المحتويات
العيش السن معروف بسعراته الحرارية القليلة، بينصح بتناوله في الدايت ولمرضى السكري، وكمان فيه كمية ردة أكتر من العيش البلدي، بتساعد على زيادة الإحساس بالشبع، هنقولك فوايده وطرق مختلفة لإعداده.
فوايد العيش السن
- بيحتوي على ألياف مفيدة بتزود إحساس الشبع فبيساعد على فقدان الوزن
- الألياف كمان بتساعد في تحسين حركة الأمعاء وبالتالي تحسين الهضم
- دراسة قالت إن تناوله كمصدر للحبوب الكاملة ارتبط بانخفاض خطر الإصابة بأمراض القلب، والأوعية الدموية، وأمراض القلب التاجية
- مصدر جيد للعناصر الغذائية زي الحديد والبوتاسيوم وفيتامينات ب (الثيامين والريبوفلافين، والنياسين، والفولات) ومضادات الأكسدة
أضراره
- ناس كتير بتعتمد عليه في الدايت لأنه بيساعد على خسارة الوزن أكتر من العيش الأبيض
- فيه كمية كبيرة من الردة بتقلل امتصاص الجسم للكالسيوم فبيسبب هشاشة عظام
- حمض الفيتيك الموجود في الردة بيقلل امتصاص الأملاح المعدنية زي البوتاسيوم وبيأثر على الأعصاب والمعادن زي الحديد فبيسبب أنيميا
- بيسبب إمساك لأن فيه ألياف غير قابلة للذوبان
طريقة عمل العيش السن
المكونات
- كوبايتين دقيق قمح كامل
- معلقة كبيرة خميرة فورية
- كوبايتين ردة
- رشة ملح
- رشة سكر
- مياه للعجن
- نص كوباية ردة (للفرد)
الطريقة
- اخلط الدقيق والسكر والخميرة والملح والردة
- في العجان الكهربائي..ضيف المياه بالتدريج مع العجن لحد ما تبقى عجينة متماسكة
- سيب العجينة تخمر لمدة ساعة
طريقة عمل العيش السن بالكراوية
المكونات
- كوبايتين ردة
- 4 كوبايات دقيق كامل الحبة
- كيسين خميرة فورية
- كوبايتين مياه دافية للعجن
- ربع كوباية سكر بني
- معلقة كبيرة زيت زيتون
- معلقتين صغيرين ملح
- معلقة صغيرة بذور الكراوية
الطريقة
- دوب الخميرة في نص كوباية مياه دافية والسكر البني وقلب لحد ما يدوبوا
- ضيف الزيت والكراوية والملح وباقي كمية المياه
- بالتدريج ضيف الدقيق والردة لحد ما يبقى عجينة مرنة
- رش كمية من الدقيق واعجنها لمدة 8 دقايق وبعد كدة غطي العجينة وسيبها لمدة ساعة
- شكل العجينة في شكل اسطوانات بالحجم المفضل وسيبهم لمدة 30 دقيقة
- رص العيش في صينية ودخله الفرن على درجة حرارة 375 لمدة 25-30 دقيقة
طريقة عمل العيش السن بالزبادي والعسل الأسود
المكونات
- كوبايتين دقيق قمح كامل
- تلتين كوباية ردة
- معلقتين كبار زيت
- كوباية زبادي
- معلقتين كبار عسل أسود
- كوباية مياه دافية
- معلقتين صغيرين ملح
- معلقة صغيرة ونص خميرة فورية
الطريقة
- اخلط المياه والزيت والعسل الأسود والزبادي والخميرة
- ضيف الدقيق بالتدريج والردة وقلب العجينة على سطح مرشوش بالدقيق لحد ما تبقى عجينة لينة
- قسم العجينة لقطعتين عشان تشكل رغيفين
- في صينية مدهونة زيت.. حط الرغيفين ورش كمية من الردة
- غطي العيش بالبلاستيك وسيبها ترتفع في مكان دافي لمدة 30 – 45 دقيقة
- سخن الفرن ودخل الصينية على درجة الحرارة لمدة ساعة ونص على درجة حرارة 200
