تكنولوجيا
مواصفات جهاز تقوية شبكة المحمول ووظيفته ونصائح اختياره
إزاي تختار جهاز تقوية شبكة المحمول؟
المحتويات
جهاز تقوية شبكة المحمول من الأجهزة اللي هتساعدك تحل مشكلة ضعف شبكة الموبايل وهيزوّد قدرتك على إجراء المكالمات، أو لتسهيل الوصول لشبكة الإنترنت على الموبايل واللي بتعتمد في الأساس على شبكة الموبايل خصوصًا لو بتعتمد على بيانات الهاتف (Celluar Data).
وظيفة جهاز تقوية شبكة المحمول
- بيشتغل على تجميع كل الإشارات الضعيفة في المكان المحيط بيك وبيعيد بثها مرة تانية في المساحة القريبة منها
- بتختلف أنواعه بين الأجهزة المنزلية اللي بتستخدم داخل المنزل أو المكتب أو أي مكان تجاري
- أنواع تاني سهل استخدامها في السيارات العادية أو حتى سيارات الدفع الرباعي اللي بتتحرك في مناطق بعيدة داخل الصحراء اللي بتضعف فيها الشبكات
- اعرف إن تقنية الجهاز معتمدة على تجميع الإشارات الضعيفة عشان تقدر تستخدمها في إجراء أو استقبال مكالمة لكنه مش بيولّد إشارات جديدة لإجراء الإتصالات
- وبالتالي لو موجود في مكان مش متغطي بأي شبكة بتنعدم فائدة الجهاز
- أغلب الأجهزة بتتكون من موزع (شكله أقرب لراوتر الإنترنت) وكابل كهرباء وسبليتر والمستقبل الخارجي والموزع الداخلي
طريقة تركيب الجهاز
- تثبيت الوحدة الخارجية اللي بتجمع الإشارات على قاعدة خشبية أو بلاستيك وبلاش تثبتها على الحائط عشان تجمع أكبر قدر ممكن من الإشارات
- افتكر إن الوحدة الخارجية لازم تتركب بشكل أفقي مش رأسي
- الموزع الداخلي لازم يبقى في أقرب نقطة ممكنة للمكان اللي عايز توزع فيه الإشارة عشان تستمتع بأفضل نتيجة
- الخبراء بينصحوا باختيار الأركان والجوانب لأنه أكتر أماكن بتضمن انتشار الإشارات للغرفة أو للمكان كله
- لتركيب الموزع الرئيسي لازم تختار مكان قريب من فيشة في الحائط ومش بعيد عن المستقبل الخارجي لأنك هتربطهم ببعض بسلك
نصائح لشراء الجهاز
- اشتري الجهاز من مصدر موثوق فيه بيقدم خدمة ما بعد البيع لأن جزء كبير من الأجهزة الموجودة في السوق فرز تاني مش أول
- وده بيحصل نتيجة عيوب أثناء التصنيع وبتتصلح ولكن بتبيع المصانع الشركات للموردين على إنها فرز تاني بسعر قليل
- مفيش طريقة تعرف بيها إذا كان الجهاز فرز أول أو تاني إلا بعد استخدام الجهاز بمدة أو بعد استشارة فني متخصص يفحص الجهاز بدقة وبالتالي سهل بيع جهاز فرز تاني على أساس فرز أول
- اختار جهاز بيحتوي على شاشة LED عشان تعرف مدى قوة الشبكة
- بتختلف أسعار الجهاز حسب المساحة ومدى قدرته على تغطية شبكات الإنترنت 3G أو 4G ولكنها بتتراوح بين 1200 جنيه وبتوصل لـ 4500 جنيه
طريقة تقوية الشبكة بدون جهاز
- اشحن تليفونك.. لأن ضعف البطارية بيقلل جودة الشبكة
- شغل وضع الطيران لثواني معدودة واقفله.. أحيانا بيعيد ضبط الإشارة
- اقفل التطبيقات اللي مش بتستخدمها
- ابعد عن الأجهزة الكهربائية خصوصًا اللاب توب وأجهزة التليفون التانية عشان بتأثر عليها
- اقف جنب شباك أو في البلكونة عشان ممكن الحوائط تبقى السبب
- حاول تطلع لدور أعلى أو حتى ترفع التليفون بإيدك لفوق
- اتحرك بالتليفون لحد ما تلاقي المكان المناسب
- امسك تليفونك صح بشكل مستقيم وبلاش تعوجه
- اقفل بيانات الهاتف (الإنترنت) من الموبايل.. هيحسن اتصالاتك
- اظبط إعدادات الشبكة بنفسك
