أدوية السكر: أنواعها وطريقة تناولها ومضاعفاتها

أدوية السكر دورها أساسي في علاج مرض السكر اللي  بيحصل بسبب اختلال كمية السكر في الدم (الجلوكوز) اللي بتحول الأكل لطاقة وبتساعد الجسم على القيام بمهامه المختلفة، والمهم تشخّصه وتعالجه بدري عشان تقلل الأضرار، سواء بأدوية مناسبة لحالة المريض تحت إشراف طبيب متخصص أو عن طريق حساب نسبة السكر في الدم باستمرار، والالتزام بنمط حياة صحي، وتقليل النشويات، والسكريات، وممارسة الرياضة بانتظام. 

علاج السكر من النوع الأول

• النوع الأول من السكر بيعتبر من أمراض المناعة الذاتية اللي بتهاجم فيه الخلايا المناعية البنكرياس وتحديدًا الخلايا اللي بتنتج هرمون الأنسولين (خلايا بيتا)
• بتفضل تدمر فيها على مدار شهور أو سنين طويلة
• بتزيد فرص الإصابة في السن من 10 لـ 16 سنة وبيشكل المصابين بالنوع الأول من 5% لـ 10%
• بيتناول المريض حقن أنسولين عشان تزيد كميته في الدم، ويعوض الكمية اللي المفروض ينتجها جسمه بشكل طبيعي
• لازم المريض يتابع نسبة السكر في دمه باستمرار عشان يأخر حدوث المضاعفات ويحمي نفسه منها
• الأحسن تبقى النسب من 80 لـ 130 مجم/ديسيلتر قبل الأكل و180 ملجم/ديسيلتر بعد الأكل
• مهم يحسب سعراته الحرارية ويحافظ على نظام غذائي صحي غني بالألياف والخضروات والفواكه ويقلل السكريات، والنشويات، والدهون
• الخبراء بيأكدوا إن ممارسة الرياضة دورها أساسي في الحفاظ على وزن صحي والوقاية من المضاعفات الخطيرة

أنواع الأنسولين 

الأنسولين سريع المفعول 

• بيبدأ مفعوله بعد 15 دقيقة زي (Apidra و Humalog و NovoRapid)

الأنسولين متوسط المفعول 

• بيشتغل في الجسم بعد ساعة لـ 3 ساعات من تناوله، وبيستمر المفعول لمدة 18 ساعة زي (Humulin N و Novolin N)

الأنسولين طويل المفعول 

• بتستمر فاعليته لمدة 24 ساعة زي (Levemir و Lantus)

الأنسولين قصير المفعول 

• بيتشغل بعد 30 دقيقة من تناوله وبيستمر لمدة 6 ساعات زي (Humulin R, Novolin)

الأنسولين الخليط 

• بعض أدوية الأنسولين بتدمج بعض الأنواع مع بعض زي الطويل والقصير أو المتوسط، وده بيحصل في بعض الحالات اللي بتحتاج كمية أنسولين كبيرة

خطوات حقن الأنسولين تحت الجلد

• بيتحقن الأنسولين تحت الجلد عن طريق إبرة صغيرة جدًا
• لازم تغسل إيدك كويس قبل حقنها
• شيل الغطا البلاستيكي عن حقنة الأنسولين، وامسح الجزء العلوي منها بقطعة قطن مغمورة في الكحول
• اسحب مكبس السرنجة لورا عشان تملاها بالهوا بنفس المقدار
• دخّل السرنجة في الجزء العلوي المطاطي من عبوة الأنسولين، واحقن الهوا في العبوة عن طريق الضغط على مكبس السرنجة للأمام واقلب العبوة عكس وضعها الطبيعي
• اتأكد إن مفيش فقاعات هوا داخل السرنجة قبل سحبها، ولو لقيت خلي العبوة في إتجاه مستقيم وخبّط عليها من فوق بصباعك
• فرّغ محتوى الحقنة تاني في العبوة واسحبها مرة تانية
• عقّم مكان تناول الحقنة بقطعة قطن عليها كحول، ودخّل الإبرة بزاوية 90 درجة وإنت ماسك حتة صغيرة من الجلد

استخدام قلم الأنسولين

• اغسل إيدك بالمياه والصابون كوّيس
• ركّب الإبرة الجديدة في القلم وشيل الغطا بتاعها
• امسك القلم في وضع مستقيم عشان تفرّغ منّه الهوا، وبعدها اضغط على مكبس القلم
• اختار منطقة دهنية في جسمك زي الجزء العلوي من الفخد، والمؤخرة، والبطن، حاول تنوع مكان تناول الحقنة من مرة للتانية
• اتني طبقة جلد بين صباعين عشان تسّهل دخول الإبرة
• ثبّت الحقنة أثناء تناولها، ودخّل المكبس ببطء، عشان تحقن الجرعة واستنى 10 ثواني عشان تتأكد من وصول الأنسولين لكل أجزاء الجسم
• ارمي الإبرة في صندوق مخصص للآلات الحادة وبلاش ترميها في سلة المهملات مباشرة

طريقة الحفاظ على حقن الأنسولين 

•  ابعدها عن حرارة الشمس العالية سواء في البلكونة أو العربية 
•  احتفظ بيها في درجة حرارة الغرفة وبلاش تجمّدها في الفريزر
•  احتفظ بيها في شنطة مخصصة بعيد عن متناول الأطفال 
• الأقلام الإضافية حطها في التلاجة وخليهم في الباب عشان تقلل فرص تجمّدهم 
•  احتفظ بجرعات أنسولين كافية جنب الأقلام الإضافية   
•  اقرأ تاريخ الصلاحية المكتوب على القلم 
•  احتفظ بأكتر من إبرة في نفس الشنطة 
•  يفضل استخدام إبرة جديدة كل مرة.. لكن ممكن تستخدم نفس الإبرة لمرّات محدود مع الحفاظ على نضافتها
• لازم تستشير طبيبك المتخصص عن طريقة تناولها واستخدامها

أدوية السكر من النوع التاني

• العجز عن السيطرة على مستويات السكر في الدم بيتطلب أدوية تعوض نقص الأنسولين أو تزود حساسية الجسم له عشان تقلل تراكم الجلوكوز
• الميتفورمين ومن أنواعه فورتاميت (Fortamet‏)، وجلوميتزا (Glumetza) بيعتبر من الأدوية اللي بتقلل إنتاج الجلوكوز في الكبد اللي بينتجه هرمون (الجلوكاجون)  وبيحسّن حساسية الجسم للأنسولين عشان يحقق أكبر استفادة منّه
• السلفونيل يوريا بينظم إنتاج الأنسولين في الجسم، ومن ضمن أدويته جليناس (Glynase)، والجلوكوترول (Glucotrol)، و اماريل (amaryl)
• من ضمن آثارهم الجانبية انخفاض مستويات السكر لأقل معدل ليها، وزيادة الوزن
• الإيكسيناتيد  (Exenatide) ومن ضمن أدويته بيدوريون (Bydureon)، ليراغلوتايد (Liraglutide)، وفيكتوزا (Victoza)، وساكسيندا (Saxenda)، واللي بتعتبر أغلبها في شكل حقن بتقلل مستويات السكر
•  أدوية سيماغلوتيد (semaglutide) و اوزمبك (Ozempic)، وريبلساس (Rybelsus)
• من الآثار الجانبية سواء لأدوية الإيكسيناتيد  (Exenatide) أو سيماغلوتيد (semaglutide) التهاب البنكرياس، والغثيان، والقيء، والإسهال
• بيُصاب بعض مرضى السكر بنقص فيتامين B-12 وبيحتاجوا يتناولوه في شكل مكمّلات غذائية
• لكن بعض الدراسات ربطت بينه وبين بعض الآثار الجانبية زي الانتفاخ، وآلام البطن، والإسهال، والغثيان
• بعض أدوية مثبطات SGLT2 بتقلل إفراز الجلوكوز في الدم وبتساعد عل خروج الجلوكوز الزيادة عن طريق البول
• من ضمنها أدوية كاناغليفلوزين (Invokana)، وداباغليفلوزين (Farxiga)، وإمباغليفلوزين (Jardiance)
• الدراسات بتقول إنها ممكن تسبب آثار جانبية زي انخفاض ضغط الدم، وتكسير العظام، وبترفع الكوليسترول، وبتزوّد التهابات المسالك البولية، وعدوى الخميرة المهبلية عند السيدات
• بعض الأطباء بيوصفوا بعض أدوية الكوليسترول أو الأسربين لتقليل فرص الجلطات والإصابة بأمراض القلب والأوعية الدموية

آثار أدوية السكر الجانبية 

• بعض الأدوية بتزود فرص الإصابة بانخفاض حاد في السكر اللي من أعراضه:
• الدوخة والصداع
• ضعف الرؤية
• خفقان القلب
• تداخل الكلام وضعف السيطرة على اللسان
• النعاس
• الجوع الشديد
• لو اتعرضت لأي من الأعراض دي تناول حاجة مسكرة خفيفة واستنى 15 دقيقة قبل قياس السكر مرة تانية، لكن لو لسه المقاييس منخفضة لازم تكرر تناول وجبة مسكرة خفيفة، وبعدها كرر قياس السكر مرة تانية
• أعراض تانية ممكن تزيد مع انتظامك على أدوية السكر زي:
• الشعور بالألم وحرقان في المعدة
• الكحة وبحة الصوت
• ضيق التنفس
• انخفاض الشهية
• الشعور بالبرد
• التوتر والارتباك
• اضطراب نبضات القلب
• الاكتئاب
• وجع العضلات