المحتويات
زراعة الاسطح فوائدها كتير سواء للبيئة اللي هتستفيد من زيادة المساحات الخضراء أو لشخصيتك، لأن دراسات كتير بتأكد على دور الزراعة في تعميق الروابط الأسرية وتنمية ثقة الإنسان في نفسه وبالتالي مهم تعرف خطوات البدء فيها والأدوات الأساسية لتنفيذها
الاستعداد قبل البدء في زراعة الاسطح
- تخلص من أي أشياء مخزّنة في السطح لأنها ممكن تبقى محملة بالحشرات أو الفئران
- نضّف السطح كويس بالمياه والصابون
- اتأكد إن السطح بيتعرض لأشعة الشمس المباشرة لمدة مش أقل من 4 ساعات لأن الزراعة بتحتاج ضوء قوي
- اتأكد إن فيه أكتر من شخص مؤمن بفكرتك عشان يساعدوك في تنفيذها لأنك مش هتبقى متفرّغ في بعض الأوقات
- حدد أماكن الضل وأماكن الشمس عشان تختار أماكن الزراعة حسب وصول الشمس لمنطقة معيّنة من عدمه
- جمّع أكبر قدر من الأواني الخشبية الكبيرة أو الإطارات المطاطية أو الصفائح البلاستيكية عشان تقسّم السطح حسب أنواع النباتات اللي هتتزرع
- الأحسن تبدأ بنظام الزراعة البسيطة خصوصًا لو الزراعة مش تخصصك الأساسي
- اشتري ألواح خشبية وقطْعها على مساحة متر في متر وغلّفها بالبلاستيك اللي لازم يكون سمكه مش أقل من 0.25 مليمتر
- مهم تراعي وجود فتحات صغيرة في البلاستيك لسهولة ري الزرع بس قطر الثقب لازم يكون مش أكبر من 1 سنتيمتر
- وضروري تهتم بعمل فتحة لتصريف المياه الزائدة عن حاجة التربة
خطوات الزراعة
- جهّز التربة الصالحة للزراعة وهي كميات متساوية من البرليت وحبيبات البيتموس وضيف كمية مناسبة من المياه
- افتكر إن البيتكوس شبه قوالب الطوب وبالتالي مهم تفتته كويس باستخدام كميات مياه كبيرة
- الأحسن في البداية تستشير متخصص عشان تعرف منّه المقادير اللازمة للري خصوصًا لأن كل نبات بيختلف عن التاني
- اغرس البذر في التربة اللي صنعتها بنفسك والأحسن لكل متر مربع زراعة بين 16 لـ 24 نبتة
محاصيل ممكن تزرعها
- الجرجير والخس والسبانخ والبقدونس والخبراء بيأكدوا إن المتر المربع منها بينتج من 4 لـ 5 كيلو
- محاصيل ثمرية تانية زي الطماطم والجزر والفراولة والفاصوليا والكنتالوب ممكن تتزرع بسهولة
- أما الفاكهة زي الخوخ والبرتقال والليمون والرمان فبتتزرع أشجارهم في براميل
طريقة الري والصرف
- الخضروات بتروى مرتين في اليوم وأحيانًا 3 مرات مع ارتفاع درجات الحرارة
- والفاكهة فبتروى مرة واحدة بس في اليوم
- أما الصرف فضروري تثبّت إناء تحت الثقب اللي صنعته عشان تقلل تراكم المياه في التربة
- الخبراء بيأكدوا إن أحسن وقت للري بعد الشروق بساعتين أو تلاتة وقبل الغروب بساعة وتجنّب الري في وسط النهار خصوصًا مع الحرارة الشديدة
- مهم تختار نوع جيد للمحلول المغذي لري النباتات واقرأ التعليمات المكتوبة على العبوة عشان تستخدمه صح
تجنب أخطاء رعاية النباتات وقت زراعة الاسطح
- الإفراط في الري بيسبب نفس ضرر الامتناع عنّه
- انخفاض جودة مياه الري بيأثر على صحة الجذور وبالتالي صحة النبات
- منظرها الجاف على السطح بيخدعك وبيخليك ترويها أكتر في أوقات كتير بتبقى مش محتاجة مياه
- استخدم مقياس الرطوبة لقياس درجة رطوبة التربة عن طريق إدخال عصا خشبية في قاع التربة عشان تعرف إذا كان رطبة ولا لأ
- استخدام أواني خالية من ثقوب التصريف بيهدد استكمال نمو النبات
- بتزيد فرص تعفّن الجذور نتيجة رطوبتها الزايدة وبالتالي بيقل عمر النبات
- دراسة بتأكد إن تعريض النبات للشمس طول اليوم مع الوقت ممكن يأذيه
- بيحتاج النبات للشمس لاستكمال النمو لكن سقوط الأشعة القوية المباشرة لمدة طويلة ممكن تصيب أوراق النبات بالحروق
- وبالتالي مهم تصمم ألواح خشبية بنفس مساحة الأرض المزروعة عشان تقدر تغطي بيها النباتات وقت اللزوم
- الخبراء بيقولوا إن تغيير مكان النبات كل مدة قصيرة بيأثر على عمره
- بيتعوّد النبات على درجة حرارة ورطوبة معينة حسب بيئته المحيطة وتكرار تغيير مكانه بيقلل مدة تكيّفه مع البيئة الجديدة وبالتالي نموّه
- الإفراط في استخدام المحلول المغذي بيأثر على التربة وممكن يتسبب في جفافها
- استشير متخصص يساعدك تحدد الكمية المطلوبة من المحلول المغذي أو السماد
- اختار وعاء مناسب لحجم التربة وقت زراعة الفاكهة وبلاش يبقى واسع أو ضيّق بزيادة
- الوعاء الضيق بيزود فرص جفاف التربة خصوصًا الجذور والواسع بيزود فرص تراكم المياه
