المحتويات
التومية من السلطات أو المقبلات في المطبخ السورى، بتتقدم جانب أطباق الفراخ خاصة الشاورما والفراخ المشوية والبطاطس المقلية، بجانب طعم التوم المميز فهو مفيد للجسم، زي إنه بيعقم ويطهر الجهاز الهضمي من البكتيريا والفيروسات، وبنقدم لك طريقة عمل التومية بأكتر من وصفة ومكونات مختلفة.
طريقة عمل التومية بالنشا
المكونات
- 10 فصوص توم كبار
- 5 معالق كبار زيت زيتون
- عصير ليمونة
- 3 معالق كبار نشا
الطريقة
- دوب النشا في مياه باردة وارفعها على نار هادية لحد ما يتماسك ويبقى شبه المهلبية
- اهرس التوم ناعم جدا وضيفه على النشا (بعد ما يبرد)
- ضيف زيت زيتون وعصير الليمون واضرب الخليط بالمضرب الكهربائي
طريقة عمل التومية بالمايونيز
المكونات
- 4-5 فصوص كبار توم
- معلقتين كبار مايونيز
- كوبايتين لبن رايب
- معلقتين كبار عصير ليمون
- نص معلقة صغيرة ملح
الطريقة
- اخلط عصير الليمون والملح والرايب كويس مع بعض
- اهرس التوم كويس وضيفه على خليط الليمون والرايب
- ضيف المايونيز وقلب لحد ما يبقى خليط متجانس
طريقة عمل التومية السورية
المكونات
- 3 كوبايات زيت درة
- كوباية عصير ليمون
- رأس توم مقشر ومفروم
- بياض بيضتين
- معلقة صغيرة ملح
الطريقة
- اخلط الزيت مع عصير الليمون وبياض البيض في الخلاط الكهربائي
- ضيف التوم والملح واخلط لحد ما يبقى عندك قوام ناعم
- احتفظ بالتومية في برطمان نضيف محكم الغلق لمدة 4 ساعات في التلاجة
