الريموت من الأجهزة الأساسية في حياتنا اليومية ومفيش يوم في حياتنا نقدر نستغنى فيه عن ريموت التليفزيون أو التكييف وغيرها من الأجهزة اللي طريقة تشغيلها معتمدة عليه بشكل أساسي، وخبراء التقنية بيوصّوا بضرورة شراء ريموت أصلي لاستخدام الأجهزة والابتعاد عن أي ريموت ضعيف لأنه بيتلف بسرعة وهيعطّلك عن استخدام أجهزتك وهتضطر تشتري ريموت تاني وبالتالي هتخسر فلوس ووقت ومجهود.
بداية ظهور الريموت
- براءة اختراع الريموت كانت ملك المخترع الفيزيائي والمهندس الكهربي نيكولا تسلا اللي اخترعه للتحكم في الراديو عن بعد واتسجلت براءة الاختراع سنة 1898
- بدأ ظهور الاختراع الجديد للتلفزيون على إيد يوجين إف. ماكدونالد وهو ظابط أمريكي سابق ومؤسس لشركة زينيث للإلكترونيات اللي كان عايز يكتم صوت التلفزيون عن بعد أثناء الإعلانات
- وضع تحدي للمهندسين في شركته وأنتجوا في سنة 1950 تلفزيون اسمه Lazy Bones وهو أول تليفزيون يستعمل عن طريق الريموت كونترول وانتشر على نطاق واسع في 1956
- انتشر كثورة في مجال الإلكترونيات وامتد لأجهزة تانية زي المراوح والتكييفات وانتشر استخدام أجهزة التحكم عن بعد في الأسلحة والمركبات الحربية
- ظهر في مصر لأول مرة بعد 8 سنوات من ظهوره في أمريكا على يد شركة نصر اللي ابتكرت تليفزيون جديد بالريموت كونترول ونشرت إعلاناته في التليفزيون سنة 1964
نصائح للحفاظ على عمره الافتراضي
- احتفظ بيه داخل جراب شفاف عشان تحميه من الكسر
- قلل استخدامك له وإنت بتاكل أو بتشرب وابعده عن أواني الطعام أو الأكواب المليئة بالسوايل
- بلاش تمسكه بإيدك المبلولة
- امسكه فقط وقت الاستخدام وابعده عن متناول الأطفال
- بلاش تلعب بتحريك الأزرار باستمرار وافحص البطاريات وغيّرها لما تضعف
- فك البطاريات منه لو مش هتستخدم الجهاز لمدة طويلة لأنها بتتفاعل معاه وممكن تزوّد فرص تلفه
- نضفه بتمرير قطعة قطن أو قماش نضيفة مرشوش عليها كحول
- استخدم عيدان القطن للتخلص من أي أتربة متراكمة بين الأزرار
- احتفظ بيه في مكان مناسب وبلاش تحطه على الأرض أو على طرف الترابيزة
- ابعده عن الأجهزة اللي درجة حرارتها عالية
خطوات إصلاح الريموت
- صوّر الريموت قبل ما تفكه عشان ترجّع الترتيب والوضع الصحيح للوحة المفاتيح المطاطية اللي فيها الزراير
- شيل البطاريات وفك أي مسامير بتربط بين أجزائه
- اعمل فتحة صغيرة بإيدك وافتحها ببطء عشان تحميه من التلف
- ممكن يبقى تراكم الأتربة فوق لوحة الدايرة الكهربائية سبب في العطل
- هات فرشة أسنان قديمة ورش عليها كمية بسيطة كحول ونضف بيها الدايرة الكهربائية برفق
- بل عيدان قطن بالآسيتون ونضف بيها أي بقعة سوداء في الدايرة الكهربائية وفي الجزء الخلفي من لوحة المفاتيح المطاطية
- خليه مفتوح لحد ما يجف تمامًا
- لو لسه المشكلة موجودة استشير فني متخصص
- استخدم الفويل لو المشكلة سقوط زرار من لوحة المفاتيح المطاطية
- عن طريق وضع لاصق قوي في مكان الزرار المفقود وتثبيت قطعة فويل في نفس حجم الزرار
- حط كمية بسيطة من اللاصق لأن الإفراط في استخدامه ممكن يضره
- سيبه فترة لحد ما يجف تمامًا وبعدين ركّب الأجزاء كلها
