نصائح للتغلب على ارهاق الصباح وبداية يوم نشيط

ارهاق الصباح من المشاكل اللي ممكن تواجهك في حالات قلة النوم أو الانشغال الشديد، وبتلجأ للكافيين لتقليل أعراضها ولكنه ممكن يسبب القلق ورعشة الجسم.

في طرق تانية أفضل وأكتر صحية ممكن تلجأ ليها لإمداد جسمك بالطاقة اللي محتاجها الصبح

تجنب الضغط على زرار الـ(Snooze)

• الدراسات أثبتت إنه بيسبب الشعور بالتعب وقلة القدرة على التركيز وإنجاز المهام لأنه بيصحيك بشكل متكرر في مدة قصيرة وبيعطل اكتمال دورة النوم الكاملة اللي مدتها 90 دقيقة
• الخبراء نصحوا بإنك لو من الأشخاص اللي بيحتاجوا يعملوا أكتر من منبه.. اعمل واحد 90 دقيقة قبل معاد الصحيان والتاني وقت الصحيان لتجنب انقطاع دورة النوم

اشرب كوب مياه لتجنب الارهاق

• الإرهاق عرض من أعراض جفاف الجسم حتى لو كان خفيف، وبيسبب أعراض عدم القدرة على النوم وضعف المهارات الإدراكية والتقلبات المزاجية
• كوب المياه هيساعد جسمك على الانتعاش قبل الحركة

تمارين اليوجا للجسم

• تمارين التمدد مهمة جدا الصبح لأن عضلات الجسم بتكون ساكنة ومسترخية تماما أثناء النوم، وتحريكهم تدريجيا من خلال اليوجا بيساعد على إفراز هرمون الإندورفين اللي بيمد الجسم بالطاقة
• التجارب أثبتت إن 25 دقيقة من التمارين كافيين ليقظة العقل وتنشيط عضلات الجسم

رش الوجه بالمياه لتقليل الارهاق

• الدراسات أثبتت إن الدش البارد بيقلل نسب الغياب من العمل بسبب المرض، ورش الوجه بمياه باردة بينبه الجسم بتغير درجة الحرارة
• ممكن تحط مياه باردة في بخاخة وخليها جنب السرير عشان ترش وجهك أول حاجة الصبح
• في خبراء نصحوا بوضع زيت عطري أساسي مناسب للاستخدام على الوجه مع المياه لتنشيط الحواس

الفطار لإمداد الجسم بالطاقة

• الدراسات أثبتت إن تفويت وجبة الفطار بتسبب انخفاض الطاقة على مدار اليوم والقدرة على الانتباه لفترات طويلة
• الفطار هيساعدك على تنشيط الميتابوليزم وحرق سعرات حرارية أكتر وتجنب اضطرابات المعدة
• مهم تختار الأطعمة اللي بتحارب الإرهاق وبتمد الجسم بالطاقة زي الحبوب الكاملة والمكسرات والفواكه قليلة السكر والبروتين النباتي

تجنب السكر لحد الغداء

الأطعمة اللي فيها سكر زي المخبوزات أو السكريات بتسبب الارتفاع وبعدين الانخفاض المفاجىء لنسبة السكر في الدم، وبالتالي الشعور بالتعب

تقليل كمية القهوة لتجنب الارهاق

• بالرغم من إن القهوة ليها فوائد كتير، إلا إن شربها بكميات كبيرة بيسبب الشعور بالارهاق آخر اليوم
• الدراسات أثبتت إن الأشخاص اللي بيشربوا كمية كبيرة من المشروبات اللي فيها كافيين بيحسوا بتعب أكتر عن الأشخاص اللي بيشربوا كمية أقل وإحساسهم بيه الصبح بيكون أكتر

اقف في مكان مفتوح للتغلب على الارهاق

• الشمس والطبيعة بتحفز هرمون السيروتونين في الجسم وبالتالي زيادة كمية الطاقة في الجسم
• ممكن تستبدل المشي في الأماكن المفتوحة بفتح الستاير والشباك أول حاجة في اليوم أو قضاء 10 دقايق خارج البيت أو البلكونة قبل النزول

تمارين الكارديو

• التمارين الخفيفة اللي بتنشط معدل ضربات القلب زي الكارديو هتساعدك على الشعور بطاقة أكتر
• ممكن تمارس المشي أو الجري أو ركوب العجل أو بعض التمارين المنزلية زي (Jumping Jacks) أو (High Knees)

حدد أسباب شعورك بالارهاق

• في مهام معينة الصبح ممكن تسبب لك الشعور بالتوتر وازدحام اليوم، وبالتالي عدم وجود الوقت الكافي لممارسة أي خطوات للتغلب على ارهاق الصباح
• حدد الأشياء اللي بتسبب لك التوتر عشان تنجزها بالليل أو تستبدلها بشيء تاني، فمثلا لو وقتك بيضيع في تجهيز الفطار والملابس ممكن تعمل ده من بالليل

عمل روتين للنوم والصحيان

تحديد مجموعة من الخطوات قبل النوم وبعد الصحيان والالتزام بيها هيحسن جودة نومك وهيساعدك تصحى بطاقة أكتر، زي:

• الابتعاد عن أي شاشات زي التلفزيون والموبايل على الأقل ساعة قبل النوم
• النوم في نفس المعاد يوميا حتى أيام الأجازة
• عمل بيئة مريحة للنوم زي استخدام الشمع المعطر والنور الخافت وقراءة الكتب والاستماع لموسيقى الاسترخاء
• الصحيان في نفس المعاد حتى أيام الأجازة مهم لتنظيم ساعتك البيولوجية وتحسين طاقة الجسم