المحتويات
فوائد حمص الشام متنوعة لأنه بيجمع بين فوائد الحمص الغني بالفيتامينات والمعادن بجانب القيمة الغذائية في الطماطم والكمون والبصل والتوم خصوصًا إنه بيساعد على التخسيس وبيحسسك بالدفء وبيحتوي على عناصر غذائية بتحميك من بعض الأمراض.
العناصر الغذائية في الحمص
- الدراسات بتقول إن كل 100 جرام حمص فيهم:
- 364 سعر حراري
- 19 جرام بروتين
- 6 جرام دهون
- 61 جرام نشويات
- 17 جرام ألياف
- 100 مليجرام كالسيوم
- 6.12 مليجرام حديد
- 24 مليجرام صوديوم
- 3.6 مليجرام فيتامين ج
فوائد الحمص المتنوعة
- مكونات كتير في الحمص بتحسّن صحة القلب زي الألياف والبوتاسيوم وفيتامين ب والحديد والمغنيسيوم والسيلينيوم
- الدراسات أكدت إن الألياف بتقلل نسب الكوليسترول الضار المسبب الرئيسي لأمراض القلب والأوعية الدموية
- الحمص ضروري للوقاية من أمراض السكر والضغط والعظام والأنيميا وصحة المخ
- بيساعد على امتصاص المعادن وبيعتبر مصدر رئيسي للبروتين النباتي
- غني بمضادات الأكسدة اللي بتقلل فرص الإصابة بالسرطان وممكن تعرف فوائد الحمص بالتفصيل في الرابط ده
حمص الشام والتدفئة
- بيعتبر الحمص مصدر للنشويات المعقدة اللي بتستهلك من الجسم وقت طويل لهضمها وفي نفس الوقت بتوفر التدفئة اللازمة في البرد الشديد
- إضافة بعض المكونات زي الطماطم والبصل والتوم والشطة بتسبب زيادة في إفرازات المعدة اللي بتساعد على هضم الأكل وإحساس الشبع والدفء في الطقس البارد
فوائد حمص الشام المتنوعة
- إضافة الطماطم في كافة أشكالها للحمص بتساعد على زيادة تركز مادة الليكوبين اللي بتقلل فرص الإصابة بالسرطان
- عناصر غذائية متنوعة موجودة في التوم والبصل اللي فيهم مضادات أكسدة بتقوي المناعة وبتحمي الجسم من الإصابة بالالتهابات
- الليمون غني بفيتامين C وبيساعد على الوقاية من أمراض الشتاء زي البرد والأنفلونزا
- الشطة بتنظم إفرازات الهضم وبتحسن أداء الجهاز الهضمي لو تناولتها باعتدال بجانب إنها بتزوّد الحرق وبالتالي بتساعد على فقدان الوزن وفي نفس الوقت بتزوّد الإحساس بالدفء
- بيعتبر من الأطعمة الغنية بالبروتين وبالتالي بيزوّد الإحساس بالشبع وبيقلل الجوع
- الخبراء بيأكدوا إنه بيمنع نمو البكتيريا الضارة في الجهاز الهضمي وبيزوّد فرص نمو البكتيريا النافعة اللي بتحسن عملية الهضم
طريقة إعداد حمص الشام
المكونات
- نص كيلو حمص (حبات كبيرة)
- بصلتين
- 5 فصوص توم
- حبتين طماطم كبار
- ليمونة كبيرة أو اتنين صغيرين
- معلقتين كبار ونص صلصة طماطم
- معلقة صغيرة ونص كمون ومعلقة صغيرة ملح
- شطة (حسب الرغبة)
الطريقة
- انقع الحمص في مياه لمدة 8 أو 12 ساعة
- صفي الحمص وحطه على نار في مياه مغلية (مقدار المياه يكون أكتر من الحمص بكوباية وربع)
- ضيف بصلة مقطعة أربع مع نص معلقة صغيرة كمون وملح
- صفي الحمص من المياه بعد ما يستوي تلت أربع سوى وصفي مياه السلق من البصل وضيف عليها الطماطم والبصلة (مقطعة أرباع) والتوم والصلصة وباقي الكمون على نار متوسطة
- سيب الخليط يغلي لحد ما الطماطم تنفصل عن قشرتها وصفي المياه وضيف عليها الحمص وسيبه على النار لحد ما يستوي وبعدها قدمه في كوبايات وضيف الشطة حسب الرغبة
