذكريات طفولتك في تمرين السباحة لو اتفرجت على مشاهد سباحة في التلفزيون ممكن تعيش نفس الإحساس
- بعض الأشخاص ممكن تزيد عندهم الشجاعة والرغبة في العودة للسباحة مرة تانية بعد فترة توقف طويلة
- دراسة تانية لمجلة أبحاث المستهلك بتقول إن تأثير النوستالجيا علينا بيمتد لقراراتنا في الشراء
- الاستغراق فيها بيقلل إحساسنا بالفلوس وبيخلينا نشتري أكتر منتجات بتفكّرنا بطفولتنا أو باللحظات السعيدة
- الموضوع بيبقى غير إرادي مدفعوع بالرغبة في تقوية قيمة الارتباط الاجتماعي
- بتولد استجابة شعورية عند الجمهور وبتزود فرص الشراء لو إعلانات المنتج مرتبطة بذكريات من الماضي بتخص شريحة عريضة من الجمهور المستهدف
أضرار الاستغراق في النوستالجيا
- بتخلق صورة مثالية وهمية عن الماضي وبتخلي المخ يختار تفاصيل قديمة تساعده يهرب من الواقع
- وبتخلي الشخص عايش على الماضي وطول الوقت في مقارنة وتفضيل للزمن اللي فات على النهاردة
- وبتمنعك من التكيف مع الواقع وممكن توصل لمرحلة الرفض الكامل له والميل للانعزال والوحدة والخوف من الاختلاط مع الآخرين
