المحتويات
فوائد الكاكاو متنوعة زي تنظيم حركة الأمعاء، وعمل القلب والأوعية الدموية، كمان بيساعد في السيطرة على مستويات السكر في الدم، بسبب احتوائه على الألياف الغذائية، بجانب مجموعة من العناصر الغذائية المهمة.
القيمة الغذائية للكاكاو
كل ربع كوباية بتحتوي على
- 49 سعرة حرارية
- 3 جرام دهون
- 7 جرام ألياف
- 12 جرام نشويات
- 4 جرام بروتين
فوائد الكاكاو
- بيحتوي على مجموعة كبيرة من الفيتامينات والمعادن والمواد المضادة للأكسدة زي مادة الفلافانول المضادة للأكسدة، ولها فوايد صحية زي تقليل الالتهاب وتحسين تدفق الدم وتقليل ضغط الدم وتقليل السكر في الدم
- كمان بتساعد مادة الفلافانول في منع التصاق الصفائح الدموية بجدران الأوعية الدموية، وبالتالي بتقلل خطر الإصابة بالجلطات والأزمات القلبية والسكتات الدماغية
- بيحافظ على صحة الشرايين لأنه بيقلل نسبة الكوليسترول الضار في الدم، وبيساعد على رفع نسبة الكوليسترول المفيد
- بيساعد الكاكاو الخام على انتظام وتحسين حركة الأمعاء، وتجنب الإمساك والانتفاخ وعسر الهضم بسبب احتوائه على الألياف
- له دور كبير في تحسين أداء المخ لأنه بيحتوي على الفلافونويد، واللي بتساعد على زيادة نسبة تدفق الدم في المخ، وتعزيز التركيز والذاكرة
- بيعزز عملية التمثيل الغذائي وحرق الدهون، كمان بيحتوي على مادة الكافيين والثيوبرومين، ولهم دور في تقليل الشهية
- مفيد لمرضى السكري لأن وجود مادة الفلافانول بيعمل على زيادة حساسية الجسم للأنسولين، وتقليل الالتهاب وامتصاص السكر الموجود بالدم للعضلات وتقليل امتصاص السكر من المعدة
- له خصائص مضادة للأكسدة وبيحمي الأعصاب من التلف والالتهاب
- بيحارب الخرف لأنه بيحتوي على مادة الكاتيكين، واللي لها تأثير في تحفيز نمو الذاكرة طويلة المدى
- الدراسات قالت إنه بيساعد في تحسين المزاج وتقليل التوتر، لأن بيحفز تصنيع هرمون السيروتونين من خلال زيادة مادة التربتوفان
فوائد الكاكاو للبشرة والشعر
- مادة الفلافانول بتحمي الجلد من التأثير الضار للأشعة فوق البنفسجية وتقلل ظهور التجاعيد والبقع الداكنة
- غني بالمغنيسوم اللي بيساعد في تجدد ونمو الخلايا، وكمان له تأثير مضاد للالتهاب وبيساعد على إصلاح بعض الأضرار في الخلايا خااصة في بصيلات الشعر
أضرار الكاكاو
- بيحتوي على مادة الكافيين وتناوله أثناء فترة الحمل بيزود فرصة الإجهاض والولادة المبكرة
- كمان الإفراط في تناول الكافيين بيزود التوتر عند مرضى اضطراب القلق وبيزود نبضات القلب لمرضى أمراض القلب والأوعية الدموية
- بيبطأ عملية تجلط بالدم
- تناوله محلى سواء في شكل شوكولاتة أو كيك أو هوت شوكولت بيعلي نسبة السكر في الدم
- الإفراط في تناوله بيأدي للإصابة بالإسهال خاصة لمرضى متلازمة القولون العصبي
- بيأثر على قدرة المريء في منع الأكل من الصعود للممر الهوائي
- بسبب نسبة الكافيين.. بيأدي للإصابة بارتفاع ضغط العين
- يعتبر محفز قوي للصداع الشقيقة
- بيزود إدرار البول وده بيأدي لتخلص الجسم من الكالسيوم بشكل بيأثر على صحة العظام ويزود خطر الإصابة بهشاشة العظام
- بيحتوي على مادة الثيوبرومين المدرة للبول، وتناوله قبل النوم ممكن يسبب اضطرابات أثناء النوم بسبب كثرة الذهاب للحمام
وصفات مختلفة بالكاكاو
ترافل كوكيز الشوكولاتة
المكونات
- معلقتين كبار كاكاو خام غير محلى
- كوبايتين رقائق شوكولاتة
- نص كوباية شوكولاتة خام مبشورة
- نص كوباية دقيق
- تلت كوباية زبدة
- 3 بيضات
- معلقتين صغيرين فانيليا
- ربع كوباية بيكنج بودر
- ربع معلقة صغيرة ملح
الطريقة
- سيح كمية من رقائق الشوكولاتة مع الشوكولاتة الخام في الميكروويف أو حمام مائي
- ضيف الزبدة وقلب لحد ما تتجانس وسيبها تبرد لمدة 10 دقايق
- اخفق السكر مع البيض والفانيليا
- اخلط الدقيق مع الكاكاو والبيكنج باودر والملح، وضيفه مع الكاكاو للشوكولاتة السايحة وخليط البيض والسكر وقلب كويس
- ضيف باقي رقائق الشوكولاتة وقلب لحد ما تبقى عجينة متماسكة
- شكل العجنية لكرات بنفس الحجم ووزعها على صينية عليها ورق زبدة
- دخل الكوكيز الفرن لمدة 15 دقيقة
كرات الشوكولاتة بالشوفان
المكونات
- معلقتين كبار كاكاو غير محلى
- كوباية شوفان
- ربع كوباية عسل
- رشة ملح
الطريقة
- اخلط المكونات في بولة عميقة وقلب كويس لحد ما يبقى عجينة
- شكل العجينة لكرات براحة إيدك
- دخلها التلاجة لمدة ساعة على الأقل
الفادج الساخن
المكونات
- 6 معالق كبار كاكاو غير محلى
- كوباية دقيق
- تلت أربع كوباية سكر
- معلقتين صغيرين بيكنج بودر
- ربع معلقة صغيرة ملح
- معلقة صغيرة فانيليا
- معلقتين زيت
- نص كوباية لبن حليب
- كوباية سكر بني
- 4 كوبايات مياه سخنة
الطريقة
- امزج الدقيق مع السكر ومعلقتين كبار كاكاو وبيكنج باودر والملح
- اخفق اللبن مع الزيت والفانيليا وضيفه لخليط الدقيق والكاكاو
- وزع الخليط في صينية مدهونة كمية قليلة من الزيت والدقيق
- اخلط السكر البني مع باقي الكاكاو ووزع على سطح الصينية
- دخل الصينية الفرن لمدة 40 دقيقة
- قدم الفادج ساخن مع بولة آيس كريم
