المحتويات
زراعة البصل في البيت ليها فوائد كتير منها توفير احتياجاتك في الطبخ منه، وتحسين الراحة النفسية والإحساس بالإنجاز وتحقيق الأهداف، وخبراء الزراعة بيأكدوا إن البصل من أسهل النباتات اللي ممكن تزرعها في البيت، خصوصًا عشان تستمتع بفوائد البصل المتنوعة على الصحة بدون إضافة أي مبيدات كيميائية
زراعة البصل في الماء
- بتعتبر زراعة البصل في الماء هي أسهل طرق زراعته
- ومناسبة أكتر لو عايز تعلّم طفلك أساسيات الزراعة أو تدرّبه على أهمية الزراعة وتعلّمه خطوات تحقيق الأهداف في شكل عملي
- اختار بصلة بس اتأكد إنها كتلة واحدة (مش بتحتوي على جزئين) واملا كوب مياه عشان تحط البصلة فيه
- اتأكد إن البصلة تبقى ملامسة لسطح المياه الخارجي فقط وبلاش تغمرها بالكامل في المياه لأنها هتعفن
- بعد 7 أيام تقريبًا هتظهر الجذور البيضاء وبعد 10 أيام بتظهر الجذور الخضراء وقتها ضروري تنقل البصلة لتربة عشان تستكمل نموّها في مكان مشمس
- اعرف إن تركها في الكوب لمدة طويلة هيزوّد فرص تعفّنها وبالتالي ضروري تنقلها لإصيص النبات عشان تستكمل نموّها بطريقة سليمة
خطوات زراعة البصل عن طريق استخدام البذور
- اختار إصيص للزرع مساحته 20X20 وثبّت بذرتين أو تلاتة من بذور البصل داخل التربة الطينية واعرف إن بذور البصل بتنمو في مدة من 10 لـ 12 يوم
- ضروري تراقب النبات يوميًا عشان ترويه بكمية مياه مناسبة وتحافظ عليه في مكان مظلل قريب من أشعة الشمس
- كمية السماد العضوي ضروري لازم تبقى ربع حجم الإصيص بالظبط عشان تحقق أعلى استفادة ممكنة
- السماد بيتكون من (شاي الكمبوست وسماد السمك والهيوميك أسيد) وبتضيف السماد كل شهر
- أهم خطوة في زراعة البصل بتحصل بعد شهرين من بداية وضعه في الإصيص وهي مراقبة سمكه وطوله ومراقبة حجم البصل اللي تكوّن حديثًا
- راقب لو سمك الساق وصل لـ 1 سم وطول النبات حوالي من 12 لـ 15 سم
- وهتشوف لو حجم البصل الجديد الظاهر أمامك في نفس حجم بيض السمان ولا لأ، بيتسمى البصل في المرحلة دي بالبزق
- بعدها بتختار من البصل أفضل الأنواع اللي بتحس إن شكلها أقرب للنضج وبتحطها داخل التربة ولكن على مسافات متباعدة (من 20 سم لـ. 25 سم)
- سيب فرصة مش أكتر من 10 أيام لتهوية التربة وبعدها شوف لو ظهر بعض العفن في البصل (البزق) واتخلص من البصلة المتعفنة فورًا
- خليك حريص وقت وضع البذور في بداية الزراعة أو ثمار البصل إنها تبقى داخل التربة لكن مش بعمق كبير
علامات نضح البصل وضرورة حصاده
- مرور ٩ شهور على زراعة البصل في التربة (سواء البذور أو البصل نفسه)
- خروج البصل بسهولة من التربة
- اصفرار عرش النبات
الوقت المثالي لزراعة البصل
- بينمو البصل في الأوقات المعتدلة وتحديدًا في أواخر شهر سبتمبر وأكتوبر قبل بداية الشتاء أو في فصل الربيع خلال شهور مارس وإبريل
كيفية ري البصل بالماء
- البصل بيحتاج 2.5 سنتيمتر مياه أسبوعيًا، ولكن مع جفاف الجو ممكن يحتاج كمية أكبر من كده
- لو مش عارف تقدّر لو التربة محتاجة مياه ولا لأ امسكها بإيدك (بس ضروري تبقى لابس جوانتي) وشوف لو التربة رطبة ولا جافة
