المحتويات
طريقة عمل البيكاتا بالفراخ من أسهل وألذ وصفات المطبخ الإيطالي، وكمان ممكن تحضرها بأكتر من طريقة بإضافات مختلفة، وممكن كمان تعملها باللحمة، وتقدمها مع بطاطس محمرة أو مكرونة إسباجتي أو قلم، وهنقولك طرق مختلفة لتحضيرها بخطوات سهلة
طريقة عمل البيكاتا بالفراخ التقليدية
المكونات
- كيلو صدور دجاج بانيه
- كوباية دقيق
- 5 معالق كبار زبدة
- 3 فصوص توم مفروم
- كوباية شوربة دجاج (ممكن تبدلها بكوباية مياه + مكعب مرقة فراخ)
- 5 معالق كبار زيت
- نص كوباية عصير ليمون
- 3 معالق كبار بقدونس مفروم
- ربع كوباية جبنة بارميزان مبشورة (اختياري)
- ملح وفلفل أسود
الطريقة
- تبل الفراخ بالملح والفلفل الأسود، وضيف لهم معلقتين كبار دقيق وقلب لحد ما تغطيها كلها
- في طاسة كبيرة أو صينية.. سيح معلقتين زبدة مع زيت الزيتون واقلي الفراخ لحد ما يبقى لونها دهبي
- في نفس الطاسة أو الصينية بعد ما ترفع الفراخ.. حط التوم وشوحه لحد ما ريحته تظهر
- ضيف الشوربة وعصير الليمون وقلب كويس عشان تتخلط بقايا الفراخ الموجودة في الطاسة، وبعد كده ضيف معلقة دقيق وقلب لحد ما تتجانس من غير أي تكتلات
- بعد ما الخليط يبدأ يغلي، ضيف باقي كمية الزبدة وسيب الخليط على نار متوسطة لحد ما قوامه يبقى سميك
- ضيف صدور الفراخ وسيبها على النار 5 دقايق
- وزع البقدونس المفروم والجبنة البارميزان على البيكاتا وقدمها مع بطاطس محمرة أو مكرونة إسباجتي
طريقة عمل البيكاتا بالفراخ والمشروم
المكونات
- كيلو صدور فراخ مخلية
- معلقتين كبار زيت
- كوباية مشروم مقطع شرايح رفيعة
- معلقتين كبار زبدة
- فصين توم مفرومين
- بصلة صغيرة مبشورة
- معلقتين كبار دقيق
- كوباية شوربة دجاج (ممكن تبدلها بكوباية مياه + مكعب مرقة فراخ)
- معلقتين كبار عصير ليمون
- كوباية لبن
- 3 معالق كبار بقدونس مفروم
- ملح وفلفل أسو
- نص معلقة صغيرة بهارات فراخ
- رشة جوزة الطيب
الطريقة
- تبل الفراخ بالملح والفلفل الأسود، وضيف معلقة دقيق وقلب عشان تتأكد إنه غطي الفراخ كويس
- سيح معلقة زبدة مع معلقة زيت واقلي الفراخ على الجانبين لحد ما يبقى لونها دهبي
- ارفع الفراخ وفي نفس الطاسة.. ضيف معلقة الزيت وشوح التوم والبصلة لحد ما يدبلوا
- ضيف المشروم وقلب لحد ما المشروم يستوي، ضيف باقي الدقيق والشوربة واللبن وقلب كويس لحد ما تتجانس المكونات من غير أي تكتلات
- سيب الخليط على النار لحد ما قوامه يتقل، وضيف عصير الليمون وبهارات الفراخ وجوزة الطيب وملح وفلفل أسود لو احتاجت
- ضيف الفراخ وسيبها على النار لمدة 5 دقايق، ووزع عليها البقدونس
بيكاتا الفراخ والليمون
المكونات
- نص كيلو فراخ بانيه
- 3 معالق كبار زبدة
- نص كوباية بقدونس مفروم
- ربع كوباية عصير ليمون
- تلت كوباية خل
- نص كوباية شوربة
- ليمونة مقطعة شرايح رفيعة
- كوباية ونص دقيق
- معلقتين كبار زيت
- ملح وفلفل أسود
الطريقة
- اخلط الدقيق مع الملح والفلفل الأسود وتبل الفراخ بالخليط لحد ما تتأكد إنه غطاها كويس
- سخن الزيت على درجة حرارة متوسطة.. واقلي الفراخ لحد ما يبقى لونها دهبي
- في نفس الطاسة.. ضيف الخل وقلبه لحد ما يغلي، وضيف عصير الليمون والشوربة (ممكن تضيف ربع كوباية كريمة طهي وشرايح الليمون)
- سيب الخليط يغلي وقوامه يتكاثف وضيف الزبدة وقلب لحد ما تسيح وضيف الفراخ
- سيب الخليط 5 دقايق على النار هادية
- وزع البقدونس على سطح البيكاتا
