طريقة عمل الفشار بنكهات حادقة وحلوة

الفشار من المقرمشات المفضلة وأنت بتتفرج على الأفلام في البيت أو السينما أو كوجبة خفيفة وصحية بين الوجبات، لأنه غني بالألياف اللي بتحسن عملية الهضم وتزود الإحساس بالشبع، وبينظم مستوى السكر والأنسولين في الدم، وكمان بيحتوي على فيتامين ب و E ومضادات الأكسدة.. بنقدملك طريقة عمل الفشار بنكهات مختلفة حلوة وحادقة.

طريقة عمل الفشار بالكراميل

المكونات

• نص  كوباية درة فشار

صوص الكراميل

• معلقة كبيرة زيت
  
• نص  كوباية سكر
  
• ربع معلقة صغيرة ملح
  

الطريقة 

• حط السكر على نار هادية لحد ما يبقى كراميل
•  ضيف الملح للكراميل وقلب.. بعد كده اطفي النار
• قلب درة الفشار في الزيت لحد ما يطقطق
• رش الكراميل على الفشار وقلبه كويس

 طريقة عمل الفشار بالمارشميلو

المكونات 

• نص كوباية درة فشار
• معلقة كبيرة زيت نباتي 

صوص المارشميلو

• نص كوباية مارشميلو
• معلقة كبيرة زبدة
• معلقة صغيرة فانيليا

الطريقة

• قلب درة الفشار في الزيت لحد ما يطقطق
• دوب الزبدة على نار هادية
• ضيف السكر والمارشميلو للزبدة وقلب لحد ما يسيح
• اطفي النار وضيف الفانيليا على المارشميلو
• رش صوص المارشيملو على الفشار وقلبه 

طريقة عمل الفشار بالشوكولاتة

المكونات

• نص كوباية درة فشار
• معلقتين كبار زيت 

صوص الشوكولاتة

• كوباية إلا ربع رقائق شوكولاتة
• ربع  معلقة صغيرة ملح

الطريقة

• قلب درة الفشار في الزيت لحد ما يطقطق
• سيح الشوكولاتة في حمام مائي أو الميكروويف
• ضيف معلقة الملح على الشوكولاتة السايحة
• رش صوص الشوكولاتة على الفشار وقلب كويس

طريقة عمل الفشار بالجبنة

المكونات

• 3 معالق كبيرة زيت نباتي
• 4 معالق كبيرة درة فشار

صوص الجبنة 

• ملعقة كبيرة زبدة سايحة
• ربع كوباية جبنة شيدر مبشورة

الطريقة 

•  قلب درة الفشار في الزيت لحد ما يطقطق
•   سيح الزبدة وضيف عليها الجبنة الشيدر
•   قلب الجبنة لحد ما تسيح 
•   رش صوص الجبنة على الفشار وقلب كويس

طريقة عمل الفشار بصوص الهاني ماسترد

 المكونات

• نص كوباية درة فشار
• معلقة صغيرة بودرة بصل
• معلقتين كبار مسطردة 
• معلقة صغيرة خل 
• معلقتين كبار عسل 
• معلقة كبيرة زيت 
• معلقة صغيرة ملح
   

الطريقة

• في بولة.. اخلط المسطردة مع الخل والعسل 
• سخن الزيت وضيف عليه درة الفشار وقلب وغطي الحلة لحد ما يطقطق
• وزع خليط المسطردة وقلب الفشار  لحد ما يتغلف بالصوص 
• اخلط الملح وبودرة البصل مع بعض ووزعهم على الفشار وقلب مرة تانية

طريقة عمل الفشار بالشطة والليمون

المكونات

• نص كوباية درة فشار
• معلقة كبيرة زيت 
• نص معلقة صغيرة شطة 
• ربع معلقة صغيرة كمون (ممكن تزود حسب الرغبة)
• عصير نص ليمونة 

الطريقة

• سخن الزيت وضيف حبات درة وقلبها لمدة 5 دقايق أو تبدأ تطقطق
• غطي الحلة وسيب الفشار يطقطق على نار هادية 
• اخلط الكمون مع الشطة ورشة ملح وعصير الليمون (حسب الرغبة) 
• ضيف البهارات على الفشار وقلب كويس عشان تغلف كل حبات الفشار