المحتويات
بانيو الحمام من القطع الأساسية الضرورية في الحمام مهما كان حجمه لتحديد مكان الاستحمام وتجنب تسريب المياه للأرضيات اللي ممكن تسبب مشاكل فيها وممكن الضرر يمتد للجيران في الدور الأسفل، وفي نفس الوقت بعض الأحجام منّه بتوفّر متعة ورفاهية وقت الاستحمام، وبالتالي مهم تعرف طرق اختياره وتنضيفه وفي نفس الوقت تقدر تتعامل مع مشكلاته زي تسليك البلاعة وسد الشقوق.
اختيار بانيو الحمام صح
- امسك متر قياس وارفع مقاسات الحمام وحدد مكان البانيو واعرف إنه الأفضل يبقى ملاصق للحائط
- اختار بانيو مناسب للمقاسات اللي رفعتها
- خليك حريص إن مقاس البانيو اللي هتشتريه يبقى مناسب للمكان اللي هيتركّب فيه وفي نفس الوقت لباب الحمام
- مساحة الحمام ممكن تبقى واسعة لكن مدخل الباب ضيق وبالتالي مش هتقدر تدخل البانيو للحمام
- الزوايا والأركان بتعتبر الأماكن المناسبة للبانيوهات الكبيرة اللي أغلب أشكالها مستطيل أو دائري أو بزاوية
- راعي وقت رفع المقاسات إذا كنت هترّكب كابينة شاور ولا لأ واعرف مكانها بالتحديد
- التصميمات الأنيقة ضرورية ولكن مهم تتأكد إنها مناسبة لألوان ومساحة حمامك
- اعرف المواد المستخدمة لتصنيع البانيو واستشير حد خبير فيهم عشان تتأكد من جودتها (أغلب البانيوهات بتتصنع من مادة الأكريليك)
- بعض البانيوهات بتتصنع من الصاج أو البلاستيك وبالتالي مهم تعرف أنواعها عشان تقدر تحدد القيمة مقابل السعر
- البانيو البلاستيك أو الأكريليك بيتميز بالقوة والمتانة وفي نفس الوقت بتنوع الأشكال والموديلات
- عكس الصاج اللي أشكاله محدودة جدًا على الرغم من قوّته ومتانته وأسعاره المعقولة
- أشهر الماركات في الأسواق المصرية ديورافيت وموسكو وفينسيا والطيب وإيديال ستاندرد
تنظيف بقع البانيو
الخل
- املا زجاجة بخاخ بالخل ورش بكمية كبيرة على البقعة وممكن تستخدم عصير الليمون كبديل لو مفيش خل بس اخلطه مع الملح وسيبه لمدة 20 دقيقة
- حط معلقة بيكنج صودا لو البقعة كبيرة وعميقة ومرر قطعة إسفنج ناعمة على مكان البقعة وادعكها كويس وبعدها اشطف مكان البقعة بالمياه
صناعة منظف طبيعي
- اعمل منظف طبيعي من مياه سخنة مع زيت نعناع وزيت شجرة الشاي وبيكنج صودا وضيف عليه قطعة صابون قشتالي لو موجود عندك (متوفر في محلات المنظفات)
- املا البقعة بالمنظف وسيبه أطول فترة ممكنة وادعك مكان البقعة بقطعة إسفنج لحد ما تختفي
- هتحتاج تكرر العملية أكتر من مرة حسب درجة البقعة
صابون الأطباق
- ممكن تستخدم صابون الأطباق في إزالة البقع بس ابعد عن مزيلات البقع الكيميائية لأنها ممكن تسيب علامة مكانها وتغيّر لون البانيو
- بلاش تخلط مواد زي الأمونيا أو الكلور لأن تأثيرهم ضار بالصحة خصوصًا لو استنشقتهم أو لمسوا جلدك
سد شقوق البانيو
- مرر سكينة معجون أو أي آلة حادة حوافها طويلة على أطراف البانيو عشان تشيل بقايا العجينة والصابون القديم
- رش كحول على قطعة قماش ومررها على نفس الأماكن عشان تتأكد من نضافتها
- اشتري أنبوبة سليكون (بتتباع في محلات أدوات البناء)
- ركب شريط تغطية على الأماكن اللي هتحط فيها السليكون عشان تضمن توزيعه بشكل متساوي
- اقطع فوهة الأنبوبة وركّبها في مسدس العزل اللي هتستخدمه في تفريغ الأنبوبة (ممكن تشتريه أو تأجره من محل أدوات البناء)
- افتح الأنبوبة وفرّغها على الأطراف وخليك حريص إن فتحة الأنبوبة تبقى قريبة من سطح البانيو لكن مش بتلمسه
- اضغط على زناد مسدس العزل بحرص وبضغطة خفيفة عشان تسمح بتدفق متوسط للسليكون
- خلي حركتك على الزناد خفيفة وسيبه كل شوية عشان تخفف الضغط في الأنبوبة
- والتزم بالحركة المستقيمة وفرغ الأنبوبة على مرة واحدة عشان تضمن توزيع السليكون بالتساوي
- اضغط العجينة بصباعك عشان تتأكد من وصولها للأركان وشيل الشريط اللاصق لما تخلّص وبلاش تقرّب مياه من العجينة قبل مرور يوم كامل
تسليك بلاعة البانيو
بالمياه المغلية
- شيل الرواسب الموجودة من شعر وصابون على البلاعة واغلي مياه وصبّها مباشرة داخل البلاعة
- حط ربع كوباية بيكنج صودا وكوباية خل مباشرة فوق البلاعة واستنى 20 دقيقة ولو لسه مسدودة صب مياه مغلية تاني
- في أغلب الأحيان هتتسلك من أول مرة
بسلاكة البلاعة
- اضغط على البلاعة بسلاكة البلاعة المطاطية من 10 لـ 15 مرة واضغط بقوة على البلاعة واضغط لتحت وبعدها اطلع لفوق وكررها بسرعة
- قلل المياه في البانيو قدر المستطاع باستخدام جردل أو وعاء كبير
- اشتري منظف كيميائي للبلاعة (بيتباع في محلات المنظفات)
- اقرأ التعليمات عليه وقبل ما تحط الكمية المناسبة ليك البس جوانتي ونضارة عشان تحمي جلدك وعينيك
- انتظر لمدة من 20 لــ 30 دقيقة وبعدها هتلاقي البلاعة اتسلكت
بعصاية تسليك البلاعة
- فك مصفاة البلاعة بمفك بعد تنضيفها من أي شعر أو رواسب
- دخّل العصاية المخصصة لتسليك البلاعة وحركها داخلها عشان الخُطاف يلتقط أي جسم بيسبب الانسداد
- اتأكد إن تصريف المياه شغّال بانتظام داخل البلاعة قبل ما تركب المصفاة تاني
