المحتويات
خشونة الركبة هي جزء من الالتهاب المفصلي العظمي اللي بيعتبر من أكتر الأنواع المنتشرة لالتهابات المفاصل، وبيحصل نتيجة تآكل النسيج الغضروفي الموجود عند نهايات العظام مع الوقت، وبيصيب ملايين الأشخاص في العالم.
بيتركز تأثيره على العمود الفقري، واليدين، والفخدين، والركبتين، وبتختلف شدة أعراضه من شخص للتاني، ومع العلاج تقدر تخفف آلامه لكن التلف اللي بيصيب العظام بيفضل موجود.
أسباب خشونة الركبة
- العظام في الجسم بتحتوي على نسيج غضروفي ثابت داخلها بيسمح بحركتها بدون أي احتكاك تقريبًا بين أجزاء العظام وبعضها
- تأثيره أقوى في المفاصل خصوصًا الركبتين، لأنه بيسمح بحركة الركبتين زي الجلوس والوقوف والركوع أو حتى الجلوس عليهم بدون أي ألم
- ضعف النسيج الغضروفي وتآكله بيضعف حركة المفاصل خصوصًا لو حصل عند الركبتين وبيزيد احتكاك العظام في بعضها وبينتج عنّه ظهور أعراض خشونة الركبة
- تقدم السن عامل رئيسي في ظهور أعراض خشونة الركبة وتآكل النسيج الغضروفي، لكن عوامل تانية كتير ممكن تسرّع ظهور أعراضها
- الجينات الوراثية دورها أساسي في ظهور أعراض خشونة الركبة، لأن طفرات جينية كتير بتحصل بسبب عوامل وراثية بتسبب تشوه في شكل العظام المحيطة بمفصل الركبة
- الدراسات بتأكد إن السيدات اللي عمرهم فوق الـ 55 سنة فرص إصابتهم بخشونة الركبة أعلى من الرجال
- المجهود البدني الزايد زي المهن اللي بتتطلب الوقوف أو المشي أو الجلوس قرفصاء لمدة طويلة
- ممارسة الرياضات الشاقة زي الجري لمسافات طويلة أو رفع الأثقال بتزود فرص الإصابة بيها
- زيادة الوزن بتزوّد الحمل على الركبتين والوقوف لساعات طويلة مع قلة المجهود البدني بيضعف النسيج الغضروفي
- بتقل قدرة العظام على تحمّل الوزن الزايد وبتسرّع فرص ظهور خشونة الركبة
- كثرة الإصابات والكسور والإصابة بالتهاب المفاصل الروماتويدي بيزوّد التأثير الضار على الغضاريف وبالتالي ظهور هشاشة العظام حتى لو في سن مبكر
- عوامل تانية بتزوّد التأثير زي اضطرابات فرط الحديد وزيادة كمية هرمون النمو في الجسم
أعراض خشونة الركبة
- آلام شديدة في الركبة مع الحركة ولو بسيطة وبتقل مع الجلوس والراحة أو حتى عند لمسها
- شعور بسخونة في الركبة
- قلة مرونة الركبة والقدرة على تحريكها خصوصًا وقت تنيها سواء للجلوس على كرسي ارتفاعه منخفض زي كرسي السيارة أو طلوع ونزول السلم
- صوت طقطقة مستمر مع المشي أو القيام بأي نشاط بسيط
- تيبس الركبة وقت الاستيقاظ أو مع قلة الحركة خلال اليوم
- ظهور نتوءات عظمية بتظهر في شكل كتل صلبة حوالين الركبة
- تورّم الركبة وزيادة حجمها عن الطبيعي بسبب التهاب الأنسجة الرخوة
- كتل ناعمة مليانة بالسوايل خلف الركبة
المضاعفات
- بتتفاقم الخشونة مع الوقت وممكن توصل لآلام مزمنة تصعّب على الشخص أداء أبسط المهام اليومية
- قلة الحركة وبالتالي قلة ممارسة الرياضة اللي بتزود فرص الإصابة بأمراض القلب والسكر والضغط وارتفاع الكوليسترول في الدم
- ارتخاء أنسجة الغضروف وضعفه وتآكله تمامًا مع الوقت
- نزيف داخل الركبة
- تمزق الأربطة حوالين المفصل
- اضطرابات النوم بسبب قلة الحركة والآلام الشديدة خلال الليل
- زيادة كمية الكتل الناعمة المليانة بالسوايل خلف الركبة اللي بتسبب ضغط على الأوعية الدموية وبتزوّد فرص تورّم القدم
- في بعض الحالات النادرة ممكن تبقى سبب رئيسي للإصابة بالانزلاق الغضروفي في الضهر
التشخيص
مفيش طريقة معينة تتأكد منها إذا كان عندك خشونة الركبة ولا لأ إلا بعد زيارة طبيب متخصص يفحص حالتك، لكن لازم تزوره في أسرع وقت لو عندك جزء من الأعراض وتعمل أشعة مقطعية (CT scan) على الركبة عشان تعرف التأثير وحجم الضرر عليها.
العلاج
- تقليل الوزن بيساعد على خفض الحمل على مفاصل الركبة وبيقلل الأعراض قدر المستطاع
- ممارسة الرياضة بانتظام حسب القدرة على التحمل وتحت إشراف متخصص بتقلل تأثيرها مع الوقت خصوصًا رياضات زي السباحة، والمشي بخطوات منتظمة لمدة محددة، وركوب الدراجات
- العلاج الطبيعي دوره أساسي في علاج مفصل الركبة سواء عن طريق التدليك اليدوي اللي بيقلل فرص ضمور العضلات بسبب قلة استخدامها
- الكمادات الباردة بتخفف الالتهاب والألم والكمادات السخنة لتخفيف تيبس المفاصل
- بعض الأطباء بيستخدموا أجهزة كهربائية بتخفف الألم عن طريق توصيل أقطاب كهربائية بالجلد
- بعض الأجهزة تعويضية بتمرن المصاب على تحميل جزء من الجسم عليها لتخفيف العبء على الركبة
- مشروبات زي الشاي الأخضر والجنزبيل والكركم بتخفف آلام الركبة لأن فيهم مضادات أكسدة بكميات كبيرة
- الأطعمة زي البروكلي والأسماك خصوصًا السالمون، والتوم، ومنتجات الألبان قليلة الدسم، والمكسرات، والزيوت الطبيعية زي زيت الزيتون والأفوكادو، بتقوّي العظام وبتساعد على نموها وبتقاوم تآكل الغضروف، وبتخفف الآلام الشديدة
- الالتزام بتعليمات طبيبك الخاص وتناول الأدوية في مواعيدها خطوة أساسية للعلاج
الوقاية من خشونة الركبة
- العب رياضة باستمرار بس حدد مدة الجري ورفع الأثقال لأيام محددة وأوقات معينة في الأسبوع
- كثّف مجهودك في رياضات زي المشي والسباحة وركوب الدراجات
- التزم بنظام غذائي صحي قدر المستطاع وتجنّب المقليات والسكريات
- زوّد الألياف في أكلك عشان تحافظ على وزن مناسب وتقلل أي ضرر على الركبة
- بلاش تقعد أو تقف لمدة طويلة مستمرة بدون تغيير في الروتين ولو لدقيقتين عشان تحافظ على التوزان في وضع جسمك قدر المستطاع
- اظبط أي كرسي على الوضع المريح بالنسبة لك سواء كرسي مكتب أو كرسي العربية
- بلاش تتحمل أي وضع غير مريح لمدة طويلة
- قلل طلوع ونزول السلم باستمرار لأكتر من مرة في اليوم إلا للضرورة خصوصًا لو بتعاني من آلام فيها
- اخرج يوميًا في الشمس (بعد الشروق بساعتين) للحصول على أكبر استفادة من فيتامين (د) الأساسي للحفاظ على صحة العظام
