الوميتال عالي الجودة وسهل التنضيف وسعره متوسط هو هدف أي شخص عايز يشتري شباك ألوميتال جديد ويحافظ عليه لأطول وقت ويستفيد من شكله المميز وقدرته على العزل الجيد للصوت والهواء والأتربة.
طريقة اختيار شباك الوميتال
- اعرف إن شباك الألوميتال في مصر بينقسم لأنواع أو قطاعات كتيرة حسب المسمى في السوق
- اقدمهم قطاعات هو قطاع السعد ولكنه يعتبر بدائي حاليًا لأن أنواع كتير أحدث منه ظهرت في السوق
- الألوميتال الـ PS الصغير والكبير والفرق بينهم في السمك (الفرق حوالي 2 سم تقريبًا) وبيعتبر من الأنواع متوسطة الجودة وممكن إضافة بعض الإكسسوارات الخاصة به زي الكاوتش وكاتم الصوت وغيرها
- اهتم إن الإكسسوارات الكاملة للألوميتال هي العامل الرئيسي لاستمرارية الألوميتال معاك لفترة طويلة
- اعرف إن الألوميتال الجامبو والفولكانو هما الأنواع الأفضل وبعدهم مباشرة التانجو وكلها أنواع بتتميز بالسماكة وبالتالي بيوفروا حماية أعلى للمستخدم
- ضروري تسأل عن النوع المناسب ليك حسب ميزانيتك بس اهتم بسماكة الألوميتال واستكمال كل الإكسسوارات الخاصة به
- استشير حد قريب منك جرب يركّب ألوميتال عشان تعرف النوع الأفضل واشتري من مكان بيقدم خدمات ما بعد البيع
الحفاظ على الأوميتال لأطول فترة
- استخدم مقبض الفتح والقفل وقت اللزوم وبلاش تضغط عليه بعنف
- بلاش تثبت قدامه قطعة أثاث.. ممكن تحتك به وتخدش إطاره
- افتحه باستمرار لضمان دخول الهواء اللي بيمنع تراكم العفن المضر على المدى البعيد
- اهتم بالصيانة الدورية مرتين على الأقل سنويا لضمان سلامة المقابض والجرار
- التشحيم مرة سنويًا على الأقل هيحميك من صوت الصرير أثناء الفتح أو القفل
- نضفه باستمرار خصوصًا المجرى (مكان الجرار) والأطراف
- من خلال قطعة إسفنج مبللة بالمياه والصابون ومررها على كل أجزائه وضيف عليها الخل مع بيكنج صودا لضمان أفضل نتيجة وبعدها مرر قطعة إسفنج جافة لضمان امتصاص المياه
- اهتم بنضافته من بره لأن الجسيمات الصغيرة زي حبوب اللقاح سهل تلتصق بالزجاج وبتترك بقع صعب إزالتها في المستقبل
طريقة تنضيف شباك الوميتال
- تخلص من الغبار والأتربة بفوطة جافة قبل استخدام أي سائل تنظيف
- استخدم الخل لأنه مطهر مضاد للبكتيريا والجراثيم واخلط معلقتين كبار على مياه دافية في زجاجة بخاخ
- ممكن تضيف نقطتين أو 3 صابون الأطباق عشان تتخلص من أي بقع
- الشاي غني بحمض التانيك ويعتبر بديل واستخدم مقدار مناسب لمساحة الزجاج بعد ما يبرد مع قماشة أو قطعة جرايد
- ورق الجرائد لتنظيف الزجاج بيساعد في التخلص من أي تلطيخ أو علامات عليه وبالتالي مهم تغسل إيدك كويس بعد استخدامه عشان تتجنب أضرار الحبر المكتوب عليه
- املا وعاء كبير مياه وضيف عليه نص كوباية خل ومعلقتين صابون غسيل الأطباق ومعلقة كبيرة ملح ليمون (مش ملح طعام عادي) واخلطهم كويس عشان تنضف جسم الألوميتال والحلق في أسرع وقت
