المحتويات
المكنسة الكهربائية بتسهل التنضيف وإزالة الأتربة من الأثاث والأرضيات، ولكن استمرارها معاك لمدة طويلة أساسه الحفاظ عليها وتنضيفها والوعي باستخداماتها الصحيحة وتحديد العوامل الأساسية اللي محتاجها في المكنسة قبل شرائها.
طريقة اختيار مكنسة كهربائية
- حدد ميزانيتك قبل الشراء عشان تعرف العلامة التجارية المناسبة ليك
- اسأل أشخاص تعرفهم اشتروا مكنسة كهربائية قبلك واسألهم عن أفضل العلامات التجارية اللي بيستخدموها
- راجع تقييمات العملاء على مواقع التواصل الاجتماعي عشان تفهم طبيعة عمل المكنسة وآراء المستخدمين فيها قبل الشراء
- اشتري من محل موثوق فيه وافهم خدمات ما بعد البيع المتوفرة قبل الشراء
- حدد مكان تخزين المكنسة قبل التفكير في شرائها وأثناء الاختيار راعي مناسبة حجمها لمكان التخزين
- اعرف إن بعض الأنواع الأرخص ثمنًا بتستخدم فيها كيس الغبار مرة واحدة فقط وبعدها بتتخلص منه
- لكن أنواع تانية أغلى بتخزّن الغبار في مكان مخصص (علبة بلاستيك أو كيس مقوّي) وبتفرّغه كل فترة وده بيعتبر نوع عملي أكتر
- اختار مكنسة بفلتر ثابت وابعد عن الأنواع اللي بتطلب منّك تغيير مستمر للفلتر
- افهم الملحقات الموجودة مع المكنسة خصوصًا قطع الغيار وكيفية استخدامها وابعد عن أي علامة تجارية مش بتوفر قطع الغيار مع المكنسة وقت الشراء
- افحص قوة المحرك الرئيسي للمكنسة وطول الخرطوم لأنهم من العوامل الأساسية اللي بتحدد لو المكنسة الكهربائية عملية ولا لأ
- لازم تعرف قبل الشراء لو المكنسة تقدر تسحب مياه ولا لأ، خصوصًا إن بعض الأنواع غير المخصصة لسحب المياه ممكن تتلف لمجرد ملامستها لأرضية مبللة
- اختار مكنسة بسعة كبيرة خصوصًا لو هتنضف بيها مساحة واسعة
أنواع المكنسة الكهربائية
- المكنسة اليدوية وهي عبارة عن جهاز صغير ممكن حمله باليد الواحدة وبيتسمى بالمكنسة المحمولة وبتشتغل بالبطارية
- مكنسة كهربائية محمولة على الضهر وهي من أنواع المكانس اللي بتحمل على الظهر كأنها شنطة مدرسية وبتسهل تنضيف الأماكن الواسعة خصوصًا البيوت اللي فيها سلالم
- المكنسة العادية وبتظهر في أشكال كتير زي المستطيل أو الإسطواني أو شكل الفأرة وغيرها من الأشكال
- هي عبارة عن علبة مختلفة الشكل حسب نوع المكنسة وفي داخلها المحرك وكيس الغبار ومتوصل بيها خرطوم واسع لشفط الأتربة
- المكنسة الطولية وهي المكنسة المنتشرة أكتر في الدول الأجنبية وبتبقى قطعة واحدة ليها مقبض مريح قريب من مستوى الإيد
- بتجر المكنسة لتنضيف الأرضيات وبتحتوي في أسفلها على فرش وعجلات وفي داخلها المحرك وكيس الغبار
الحفاظ على العمر الافتراضي للمكنسة
- فرّغ كيس المكنسة باستمرار وتحديدًا لما يتملي 2/3 الكيس وبلاش تستنى لما يتملي على آخره
- خليك دقيق وركّب كيس المكنسة بإحكام.. لو مش عارف الطريقة راجع كتالوج الاستخدام
- اغسل الفلتر بعد 3 مرات استخدام للمكنسة بس اتأكد من الكتالوج الأول إنه قابل للغسل
- هات فرشة ناعمة وادعكه بيها عشان تشيل أكبر كمية من التراب منه
- تراكم الأتربة فيه بيضعف الموتور مع الوقت.. والأحسن تغيره كل 6 شهور
- بلاش تسيب المكنسة شغالة لمدة طويلة وافصلها كل شوية
- خلي المكنسة قريبة من المكان اللي بتنضف فيه عشان تتجنب شد الخرطوم
- اتأكد من سلامة الخرطوم الأساسي وغياب أي ثقب فيه
- نضّف فرشة المكنسة باستمرار وبلاش تسيب الشعر أو أي رواسب ملتصقة فيها
- اتأكد إن سلك الفيشة مفرود قبل ما تدوس على زرار السحب
- بلاش تنضف بيها أي سطح عليه سوايل.. ممكن يسبب ماس كهربائي أو تراكم العفن داخل المكنسة في أحسن الظروف
- اتأكد من غياب أي عملات معدنية أو شعر كثيف بكمية كبيرة قبل ما تبدأ تنضيف الأرضيات
- استعمل القطع المرفقة بالمكنسة المخصصة لتنضيف الستاير والمفروشات
- حافظ عليها بعيد عن متناول الأطفال لأن إدخال أي شيء في الفرشة أو في مروحة التهوية هيضعفها
خطوات تنضيف المكنسة
- هتحتاج بعض الأدوات زي كيس قمامة وقطعة قماش ومقص
- البس جوانتي مطاطي وكمامة عشان تتجنب أي تحسس من التراب
- خرج كيس التراب من المكنسة برفق عشان تمنع انتشار التراب ودخله في كيس القمامة وفرغه ببطء
- اغسل كيس المكنسة بالمياه ومسحوق غسيل كويس وسيبه ينشف
- فك أجزاء المكنسة اللي محتاجة تنضيف زي (فتحة شفط التراب) ونضفها بقطعة القماش مبللة
- استخدم المقص عشان تتخلصي من أي خيوط أو بقايا شعر في فتحة شفط الأتربة
- نضف خرطوم المكنسة والفيلتر بالمياه واتأكد إنهم نشفوا كويس قبل التركيب
- استخدم زيت عطري زي اللافندر عشان يحسن الرائحة
- اغمس قطنة وامسح بها كيس المكنسة من جوه ورش بيكربونات الصوديوم في كيس المكنسة عشان تتخلص من الروايح الكريهة
- ركب الأجزاء بطريقة صحيحة ممكن تستعين بالكتالوج ورجع كيس المكنسة بعد جفافه من أي بلل
طريقة تحقيق أقصى نتيجة باستخدام المكنسة
- اتخلص من مصادر التراب والغبار المتراكم على بعض أجزاء البيت بخطوات بسيطة زي:
- هز الستاير واستنى 5 دقايق لحد ما التراب يستقر على الأرض
- استخدم قطعة قماش أو فرشة الغبار في تنضيف الأثاث زي الأرفف والترابيزات والتلفزيون وغيره
- نضف الكراسي والكنب عشان تتخلص من أي بقايا طعام
- ابدأ من الخارج للداخل عشان تمنع تطاير الغبار لبره الأوضة
- تجنب استخدام المياه قبل الكنس أو كنسها وهي مبللة
- استخدم الجزء الرفيع عشان تتخلص من الأتربة العالقة على الشباك
- اكنس السجاد في 4 اتجاهات ( من تحت لفوق والعكس ومن اليمين لليسار والعكس) وابدأ قبل استخدام أي مياه للتخلص من أي بقعة على السجادة
- اغمس قطنة في زيت عطري وامسح بها كيس المكنسة بعد تنضيفه عشان تخلي ريحة السجاد والبيت حلوة
- استخدم الأجزاء الرفيعة عشان تتخلص من بقايا الطعام في جوانب الكنب تحت المقاعد
- ممكن تستخدم المكنسة في تنضيف أدوات المطبخ زي التوتسر أو الفرن (سواء في البوتجاز أو منفصل)
- استخدم فرشة المكنسة لتنضيف شعر الحيوانات من السجاد واستخدم المكنسة في تنضيف فيلتر غسالة الملابس عشان تتخلص من الوبر بسهولة
خطوات إصلاح خرطوم المكنسة الكهربائية
- بيتسد خرطوم المكنسة نتيجة تراكم الغبار والأوساخ بداخله وبتتأثر كفاءة الشفط وممكن وبتزيد فرص تلف المكنسة
- فك الخرطوم من المكنسة وافحصه كويس عشان تتأكد إن مفيش أي ثقب أو تشققات
- لو مش شايف الثقب بس حاسس بوجود تسريب املاه بالمياه واتنيه على شكل حرف U وراقب لو التسريب موجود أو لأ
- بس بلاش تلجأ ليها إلا لو متأكد إن فيه تسريب لأن استمرار تعريض الخرطوم للمياه ممكن يسبب تلفه
- أغلب الشقوق أو الثقوب بتبقى موجود في أحد طرفي المكنسة
- وبالتالي تقدر تقطع الجزء اللي فيه الثقب بسهولة وترجع المكنسة تشتغل بكفائتها المعتادة
- ضروري تغسل مكان الثقب لو في منتصف الخرطوم وجففه كويس بعدها
- لف أكتر من طبقة من الشريط اللاصق عليه وبعدها ركّب خرطوم المكنسة تاني قبل إعادة تشغيلها
- رش دقيق أو طباشير على الأرض واشفطهم بالمكنسة عشان يكوّنوا طبقة فوق الشريط اللاصق من الداخل
- وبالتالي هتقل فرص تراكم الغبار والأوساخ عليه اللي ممكن يزوّدوا فرص انسداد الخرطوم مرة تانية
