القلق أثناء النوم والاستيقاظ من الأمور المزعجة اللي بتأثر على يومنا وبتسبب قلة التركيز والنعاس والصداع، خاصة مع الأشخاص اللي بيواجهوا صعوبة في العودة والاستغراق في النوم مرة تانية، وعشان تتخلص من الحالة المزعجة دي لازم تعرف الأسباب الصحية والنفسية.
أسباب القلق أثناء النوم
- متلازمة انقطاع التنفس خلال النوم، مشكلة صحية بيشعر المصاب خلالها بانقطاع التنفس وبيستيقظ، وعادة بتكون نتيجة الإصابة بمشكلات في الجهاز التنفسي وانسداد المجاري الهوائية
- الضغط النفسي والتوتر من الأسباب القوية اللي بتسبب حالة القلق والاستيقاظ أثناء النوم، نتيجة للتفكير الزائد
- وجود أي صوت أو تحركات في الفراش، للأشخاص اللي نومهم خفيف، في حالة سماع أي صوت بسيط خلال النوم زي صوت موسيقى، أو ضوضاء لعربية عابرة أسفل النافذة، أو حتى حركة الشريك، بتأدي لاستيقاظ منتصف النوم
- الحاجة المتكررة للتبول أثناء النوم، بسبب مشكلة صحية زي مشاكل البروستاتا، أو عدوى المساك البولية أو سلس البول أو مرض السكري أو تناول بعض الأدوية
- كمان زيادة تناول المياه قبل النوم، أو المشروبات المضرة للبول زي الكافيين في الشاي والقهوة والمشروبات الغازية
- المعاناة من ألم في الجسم نتيجة النوم في وضعية خاطئة أو مشكلة صحية، بيسبب للإنسان عدم راحة وبتأدي للاستيقاظ من النوم
- الكوابيس المزعجة خاصة لو متكررة، ممكن تأدي لفوبيا النوم واضطراب القلق
- درجة حرارة الجسم سواء حار بيأدي للتعرق وعدم الراحة أثناء النوم، أو الشعور بالبرودة في الشتاء
نصائح للعودة للنوم بعد الاستيقاظ
- تجنب فعل أي شيء زي اللعب في الموبايل وحاول تنام بسرعة من غير ما تخرج من أجواء النوم
- اضغط على بعض الأجزاء في الجسم زي منطقة أسفل الكعب أو عن الرسغ، الحركة دي هتساعد على إراحة الجسم والاسترخاء
- اختار أكتر وضعية نوم بتريحك
- تجنب النظر في الساعة لأن ده هيزود شعورك بالتوتر والقلق في حالة اقتراب معاد استيقاظك
- لو كان السبب هو الشعور بألم.. حاول تعالجه عن طريق تناول مسكن أو لو انسداد في الأنف استخدم البخاخ الموسع ومذيب للمخاط
طرق لتحسين جودة النوم
- تجنب الأجهزة الالكترونية قبل النوم بساعة
- اعمل مواعيد للنوم والصحيان عشان جسمك يتعود عليها
- مارس رياضة بانتظام حتى لو كان نص ساعة مشي لكن قبل النوم على الأقل بـ3 ساعات
- اعمل روتين لنفسك قبل النوم (قراءة/ دش دافي/ تمارين تأمل وتنفس لمدة نص ساعة)
- حاول تخلي معاد آخر وجبة قبل النوم بساعتين على الأقل، وكمان تقليل الكربوهيدرات بيعزز النوم العميق
- اسمع موسيقى فيها أصوات البحر/ الموج/ الرمل (Pink Noise) أو خاصة بالتنويم المغناطيسي
- ابعد عن الكافيين بعد الساعة 5 مساءا
- زود الدهون الصحية والألياف في أكلك
- تناول شاي البابونج قبل النوم
- ابعد التلفزيون والفيش الكهربائية عن السرير
