الصداع النصفي: أسبابه وأعراضه وخطوات التخلص منه

الصداع النصفي هو ألم شديد أو إحساس بالنبض غالبا بيصيب نص الرأس، وهو مرض مزمن بيظهر بشكل متكرر ومصحوب بأعراض مختلفة زي الغثيان وحساسية مفرطة للضوء وألم شديد ممكن يتعارض مع الأنشطة اليومية.

أنواع الصداع النصفي

في أنواع مختلفة من الصداع بتختلف في الأسباب والأعراض، والصداع النصفي من أصعب الأنواع ومن الأكتر انتشارا بين الناس

الصداع النصفي بدون هالة

هو النوع الأكتر انتشارا ومعروف باسم (الشقيقة الكلاسيكية)

المريض بيصاب بخمس نوبات نموذجية ويستمر من 4-72 ساعة وتشمل الأعراض:

• تمركز الألم في جانب واحد
• ظهور الألم كأنه نبض
• الألم معتدل حتى حاد
• تفاقم الألم عند ممارسة مجهود جسماني

الصداع النصفي المصحوب بهالة (أورة)

هو الصداع اللي بيكون ليه نوبتين على الأقل مصحوبة بهالة مميزة للاضطرابات زي:

• خدر أو اضطراب في الكلام وبيختفوا بسرعة
• اضطراب في جهة واحدة أو الجهتين
• اضطراب في مجال الرؤية، بيظهر على شكل ومضات، أو بريق، أو خطوط، أو بقع أو انعدام الرؤية
• الصداع النصفي النموذجي بيتطور خلال الهالة أو في خلال 60 دقيقة من ظهورها

أعراض ما قبل نوبة الصداع 

في المرحلة الأولى من النوبة بتظهر لحوالي تلت المصابين بأعراض مسبقة تستمر من ساعات حتى أيام قبل حصول النوبة، وتشمل الأعراض:

• تغيرات مزاجية
• التعب
• صعوبة التركيز
• الجوع
• تصلب الرقبة

أعراض نوبة الصداع النصفي

بتحصل للمصابين بوتيرة مرة شهريا، وفي مصابين بتعاني منها مرتين أسبوعين، وفي أنواع نوبات بتستمر لأكتر من 3 أيام بدون انقطاع

أعراض الصداع النصفي العامة

• ظهور الألم في جانب من الرأس أو الجانبين مع بعض وبيزيد تدريجيا مع الوقت
• الألم بيكون مصحوب بالغثيان
• حساسية زايدة للمنبهات زي الضوء والرائحة والصوت
• النوبة بتكون مصحوبة بالشعور بالتعب أو العطش أو الرغبة في التبول أو التعرق أو الشحوب أو الجوع أو انعدام الشهية
• ممكن يحصل هبوط في القدرة على التركيز والشعور بالقلق والكآبة والعصبية

أعراض الصداع النصفي مع الأورة

في بعض الحالات الأورة أعراضها بتظهر قبل نوبة الصداع، وفي حالات تانية بتظهر فيها أثناء النوبة أو بعدها وبتاخد أقل من ساعة وبتسبب أعراض زي:

• اضطراب الرؤية والإحساس
• انخفاض قوة الجسم في الجانب الأيمن أو الأيسر
• ضعف القدرة على التركيز أو الكلام
• صعوبة التوازن
• الشعور بالوخز في الدراع أو الساق
• حركة اهتزازية أو حركة تانيو لا إرادية
• ظواهر بصرية أو رؤية أشكال متعددة أو بقع ساطعة أو ومضات من الضوء

أسباب الصداع النصفي

الأسباب الحقيقة ليه غير معروفة ولكن في عوامل بتأثر عليه زي:

• الجينات
• العوامل البيئية

فالتغيرات في الدماغ والتشابكات الخاصة مع الأعصاب ليها دور فيه، لأن اختلال توازن المواد الكيميائية في المخ -بما فيهم السيراتونين اللي بيساعد على تنظيم الإحساس بالألم- بيسبب الصداع النصفي.

المحفزات الخارجية

• التوتر والتعب
• النوم لفترة طويلة
• الصيام وعدم انتظام مواعيد الأكل وتخطي الوجبات
• شرب الكافيين والمشروبات الكحولية
• الدورة الشهرية
• التغييرات في الضغط الجوي
• تغيير المكان
• تناول الفواكه الحمضية والمحليات الصناعية
• منتجات الألبان والقمح والأجبان القديمة والأطعمة المالحة
• المحفزات الحسية زي النور العالي وأشعة الشمس والروائح القوية والتدخين السلبي

عوامل الخطر

• الجنس: النساء أكثر عرضة للإصابة من الرجال
• العمر: تزداد فرصة الإصابة بالمرض في عمر 10 – 40 سنة
• التاريخ العائلي المرضي: وجود تاريخ عائلي مرضي بيزود خطورة الإصابة
• الإصابة ببعض الأمراض زي: الاكتئاب ومرض ثنائي القطب والقلق

مضاعفات الصداع النصفي

من أبرز مضاعفات الصداع النصفي هي:

• السكتة الدماغية
• ارتفاع ضغط الدم
• أمراض القلب المختلفة
• نوبات الصرع
• الاكتئاب
• الولادة المبكرة في حالة الحمل

طرق التخلص من الصداع النصفي

تغيير السلوكيات اليومية هيساعدك تتعامل معاه بطريقة أحسن وتتغلب على أعراضه زي:

• في حالة التعرض لنوبة الصداع.. دور على مكان هادي خالي من الأضواء والصوت العالي واقعد فيه
• حط كمادات سخنة أو باردة على وجهك ورقبتك لأن الحرارة بتقلل حدة الألم
• اشرب مشروبات فيها كافيين لكن بكميات قليلة لأنه بيقلل أعراضه في المراحل الأولى
• نام عدد ساعات منتظمة ومارس تمارين الاسترخاء قبلها عشان تحسن جودة النوم
• قلل المشتتات حواليك أثناء النوم  أو في يومك زي الصوت العالي أو التلفزيون أو الموبايل
• تجنب إجبار نفسك على النوم فلو حسيت باليقظة.. اعمل أي نشاط زي القراءة لحد ما تحس بالنعاس
• راجع الأدوية اللي منتظم عليها عشان تتأكد إنها خالية من المواد المنبهة زي الكافيين
• ثبت مواعيد الأكل يوميا وتجنب تفويت أي وجبات مع الانتظام على الأطعمة الصحية وتجنب الأطعمة المحفزة ليه
• سجل الأطعمة اللي بتتناولها على مدار اليوم بمواعيدها عشان تقدر تحدد لو سبب الإصابة نوع الأكل
• مارس التمارين الرياضية بانتظام لأنها بتسبب إفراز مواد كيميائية تحجب إشارات الألم عن الوصول للدماغ وبتساعد في تخفيف القلق والاكتئاب وهم أسباب أساسية لتفاقم أعراض الصداع النصفي
• دور على الطرق المناسبة للتخلص من التوتر أو التعامل معاه بشكل صحي لأنها سبب أساسي للإصابة بيه زي ممارسة اليوجا أو القراءة المنتظمة أو تمارين الاسترخاء
• اعمل كراسة لكتابة معلومات عن نوبات الصداع زي الأعراض وحدتها ومدة استمرارها والخطوات اللي ساعدتك في التغلب عليه لأن بعض الدراسات أثبتت إن ده هيساعدك على فهم المحفزات أكتر وتوقعها وبالتالي التغلب عليها بطريقة أسهل