لغة الجسد: كيفية فهم حركات الأطراف والعينين وطريقة المشي

لغة الجسد هي الإشارات غير اللفظية اللي بنستخدمها للتواصل، بتشكل حوالي 60% من التعامل اليومي، ومن الإشارات دي تعابير الوجه وحركات الجسد والإيماءات، وبتلعب لغة الجسد دور أساسي في طريقة مشاركة المعلومات مع الآخرين، وأثبتت ده مجموعة دراسات قالت إن المخ بيدي أولوية للتواصل غير اللفظي على التواصل اللفظي.

عوامل بتأثر على فهم لغة الجسد

الاختلافات الثقافية

• الخلفية الثقافية لشخص بتأثر على كيفية استخدام وقراءة لغة الجسد، على سبيل المثال في بعض الثقافات الغربية التواصل البصري أثناء التحدث معناه الانفتاح والاهتمام، عكس الثقافات الشرقية، بيتجنب الأشخاص التواصل البصري المطول وبيتحول النظر لأسفل كتعبير عن الاحترام

العوامل النفسية

• بعض حالات الصحة العقلية لها تأثير على فهم لغة جسد من شخص لشخص، زي لو شخص مصاب بالقلق الاجتماعي هيواجه صعوبة بالغة في مقابلة نظرة شخص تاني والتحديق عليه
• لو شخص بيعاني من الوسواس القهري هتلاقيه بيتجنب اللمس في السلام أو الأحضان، وممكن شخص عادي يفسره إنه كره أو عدم تقبل

طريقة فهم لغة الجسد  

ضروري تنتبه لعوامل تانية زي السياق اللي بيحصل فيه الإشارات غير اللفظية، وكمان لمجموعة الإشارات بدل التركيز على حركة واحدة 

تعابير الوجه

• فكر للحظة في مدى قدرة الشخص على التعبير عن نفسه من خلال تعبيرات الوجه بس، في أوقات كتير بتكشف عن مشاعرنا الحقيقية تجاه موقف معين حتى لو كلامنا عكسه

الابتسامة 

• الابتسامة لها مدلول مهم في لغة الجسد مش مجرد طريقة للتعبير عن السعادة أو الراحة، ممكن تتفهم بشكل مختلف حسب سياقها زي التحدي أو عدم المبالاة
• دراسة حديثة قالت إن الاشخاص المبتسمين بالفطرة بيتم معاملتهم على أنهم سذج أكتر من الأشخاص اللي بيبتسموا في مواقف محددة
• ابتسامة حقيقية وصادقة بتظهر زوايا الفم وبتضيق وبتتجعد زوايا العين 
• أما الابتسامة غير الصادقة مش بتشمل العينين وممكن يحصل استجابة لعدم الراحة في عضلات الوجه
• بتشير الابتسامة المصحوبة بتواصل دايم بالعين أو نظرة طويلة أو إمالة الرأس للانجذاب

حركات الشفاه

• الشفاه المضغوطة أو الضيقة بتشير للإحساس بعدم الارتياح 
• ارتعاش الشفاه بيعكس الخوف أو الحزن
• الشفاه المفتوحة والمرتخية بتعكس الشعور بالراحة والانفتاح بشكل عام

العيون

بربرشة

• الحركة السريعة بتعكس التوتر وعدم الارتياح أو الخوف في مواقف زي حل مشكلة صعبة خائف/ قلق بشأن شيء ما/ انتظار شيء أو شخص

 حدقة العين

• عادة بتتسع حدقة العين مع الشعور الإيجابي تجاه شيء أو شخص ما
• ممكن المشاعر دي تبقى انجذاب عاطفي أو راحة أو سعادة أو ثقة 
• كمان بتتسع مع أي إثارة للجهاز العصبي زي الغضب أو الخوف 
• أما مع الحزن أو عدم الارتياح بيحصل العكس وبتتضيق حدقة العين

اتجاه التحديق

• بتميل العين لمتابعة الشيء أو الشخص المهتم به
• لو اتجاه النني لليمين أثناء الحديث بيعكس إن الشخص بيحاول يفتكر شيء أو حل مشكلة ما 
• أما لو اتجهت لشمال بتعكس إنه شخص غير صادق في اللي بيقوله، لو بنفس الاتجاه لكن مع تحديق في الأرض فمعناه إنه بيحاور نفسه

حجب العين

• بيتضمن: تغطية العين بالإيد/ غلقها لفترة/فركها
• عادة بيسد الناس أعينهم مع الغضب أو الحزن أو مواجهة شيء غير مرغوب فيه
• بيشير كمان للرفض أو الإحجام 

حركة الإيدين والرجلين 

الساقين والقدمين

• خبط أو حك القدم أو القدمين على الأرض أو اهتزاز الساقين من علامات العصبية أو عدم الارتياح 
• لو اتجاه القدم ناحية الشخص التاني أثناء الحديث بتعكس الاستمتاع بالحديث والانفتاح، عكس لو في الجهة المقابلة بتعكس إحساس الشخص بعدم الراحة والرغبة في إنهاء الحديث
• الرجل المغلقة على بعضها (المتقاطعة) بتعني الرفض وعدم التقبل وعدم الرغبة في استماع الحديث

الإيدين

• الدراعين المنغلقين ومتقاطعين بيعكسوا إحساس الشخص بالدفاع أو الحماية الذاتية أو الانغلاق
• الوقوف مع وضع اليدين على الفخدين بتعكس إن الشخص جاهز ومسيطر ، أو ممكن تكون علامة على العدوانية في سياق تاني
• إمساك اليدين خلف الظهر بتعكس شعور الشخص بالملل أو القلق أو الغضب
• التخبيط بالأصابع على أي سطح بتعكس الزهق ونفاذ الصبر أو الإحباط
• أثناء المصافحة.. لو الشخص مسكها بقوة بتعكس الرغبة في السيطرة، وفي حالة إنه لف إيده على إيدك عشان تكون إيده أسفل بتعكس تأييد الشخص لك وإعجابه بك، أو رغبته في دعمك وتقديم المساعدة
• فرك الأصابع معناها إن الشخص متوتر ومش مرتاح
• الدراع الممدود مع راحة اليد للأعلى بتعكس انفتاح الشخص وترحيبه بالطرف التاني
• القبضة المشدودة بتعكس الغضب أو الإحباط ٠حتى لو لاحظت تعبيرات الوجه محايدة أو مرتاحة 
• لمس الخدين بشكل مفرط بتعكس انشغال الشخص بالتفكير في أمر شاغل تركيزه

التنفس 

• ارتفاع معدل التنفس بيعكس إن الشخص بيتعرض للضغط سواء إيجابي أو سلبي، لو شخص بيتنفس بسرعة معناه إنه فرحان أو قلقان أو متعصب 
• عكس التنفس البطيء أو الهادي بيعكس الهدوء والتفكير 
• التنفس بعمق (يعني الشهيق بيكون أطول أو مليء الصدر بالهواء) بيعكس الراحة أو الغضب أو التعب

وضعية الجسم

• الانحناء على الحائط أو أي دعم تاني بيعكس الإحساس بالملل أو عدم الاهتمام
• الميل في اتجاه شخص ما بيعكس الاهتمام أو الإثارة أو الإعجاب 
• الوقوف بشكل مستقيم مع وضع الإيدين على أعلى الفخدين بيعكس التحفز أو الحماس والثقة بالنفس
• لكن لو كانت الإيدين على الجانبين، هي وضعية استراحة بتعكس الرغبة في الانخراط والاستماع 
• لو الرأس مسنودة على إيد واحدة بتعكس الاهتمام بالحديث، لكن لو بالإيدين بترمز للملل أو التعب
• ميل الرأس أو الجسم لجانب واحد بتعني الاهتمام والتركيز، ممكن تعكس الانجذاب

المسافة 

• درجة المسافة الجسدية اللي بيحافظ عليها الشخص وقت التحدث معاه بتعكس حالته المزاجية أو مشاعره تجاه الطرف التاني
• لكن مهم تكون عارف، إن بعض الأشخاص بيفضلوا الحفاظ على مسافة أكبر بينهم وبين الآخرين، وخاصة الأشخاص اللي مش عارفينهم

• الجلوس بالقرب من الشخص واللمس أو الميل أثناء المحادثة مع الابتسامة بيشير للانجذاب الجسدي
• تراجع شخص لوراء بعد ما قال معلومة أو حقيقة ما، ده دليل على الكذب ورد فعل جسمه للهروب من كذبته
• لو شخص بعد أو أخد مسافة لوراء أثناء الحديث، ده معناه إنه بيحاول يحافظ على العلاقة الرسمية وعدم التقارب

طريقة فهم لغة الجسد أثناء المشي 

• خبير الصحة واللايف كوتش الأمريكي Caleb Backe قارن في دراسة بين سرعة المشي وأنماطه، بسمات “الشخصيات الخمسة – The Big 5”
• والسمات دي هي الانفتاح والقبول والعصابية والانبساط والضمير، مع أنواع تانية زي الداعم والسائق والمصحح
• وقال إن كل واحدة كان لها أسلوب مشي مميز

•  التنفيذي- The Executive: الخطوات سريعة ومركزة وبتكون الرأس مرفوعة وغالبا الشخص بينغمس في التفكير، مش بيهتم بالآخرين لدرجة إنه ممكن يصطدموا بسهولة
•  المصحح – The Corrector: الخطوات صغيرة ومع الرأس محنية وبيتجنب الشخص الاتصال بالعين مع اللي حوليه، غالبًا هم شخصيات خجولة وانطوائية وحذرين
• السياسي The Politician: الخطوات بتتسم بالحيوية مع الرأس مرفوعة والصدر للأمام والكتف للخلف، وهو شخص بيحب وبيتهم بالتقدير وبيستمتع بالتحديات والتجارب الجديدة، لكنه بيحس بالملل بسهولة وبيحب يتفاعل مع الآخرين وواثق من نفسه
•  القلوق – The Worrier: الخطوات بتكون ببطء شديد وحذرة وعين الشخص غالبا على الأرض وخطواته قصيرة ومترددة، بيميل للقلق والانطواء والتفكير الزائد وفي بعض الأحيان بيكونوا خوافين وضعفاء
•  الهادي – The Chiller: عادة بيمشي الشخص صاحب النوع ده بوتيرة بطيئة أو متوسطة وجسمه مرتخي ومسترخي وبيحس الحواليه إنه ضايع، وغالبا بيدور في رأسه حوار وبيركز مع الآخرين وبيظهر إنه كسول وهادي جدا
•  The Showboat: بيمشي الشخص بثقة شديدة وبيحرك دراعه بشكل ملفت وبيستمتع بجذب انتباه الآخرين، وعادة بتكون رأسه مرفوعة وكتفه الاتنين راجعين لوراء وبيكون مركز في نفسه أكبر وشخصيته جذابة
• النوع السابع الداعم – The Supporter: بيمشي بخطوات متوسطة واثقة، وبتكون شخصيته متعاونة وبيسمع لغيره بشكل جيد ومخلص بشدة، وبيحب التواصل البصري والتفاعل بين الناس وده بيحصل أثناء المشي في الشارع.. بيبتسم لغيره وبيحاول يساعد المارة
• الدراعين المتقطاعين: شخصية صاحب النوع ده بتفضل الوحدة لكن الخبراء قالوا إن المشي مع غلق الدراعين بيشير للضعف، والنوع ده خطير لأنه بيشير للأخرين بضعفه وخاصة في الليل بيكون فريسة سهلة للحرامية
• الغاضب – The Stomper: بيكون اتجاه الجسم  للأمام وتقدر بسهولة تسمع صوت خطوات صاحب النوع ده لأنها بتكون حادة وعالية، وبتوضح غضبه وإحباطه
•  متعدد المهام – The Multitasker: هتلاحظ إن الشخص ده بيمشي أو بيعدي الشارع ويتكلم في الموبايل في نفس الوقت، وده بيعكس شخصيته الشجاعة وقدرته على حل المشاكل وحرصه على مساعدة أصدقاءه وأهله