المحتويات
(خلاط قوي وسريع وسعره مناسب وقليل الأعطال ومتعدد الاستخدامات) دي المواصفات الرئيسية اللي بتبحث عنها أثناء شراء أي خلاط، بس اعرف إن كل ما الاستخدامات المتاحة والجودة زادوا بيرتفع معاهم السعر وبالتالي ضروري تحدد ميزانيتك صح عشان تشتري أعلى فئة حسب السعر المناسب ليك.
نصائح قبل شراء خلاط مناسب
- بيختلف كل نوع في قوة الموتور عن التاني خصوصًا في القدرة على طحن وهرس المكوّنات الداخلية
- مثلًا بعض الخلاطات تقدر تطحن حبوب القهوة أو الثلج ولكن بعضها ممكن يتلف من محاولة طحنهم وده سببه قوة الموتور اللي بتختلف من خلّاط للتاني
- اعرف إن أغلب الخلاطات بتبدأ من 300 وات وبتوصل لأكتر من 700 وات وبالتالي اختار الجهاز اللي قوة موتوره أعلى قدر المستطاع عشان تحقق أكبر استفادة منّه
- اختار الخلاط متعدد الشفرات اللي تقدر تركّبها وتشيلها حسب استخدامك وفي نفس والوقت عشان تسهّل عملية استخدام الخلاط وتنضيفه
- اختار سعة مناسبة لعدد أفراد الأسرة عشان تقلل فرص استخدام الخلاط أكتر من مرة مثلًا لو بتعمل عصير
- اتأكد إن أوعية الخلاط بتتحمّل السوائل الساخنة وتكون مصنوعة من منتجات آمنة على صحتك وسلامتك وضروري تبحث عن علامة (BPA Free) عشان تتأكد من أمان أوعية الخلاط
- ضروري يحتوي الجهاز على 3 سرعات على الأقل
- حاول تجرّبه قبل استخدامه أو على الأقل شوف فيديوهات لكيفية عمله عشان تتأكد من ثباته وعدم حركته أو اهتزازه زيادة عن اللزوم
كيفية الحفاظ عليه لأطول فترة
- اقرأ التعليمات الموجودة في كتيب الاستخدام أو على الكرتونة
- اتأكد من تثبيت الشفرات في القاعدة وعدم اهتزازها
- بلاش تحط أطعمة صلبة أو مجمدة داخله لأنها هتزود فرص تلف الشفرات
- قطع الأكل لقطع صغيرة وضيف عليه سوايل
- استبدل الشفرات باستمرار عشان تحافظ على كفاءة التقطيع
- استعمالك لشفرات ضعيفة بيطول فترة عمل الخلاط وبالتالي بيزيد العبء على الموتور
- نضف الخلاط باستمرار بس بلاش تمرر مياه على الموتور عشان تحافظ عليه وتقلل فرص تلفه
- بلاش تملا الخلاط على آخره
- فك القارورة وركبها تاني لو لاحظت أي تسريب.. ممكن يبقى السبب وجود فراغ بين القارورة والقاعدة
- استشير فني متخصص لو لاحظت أي صوت مزعج أو حركة غير طبيعية أثناء تشغيله
طريقة تنضيف الخلاط
- حط مياه في الخلاط لحد نصه مع نقطتين أو تلاتة منظف الصحون وضيف عليهم نص ليمونة وشغل الخلاط لمدة دقيقة
- تخلص من المياه واشطفه كويس بالمياه الدافية واستخدم ليفة إسفنجية أو فرشة أسنان في حالة تراكم أي بقع لحد ما تختفي
- لو بقالك مدة كبيرة ماغسلتوش الأحسن تنقعه طول الليل في محلول من كوباية خل ونص كوباية بيكنج صودا ونقطتين منظف صحون
- جففه كويس لأن تركه مبلول لمدة طويلة بيزود خطر نمو البكتيريا وامسح القاعدة بإسفنجة فيها مياه دافية وصابون
- بلاش تحط كمية كبيرة من المياه على الجهاز نفسه وجففه كويس وحط كرات القطن أو أعواد تنضيف الأذن مرشوش عليها كحول عشان تنضف الزراير أو بين الفتحات
- لو سكينة الخلاط لسه مش نضيفة انقعها في طبق كبير فيه مياه دافية ونقطتين منظف صحون وسيبه من ساعة لاتنين وبعدها ادعكه برفق بقطعة قماش أو إسفنج محطوط عليها خل أو نص ليمونة
أسباب أعطال الخلّاط
- عدم وصول التيار الكهربائي للموتور سببه وجود سلك محروق
- عمل الخلاط لفترات وتوقفه في فترات تانية سببه وجود أجسام عالقة داخل الخلاط الداخلي
- وفي الحالتين ضروري تستشير فني متخصص يساعدك تحل المشكلة في أسرع وقت
- توقف الموتور عن العمل فجأة أثناء تشغيله سببه الرئيسي ارتفاع درجة حرارة الموتور
- وقتها لازم تفصل فيشة الكهرباء لمدة مش أقل من 20 دقيقة قبل إعادة تشغيله مرة تانية
- تسريب السوائل سببه عدم ربط المسامير بإحكام
- وقتها ضروري تفحص مصدر التسريب الرئيسي وتحاول تربط أي مسمار في أقرب نقطة له
- أحيانًا بيبقى السبب ضعف أو احتراق الحاشية المطاطية اللي بتمنع التسريب وبالتالي ضروري تستبدلها
- انبعاث الروائح الكريهة سببه تلف المحرك أو تلف الشفرة الدوارة
- الاتنين بيتلفوا نتيجة تسريب السوائل ليهم وبالتالي ضروري تستبدلهم في أقرب وقت
