فوبيا الثقوب بتسبب آثار جانبية عند بعض الناس منها القشعريرة والتنميل، وبيسمّيها بعض العلماء تريبوفوبيا، أو رهاب النخاريب أو الفجوات، لكن على الرغم من كده، أغلب الدراسات والجامعات العالمية بتصر إنه أمر طبيعي، ومش بتصنّفه ضمن الدليل التشخيصي للاضطرابات النفسية والعقلية المعترف بيها.
تعريف فوبيا الثقوب
- هي حالة اضطراب وانزعاج شديد بتوصل للغثيان بتحصل لبعض الناس وقت رؤية ثقوب متراصة جنب بعضها في مكان واحد
- دراسة في جامعة إسكس البريطانية بتقول إن الحالة دي بتصيب 16% من البشر في العالم
- دراسات تانية اتعملت على خوف البشر من الأسطح المليئة بالثقوب زي خلية النحل، والإسفنج البحري، أو الفراولة بسبب الثقوب المنتشرة عليها
أعراضها
- ضيق التنفس
- تسارع ضربات القلب
- التعرق المستمر
- الحكة في الجلد
- الارتعاش
- إجهاد العين
- الغثيان وبتوصل أحيانًا للقيء
- نوبات الهلع
- الصراخ
- استدعاء المخ ليها طول الوقت
محفزات الخوف من الثقوب
- عيون الحشرات
- فقاعات الصابون
- ثقوب الخبز
- الرمّان
- ثقوب وبثور الجلد وقت الإصابة ببعض الأمراض
- زهرة اللوتس
- الفراولة
- الأشياء المنقطة خصوصًا الحيوانات
أسباب فوبيا الثقوب
- بعض العلماء بيفسروا الخوف ده إنه نتيجة لقلق وتوتر له أسباب تانية في الحياة، وبيبقى نتيجة استجابة لبعض الأفكار في العقل الباطن
- أحيانًا بيبقى الخوف من الشيء نفسه، مثلًا زي التوتر من خلية النحل والتفكير المستمر في هجوم النحل بكمية كبيرة على الشخص
- حتى لو كانت مجرد صورة ومش متجسدة قدام الشخص اللي خايف من الثقوب، لكن الارتباط الشرطي بين الشيء ده وبين الضرر ممكن يزيد خوفه
- مثلًا البعض بيخاف من ثقوب زهرة اللوتس بسبب قرونها اللي بتفكرهم بالحيوانات الخطيرة
- خبراء تانيين بيأكدوا إن بعض الناس بيواجهوا خوف حقيقي من مجرد رؤية الثقوب دي
- بعد اختبارهم وسؤالهم أكتر من مرة عن سبب الخوف أكدوا إن سبب خوفهم الوحيد هو مظهر تجاور الثقوب نفسه
- خبراء علم النفس بيأكدوا إن الظاهرة محتاجة دراسات أكتر عشان يتفسر السبب الحقيقي والعلمي المنطقي لخوف الآخرين من الثقوب
العلاج
- مفيش علاج صريح وواضح ليها لأن فيه جدل كتير حوالين تصنيفها
- بعض الخبراء بينصحوا بالعلاج السلوكي المعرفي اللي هيقلل المخاوف
- عن طريق إقناع المريض إن الصورة اللي مخه بيرسمها عن الشيء اللي بيشوفه مش حقيقية وإن الموضوع مش مخيف
- طريقة تانية في العلاج هي العلاج بالتعرض، وهي مواجهة المريض بكل مخاوفة بشكل مباشر
- بيبدأ العلاج بالحاجات اللي فيها درجة ثقوب أقل وبتتصاعد درجة الصعوبة حتى الوصول للحاجات اللي بيخاف منها المريض بشكل كبير
- ممكن يبقى من أعراض أمراض نفسية زي الاكتئاب، أو القلق العام، أو القلق الاجتماعي
- بلاش تتناول أدوية من نفسك لتخفيف حدة الأعراض إلا بعد تقييم حالتك من طبيب متخصص
- حاول تمارس تمارين التنفس لو اتعرضت لأي مثير منهم
- خد نفس عميق واكتمه وفرّغه على 3 مرات
- ارسم صورة جميلة في ذهنك وحاول تشتت نفسك عن الصورة المخيفة بكل قوتك
- قلل إدمانك للكافيين والتزم بنظام غذائي صحي
- درّب نفسك على مواجهتها مع حد قريب منك
