المحتويات
اسباب الغثيان مختلفة لأنه مش بيعبر عن حالة صحية واحدة ولكنه جرس إنذار للتعبير عن حالات مرضية كتير أو حتى تغيرات في الجسم، وإهمال معرفة أسبابه ممكن يسبب مضاعفات خطيرة على صحة الإنسان.
تعريف الغثيان
- هو تعبير جسدي عن الحاجة إلى التقيؤ والمتركز في الحنجرة أو في أعلى البطن أما القيء هو الحدث الجسدي المحدد للتفريغ السريع والقوي لمحتوى المعدة
- بيحتاج المريض فحص صورة الدم CBC بشكل أساسي لفهم سبب الغثيان الرئيسي
- بجانب أشعة البطن والجهاز الهضمي وبيحتاج الموضوع أحيانًا لاستخدام المنظار الداخلي لفهم طبيعة الحالة
اسباب الغثيان
الحساسية من الأكل
- زي المكسرات والبيض والشوكولاتة
- الجهاز المناعي ممكن يتعامل معاهم إنهم أكلات ضارة للجسم
- ده بيسبب إنتاج كمية كبيرة من الهيستامين ومواد كيميائية تانية في الجسم
- وبتبدأ تظهر أعراض الحساسية زي تورم الفم أو الحلق أو تهيج الجلد أو القشعريرة المسببة للألم أو الأعراض دي كلها مع بعض
- بجانب صعوبة التنفس وألم البطن والإسهال والقيء
التسمم
- أعراضه هي الغثيان و القيء و الإسهال أو حرارة بسيطة أو تشنجات وبتظهر بعد كام ساعة من الأكل
فيروس المعدة
- أعراضه الغثيان والقيء والإسهال وبتزيد فرص الإصابة به لو قربت من شخص مصاب بيه أو عن طريق تناول أكل/ شرب مياه فيها الفيروس
الحمل
- التغيرات الهرمونية بتحفز الشعور بالغثيان عند السيدات وبيزيد الإحساس به في أي وقت من اليوم أو بعد الوجبات وأحيانًا بيرتبط برائحة معينة زي معطر معين أو روائح الأكل
- بجانب أعراض تاني زي تورم وترقق الثدي والشعور بالتعب وانقطاع الدورة الشهري
الحموضة
- من ضمن أعراض الارتجاع المريئي اللي بيحصل لما حمض المعدة بيرجع بشكل متكرر للمريء ويسبب تهيجه
- بيصاحبه أعراض الغثيان وحرقان الصدر والكحة والشعور بثقل على الصدر وارتجاع سائل حمضي في الفم
التوتر والقلق الزايد
- من أعراضه: الغثيان وفقدان الشهية وآلام العضلات والشعور بالتعب معظم الوقت والعزوف الجنسي ومشاكل النوم بجانب الشعور بالحزن وعدم الارتياح
أمراض المرارة
- بتأثر على أداء المرارة وبتقلل قدرتها على هضم الدهون وبيزيد الشعور بالإعياء خاصة بعد الأكلات الدسمة
- يصاحبه الشعور بالغثيان والقيء وزيادة الألم في الجزء العلوي في الناحية اليمين من البطن
متلازمة القولون العصبي
- بيزيد مع الإصابة بالقولون العصبي أعراض الغثيان وألم المعدة والإسهال أو الإمساك
دوار الحركة
- بيزيد عند ركوب العربية أو وسيلة مواصلات لمدة طويلة خصوصًا وقت السفر
- الغثيان بيزيد لو أكلت قبلها أو أثناء الركوب أو ركزت في الموبايل أو القراءة أو لقلة التهوية
- دوار الحركة هو رد فعل من الجسم تجاه الأحاسيس المتضاربة اللي بتبقى في شكل إشارات عصبية
- لما بتقعد في سيارة أو مركب أو حتى طيارة بترسل الأذن الوسطى إشارات للمخ مختلفة عن العين
- الجلوس في وضع مستقر بيرسل إشارات عصبية بتوحي بالاستقرار أما العين بتشوف حركة وتغير في الأماكن واختلاف كبير بينها وده بيوحي بالانتقال
- تضارب الإشارات العصبية مع بعضها سواء اللي بيشيروا للاستقرار والثبات أو الحركة بيعمل خلل وبيحس الشخص باضطراب سواء من خلال الإحساس بالغثيان أو الصداع
- بينصح الخبراء ببعض الخطوات لمحاولة تقليل الإحساس بدوار السفر
- ثبت نظرك لقدام في أفق الطريق لتقليل التحفيز البصري اللي بيسبب دوار السفر
- خلي نظرك في اتجاه الحركة اللي جسمك حاسس بيها وبلاش تبص عكس الاتجاه
- اقعد جنب الشباك لأن تضارب الإشارات العصبية بيقلل إحساسك بالحركة
- ابعد عن الوجبات التقيلة الغنية بالسعرات في السفر
- القراءة هتزوده بسبب تخيلك للأحداث خصوصًا لو رواية بتحفز إشارات عصبية متضاربة مع النظر لتغير الأماكن لكن لو مع مجموعة اشتركوا في نشاط سواء غناء أو لعبة جماعية عشان تقلله
أداء التمارين الرياضية
- بعد ممارسة الرياضة بتبذل عضلة القلب مجهود إضافي عشان تضمن تدفق الدم ليها
- بتحتاج العضلات النشطة كميات أكسجين أكبر بيحمله الهيموجلوبين في الدم
- بيحوّل الجسم وقتها الدم بعيد عن المناطق غير النشطة في جسمك
- بيرسل الجهاز العصبي إشارات للأعضاء دي في الجسم لتضييق الأوعية الدموية فيها
- ومن ضمن الأعضاء دي الجهاز الهضمي والأمعاء وبيزيد الضرر وقت ممارسة الرياضة بعد الأكل
- بينشغل الجسم بعد الأكل في هضم الطعام خصوصًا لو كان بيحتوي على نشويات ودهون
- بيزيد إحساس الغثيان كل ما زادت كمية الأكل وقل الوقت بينه وبين التمرين الشاق
- خليك حريص على ممارسة الرياضة باعتدال خصوصًا في البداية
- جرّب أشكال وأنواع مختلفة من التمرينات عشان تعرف المناسب ليك وتخفف الضرر
- تمرينات الإحماء هتساعدك تحمي نفسك من التغيير المفاجيء في عملية الهضم
- اشرب سوايل بانتظام قبل التمرين وبعده لكن باعتدال ومش مباشرة قبل أو بعد الانتهاء منه
- تجنب أي مشروب مثلج وبلاش تاكل قبل التمرين بساعتين على الأقل ولو جعان تبقى حاجة خفيفة قليلة السعرات قبل التمرين بنص ساعة
- ابعد عن المشروب الغازية خصوصًا قبل وبعد التمرين بساعة وبلاش تقفل عينك عشان تقلل فرص إصابتك بدوار الحركة
- اتنفس ببطء ولكن باستمرار وقت رفع الأثقال وقلل الانحناء في تمارينك واستبدلها بالقرفصاء قدر المستطاع
- خد فترات راحة أول ما تحس بالتعب الشديد واستشير طبيب متخصص لو بيتكرر كتير
تناول الفيتامينات
- بلاش تاخد الفيتامين على معدة فاضية وضروري تاكل وجبة خفيفة قبلها
- ضروري تستشير طبيبك المتخصص قبل تناول أي فيتامينات لأنها أحيانًا ممكن بتسبب مشاكل هضمية
- ممكن تأجل الفيتامينات للعشا أو الغدا وبلاش تبدأ بيها يومك عشان تقلل فرص آلام البطن والغثيان
- بعض الأنواع منها أو الإفراط في تناولها ممكن تزوّد فرص القرح الهضمية أو متلازمة القولون العصبي أو التهابات المعدة وغيرها من الأعراض المزعجة
- الخبراء بيأكدوا إن أقراص فيتامين C هي أكتر الفيتامينات اللي ممكن تسبب غثيان لأنها غنية بالأحماض
- أغلب اللي بيعانوا من معدة حساسة بيحسوا بالغثيان بعد تناول فيتامين C
- مكملات الحديد أحيانًا بتزوّد فرص الغثيان خصوصًا مع تناولها بجرعات عالية أو تناول أكلات غنية بالحديد في نفس اليوم
- اقرأ الجرعة المناسبة ليك حسب المكتوب على العبوة أو حسب حالتك الصحية وقلل مصادر الحديد التانية في يومك
- اقرأ مكونات أي فيتامين تاني بتاخده لو فيه تركيز عالي من الحديد وامتنع عن تناوله في نفس اليوم إلا بعد استشارة الطبيب
- بلاش تاخد فيتامينات قبل الرياضة مباشرة لأنها بتدفق في المعدة مباشرة والأحسن تأجلها بعد الرياضة بساعة
- اعتمد على المصادر الطبيعية للفيتامينات في الأكل خصوصًا الخضروات والفواكه واعتمد على المكملات في صورة أقراص قابلة للمضغ أو حبوب فوّارة لو فيه فرصة
مضاعفات الإصابة بالغثيان
- الجفاف الشديد اللي بيأثر على صحة الجسم والتبول على فترات متقطعة وميل لون البول للأصفر بجانب جفاف الفم والعينين
- فقدان الليونة الطبيعية للجلد
- انخفاض نسبة الأملاح والمعادن في الجسم بنسبة كبيرة وتهديد لصحة الأطفال وكبار السن وبالتالي ضرورة معرفة اسباب الغثيان وعلاجها فورًا
علاج الغثيان
- اقعد وافرد ضهرك وتجنب فرد جسمك لأنه بيزود العصارة المعدية اللي بتسبب عدم الارتياح والحموضة
- تجنب الضغط على معدتك وحاول تتمشى على قد ما تقدر واقعد جنب شباك أو قدام مروحة خاصة لو حاسس بحرارة زيادة
- حط قربة مياه باردة على رقبتك من ورا عشان تقلل الإحساس
- اضغط على معصم إيدك من جوه في حركات دائرية لمدة 5 دقايق لأنها هتقلل الأعراض
- اتنفس بالراحة من الأنف واكتمه لمدة 3 ثواني وبعدين خرجه بالراحة من الفم.. كرره لحد ما ترتاح
- اشغل نفسك بأي نشاط زي قراءة كتاب أو سماع الموسيقى أو أي نشاط حركي لو مش هيتعبك
- اشرب سوايل باردة خاصة المياه لأن الغثيان من أعراض الجفاف وبالتالي بتقدر تخفف اسباب الغثيان لفترة بسيطة
- مشروب الكاموميل هيساعدك تسترخي ويقلل القلق والأحسن تنقعه لمدة 5 دقايق وبعدين صفيه
- اعصر ليمون على مياه باردة لأنه هيحسن الهضم
- الدراسات أثبتت إن أكل قطعة صغيرة من الجنزبيل الطازة أو كمشروب بيقلل الغثيان
- تجنب المشروبات الغازية أو مشروبات الطاقة اللي فيها كميات من السكر المضاف لأنها هتزود الإحساس
- تجنب المقليات ومنتجات الألبان واللحوم والأكلات عالية الألياف حتى اختفاء الأعراض
