المحتويات
الفاونديشن (كريم الأساس) من خطوات الميكاب الأساسية، لأنه بيساعد على توحيد لون البشرة وإخفاء أي عيوب فيها، واختيار النوع الأنسب ليكي بيكون بناء على نوع بشرتك وتركيبة الفاونديشن الأفضل ليها.
خطوات تحديد أنسب فاونديشن
نوع البشرة
لازم تحددي نوع بشرتك عشان تقدري تختاري تكوين الفاونديشن الأنسب ليها واللي هيمتص أسرع وهيثبت مدة أطول
- لو بشرتك دهنية: النوع المات أو الباودر أو الخالي من الزيوت مناسب ليكي
- في حالة البشرة الجافة: النوع السايل أو الستيك أو الباودر اللي عليه كريم مرطب
- البشرة المختلطة: الفاونديشن الباودر مناسب ليكي
- لو بشرتك حساسة: تجنبي الأنواع اللي عليها عطور أو زيوت
خطوات تحديد درجة (Undertone) البشرة
في أكتر من طريقة تقدري تحددي بيهم درجة (Undertone) بشرتك عشان تختاري درجة لون الفاونديشن المشابهة لدرجة بشرتك وبالتالي تمتزج معاها بسهولة بدون وجود أي آثار
الطريقة الأولى
- لو عروق إيدك لونها مايل للأزرق أو البنفسجي تبقى باردة
- لكن لو لونها مايل للأخضر تبقى دافية
- لو صعب تحددي تبقى محايدة
الطريقة التانية
- لو بتاخدي تان لما تتعرضي للشمس تبقى بشرتك دافية
- لو جلدك بيحمر الأول سواء أخدتي تان أو لأ تبقى باردة
الطريقة التالتة
- البسي أسورة دهب في إيد وفضة في الإيد التانية وحددي اللي منور بشرتك أكتر
- لو الدهب تبقى بشرتك دافية
- لكن لو فضة تبقى بشرتك باردة
- لو الاتنين لايقين تبقى بشرتك محايدة
درجات الفاونديشن حسب (Undertone) بشرتك
- البشرة الباردة: درجات الروز والأحمر والكاكاو والبورسلين و(sable)
- الدرجات الدافية: الذهبي والدرجة المايلة للأصفر والكاراميل والبيج والتان و(chestnut)
- البشرة المحايدة: النود والايفوري و(buff) و(praline)
نصائح شراء الفاونديشن
- جربي الدرجات المختلفة على رقبتك أو على الفك مش على إيدك لأنهم الأقرب للون بشرتك الحقيقي
- الدرجة المناسبة لازم توحد لون بشرتك من غير ماتسيب أي بقايا عليها
- اختاري النوع اللي فيه نسبة واقي شمس عشان تحمي بشرتك حماية إضافية مع استخدام واقي الشمس يوميا
- لو سنك فوق الـ25.. اختاري النوع المقاوم للتجاعيد وعلامات التقدم في السن
- في حالة وجود خطوط تعبير رفيعة.. تجنبي الفاونديشن اللي مكوناته فيها بودرة لأنه هيبرزها أكتر
- اختاري النوع اللي فيه نسبة ترطيب
- جربيه أمام المراية وفي إضاءة طبيعية عشان تحددي لو مناسب لبشرتك ولا لأ
