المحتويات
الفراولة من الفاكهة الشتوية المحببة للجميع، لها فوايد صحية لأنها بتحتوي على مضادات للأكسدة والفيتامينات والمعادن، وكمان بتدخل في أنظمة الدايت المختلفة والعصائر الطبيعية والديتوكس، وكمان مفيدة للحوامل والأطفال.
فوايدها
- غنية بفيتامين سي ومضادات الأكسدة اللي بتحمي خلايا الجسم من التلف
- بتقوي صحة العين وبتساعد في الحفاظ على القرنية وبتحمي من ضعف النظر
- النسبة الأعلى منها هي مياه وألياف وبالتالي مفيدة لتقليل الوزن أو الحفاظ عليه والحماية من الجفاف
- كمان الألياف مفيدة لنمو البكتيريا النافعة في المعدة وللحماية من الأمراض
- بتقوي جهاز المناعة وفيها نسب متوسطة من المنجنيز، وفيتامين ب9 والبوتاسيوم
- غنية بالأنثوسيانين وهي نوع من مضادات الأكسدة اللي بتحافظ على صحة القلب
- بتقلل الكوليسترول الضار وضغط الدم المرتفع، وبالتالي بتحسن صحة القلب وبتحميه من الأمراض المزمنة وبتنشط الأوعية الدموية
- غنية بمواد إيلاجيتانينز من 2-11 مرة أكتر عن أنواع الفاكهة والخضار التانية، وهي مضادات أكسدة بتحارب البكتيريا في الجسم وبتقلل خطر الإصابة بالسرطان
- تناولها مع الكربوهيدرات بيبطأ امتصاص السكر في الدم وارتفاع معدل السكر بعدها
- فيتامين سي الموجود فيها بيساعد على إنتاج الكولاجين في البشرة فبيمنع ظهور التجاعيد والخطوط الرفيعة
- مصدر لفيتامين ب9 المهم في المراحل الأولى من الحمل لأنه ضروري في نمو المخ والعمود الفقري للجنين
وصفات مختلفة بالفراولة
الكوكيز
المكونات
- تلت أربع كوباية فراولة مهروسة
- معلقة كبيرة عصير ليمون
- نص كوباية + معلقة كبيرة سكر
- كوبايتين دقيق
- نص كوباية زبدة
- نص معلقة صغيرة بيكنج بودر
- ربع معلقة صغيرة ملح
- نص كوباية زبدة
- ربع كوباية سكر بني
- بيضة
- معلقة صغيرة فانيليا
- 4 معالق جبنة كريمي
- 3 معالق كبيرة سكر بودرة
- معلقة صغيرة قشر ليمون
الطريقة
- اخلط الفراولة وعصير الليمون ومعلقة كبيرة سكر وسيبها 10 دقايق وصفيها
- اخفق الزبدة مع نص كوباية سكر والسكر البني بالمضرب الكهربائي لحد ما يبقى خليط كريمي
- اخلط الدقيق والبيكنج بودر والملح
- ضيف البيض والفانيليا وخليط الدقيق واستمر في الخفق لحد ما تبقى عجينة
- اخفق الجبنة الكريمي مع السكر البودرة وقشر الليمون
- قسم العجينة لكرات صغيرة وافردها وضيف معلقة صغيرة من خليط الجبنة الكريمي ومعلقة صغيرة من الفراولة
- كرر الخطوة السابقة مع باقي العجينة ورص الكوكيز في صينية عليها ورق زبدة
- دخل الصينية الفرن لمدة 18 دقيقة
الفراولة المحشية
المكونات
- كوباية جبنة كريمي
- نص كوباية كريمة
- ربع كوباية سكر بودرة
- نص كيلو حبات فراولة كبيرة
- كوباية بسكويت مطحون خشن
الطريقة
- اخفق الجبنة الكريمي مع الكريمة والسكر البودرة
- شيل قلب الفراولة واستخدم كيس حلواني واحشي الفراولة بخليط الكريمة
- رش البسكويت على سطح الفراولة
الباي
المكونات
- معلقتين كبار نشا
- تلت أربع كوباية سكر
- كوباية مياه
- 4 كوبايات فراولة مقطعة شرايح
- عبوة جيلي بالفراولة
- عجينة باي جاهزة
الطريقة
- افرد العجينة في قالب وخرمها بالشوكة
- غطيها بالفويل واخبزها في الفرن لمدة 8 دقايق وشيل الفويل ورجعها الفرن لمدة 5 دقايق
- اخلط النشا والسكر والمياه وحط الخليط على النار لحد ما يغلي
- ارفع الخليط من على النار وضيف عليه الجيلي وقلب كويس لحد ما يتجانس
- سيب الخليط يبرد لمدة 15 دقيقة
- حط الفراولة على الباي وضيف عليها خليط الجيلي ودخلها التلاجة لمدة 3 ساعات
