المحتويات
منظمة الصحة العالمية بتقول إن تلوث الهواء من المسببات الرئيسية للأمراض الصدرية وأمراض القلب والأوعية الدموية وممكن يؤدي للوفاة المبكرة، بجانب تأثيره على الوزن والصحة الجنسية وبالتالي مهم تعرف طرق الوقاية منه.
أضرار التلوث على الصحة
- ملوثات الهواء بتتكون عادة من غاز ثاني أكسيد الكربون المنبعث من دخان المصانع أو عوادم السيارات
- بتحتوي على جسيمات PM2.5 الضارة على الصحة وبتبقى متناهية الصغر وبيعجز الإنسان عن رؤيتها
- الخبراء بيأكدوا إنها أصغر من حبة الرمل بـ 20 مرة
- الجسيمات تأثيرها بيمتد من الرئتين وبيوصل للأوعية الدموية
- بتدخل الجسيمات عبر الأنف في البداية وبتوصل للمخ عن طريق الأعصاب اللي بتربط بين الأنف والمخ
- بيسبب مشاكل في المخ ممكن توصل لتلف الخلايا
- تأثيره بيوصل أحيانًا للإصابة بمرض الانسداد الرئوي المزمن والإصابة بالربو بجانب أمراض القلب والأوعية الدموية
- التعرض المستمر للملوثات ممكن يأثر على الحوامل ويسبب تشوه الأجنة على المدى البعيد
تأثير التلوث على الصحة الجنسية
- دراسات كتير بتتكلم عن تأثير تلوث الهواء على الصحة الجنسية
- دراسة صينية بتقول إن دخان السيارات بيسبب أمراض القلب والرئة والدماغ وبتأكد إن التأثير بيوصل للصحة الجنسية وبيسبب ضعف انتصاب عند الرجال
- استنشاق الجزيئات السامة في الهواء بيسبب التهاب في الأوعية الدموية وجزيئات معينة في الغازات الملوثة بتمنع تدفع الدم في الرئة بشكل طبيعي
- وبتقل كمية الأكسجين في الدم اللي بيوصل للأعضاء التناسلية فبيضعف الانتصاب
- المركبات الكيميائية بتسبب ضعف في إفراز بعض الهرمونات زي الإستروجين والتستوستيرون
- دراسة تانية بتأكد إنه بيعرض الحيوانات المنوية للتشوه خصوصًا مع استنشاق الملوثات لفترة طويلة وإنه بيأثر على خصوبة السيدات خصوصًا مع التقدم في العمر
العلاقة بين التلوث وزيادة الوزن
- دراسة في جامعة بكين بتقول إن التلوث بيساعد على زيادة الوزن وإنه بيرفع الكوليسترول وبيزود الدهون
- الخبراء في جامعة أكسفورد بيقولوا إن سكان المدن الملوثة بتزيد عندهم نسبة الدهون
- وإن المواد الكيميائية بتعمل اختلال في الغدد الصماء بينتج عنه سمنة
- دراسة تانية لجامعة كاليفورنيا الجنوبية بتقول إن التلوث بيزود وزن الأطفال وإن ثاني أكسيد النيتروجين بيزود نسبة السمنة عند الأطفال
- وبيأثر على الرئتين وبيعمل التهابات في أجهزة الجسم بجانب إن التأثير بيوصل للمخ والغدد النخامية وبيزود إحساس الجوع وبالتالي معدل الأكل
الوقاية من أضرار التلوث
- منظمة الصحة العالمية بتقول إنه أكبر خطر على صحة البيئة في العالم وبتأكد إنه سبب في تدهور صحة ناس كتير نتيجة الأمراض اللي بيسببها
- البس ماسك في الشارع عشان يحميك من الأتربة والملوثات واستحمى بعد يوم طويل في الشارع عشان تحمي جلدك من آثار الملوثات عليه
- ظبط مواعيدك عشان تواجه أقل قدر من الزحام وابعد عن وقت الذروة واهتم بنظام غذائي غني بالألياف وابعد عن الوجبات الجاهزة
- نضف فلاتر التكييف باستمرار عشان تحافظ على نقاء الهواء في بيتك ونضف بيتك باستمرار واهتم بتطهير الأسطح اللي بتتعامل معاها
- اختار الشوارع الجانبية اللي مفيهاش حركة مرورية كثيفة للجري وممارسة الرياضة
- افتكر إن توفيرك للكهرباء في البيت بيقلل الانبعاثات اللي بتسبب التلوث
- ابعد عن التدخين أو أي شخص مدخن حواليك واعرف إن رعايتك للنباتات هتقلل خطر الملوثات وتنقي الهواء
- افتح شبابيك بيتك وقت نقاء الهواء وقلل ده لو ساكن في شارع رئيسي والأحسن تعمل ده في وقت متأخر من الليل
- اغلي مياه وحط عليها قطرات من زيت الأوكالبتوس عشان تقلل خطر المواد الضارة عليك
