المحتويات
فرن كهربائي سهل الاستخدام وسعره رخيص وفي نفس الوقت مقاسه مناسب لمطبخك هو الهدف الرئيسي اللي بتبحث عنّه وقت شراء الفرن، ولكن ضروري تشتري من مصدر موثوق فيه وتتأكد إن الفرن سهل الاستخدام بالنسبة لك قبل الشراء.
الفرق بين الفرن الكهربائي والعادي
- الفرن العادي (اللي بيشتغل بالغاز) بيقوم بنفس مهام الفرن الكهربائي
- الفرق إن حجم الفرن الكهربائي أصغر من الفرن العادي
- بيوزّع الفرن الكهربائي الهواء الساخن في 3 اتجاهات (فوق وتحت ومن الخلف) وبالتالي بتضمن تسوية أعلى للأكل في وقت مناسب ومش بتحتاج تقلّبه كل فترة (في بعض الأصناف)
- بعض الخبراء بيقولوا إنه بيوفر في الوقت ولكن ده بيرجع لحسب نوع الفرن وكفاءته
- أنواع كتير من الفرن الكهربائي مزوّدة بمكان مخصص للتسخين وبالتالي تقدر بعد شرائه الاستغناء عن الميكرويف
نصائح قبل شراء فرن كهربائي
- ابحث عن الحجم المناسب لمطبخك وطبيعته سواء هتشتري فرن بيتركب في الحائط أو أي نوع تاني
- اختار فرن بباب زجاجي عشان تشوف الأكل أثناء السواء
- اتأكد من وجود مروحة قوية ومميزة داخل الفرن عشان تحقق أعلى فاعلية في التسخين وتسوية الأكل بنجاح
- اختار فرن بلترات مناسبة حسب عدد أفراد الأسرة مثلا:
- من 35 لتر لـ 40 لتر ممكن طبخ أكلة مكوّنة من شخص لشخصين
- الفرن بسعة 40 لتر لـ 70 لتر للأسر المكونة من 4 أفراد
- أكبر من 70 لتر للأسر اللي عدد أفرادها أكتر من 4
- اسأل المسؤول عن البيع واعرف لو الفرن بيحتوي على خاصية التنضيف الذاتي ولا لأ (بتحصل عن طريقة رفع درجة الحرارة لـ 500 درجة مئوية وده بيساعد على تفتيت الدهون لأجزاء صغيرة يسهل مسحها)
- افتكر إن الشواية الداخلية هتساعدك توفر مساحة بس هتمنعك من استخدام الفرن وقت استخدامها وفي نفس الوقت الشواية الخارجية هتاخد مساحة من المكان المخصص للفرن ولكن هتسهّل استخدام الفرن والشواية في نفس الوقت وبالتالي اختار الأنسب ليك
- اشتري الفرن من مكان موثوق فيه بيقدم خدمة ما بعد البيع وراقب تعليقات العملاء على مواقع التواصل الاجتماعي
- بعد تحديد الموديل والعلامة التجارية اللي عايز تشتري منها شوف فيديوهات بتوضح كيفية تشغيل الفرن عشان تعرف لو هيبقى عملي بالنسبة لك ولا لأ
نصائح لتجنب أخطاء بتسبب تلف الفرن
ورق الألومنيوم
- تغطية البوتجاز بورق الألومنيوم بيقلل تراكم البقع على سطحه وبيسهّل تنضيفه ولكنه مضر للفرن
- بيمنع تدفق الهواء للفرن وبيتداخل مع درجة الحرارة المرتفعة المنبعثة من عيون شعلات البوتجاز
- الأحسن تنضف البوتجاز بانتظام عن طريق قطعة قماش مبللة
الصدأ
- تراكم الصدأ على جوانب الفرن ممكن يزوّد فرص إشعال النيران في الفرن نفسه
- الأحسن تتخلص من الصدأ في أسرع وقت عن طريق محاولة إزالته بمحلول مياه وصابون وافركه قدر المستطاع
- تحميل الفرن فوق طاقته
- الخبراء بيأكدوا إن تراكم الأواني في الفرن المحملة بالطعام بتقلل فرص دوران الهواء الساخن في الفرن
- لازم تخرّج الطعام من الفرن وتغطيه بورق ألومنيوم عشان تحافظ على سخونته
رش مقبض الفرن بالمنظف
- لازم ترش المنظف فوق قطعة قماش وتمسح بيها المقبض وبعدها تجففه فورًا
- تراكم الصابون والمنظفات عليه بيقلل عمره الافتراضي خصوصًا لو إلكتروني
الإفراط في تنضيف الزجاج
- استخدام مواد صلبة زي سلك التنضيف لإزالة البقع على الزجاج بيسبب شقوق صغيرة فيه ومع الوقت ممكن ينفجر نتيجة تراكم الشقوق مع ارتفاع درجة الحرارة داخله
- الأحسن تنضفه برفق باستخدام قطعة قماش ناعمة
إهمال تنضيف الفرن
- تراكم الأوساخ داخل الفرن بيزوّد الطاقة اللي بيعمل بيها عشان يشتغل بكامل طاقته
- مع الوقت ممكن يقل عمره الافتراضي.. وبالتالي مهم تنضفه على الأقل مرتين في الشهر
