المحتويات
الطبخ ليه فوائد لصحة الجسم والحالة النفسية، والدراسات أثبتت إنه بيساعد على التخلص من التوتر وبيزود ثقتك في نفسك، ده غير إنه بيساعدك تلتزم بمكونات أكتر صحية وتتحكم في نسبة الدهون والسعرات وبالتالي الحفاظ على جسمك ووزنك.
فوائد الطبخ للصحة
التخلص من العصبية والضغط النفسي
التجارب أثبتت إن الأشخاص اللي طبيعة عملهم فيها قلق أو ضغط عصبي وبيطبخوا في البيت قلت عندهم معدلات القلق لأنهم بيستخدموا إيديهم في إنجاز شيء معين وده بيكسر الروتين وبيساعد على التخلص من العصبية
الطبخ لزيادة السعادة
الدراسات أثبتت إنه فعل ممكن بيستخدم في العلاج النفسي، فمهما كانت الأكلة بسيطة اتباع خطوات معينة وتذوق النتيجة النهائية بتزود هرمونات المشاعر الجيدة في الجسم
الطبخ لزيادة الثقة في النفس
- عند الطبخ والخبز.. اتباع خطوات ومقادير معينة بيزود ثقتك في نفسك وشعورك بالإنجاز وتحقيق حاجة مفيدة
- الشعور بيزيد عند تذوق الآخرين للحاجة اللي عملتها وإشاداتهم بيها
بيساعد في تقليل أعراض الاكتئاب والمشاكل النفسية
كتير من أماكن العلاج النفسي بتعتمد على فصول طبخ لعلاج مشاكل زي القلق والاكتئاب والإدمان لأن أثناء خطواته الشخص بيركز في تفاصيل معينة وبالتالي دماغه بترتاح من التفكير السلبي والأفكار السيئة اللي بتأثر عليه
الطبخ لتحسين العلاقة الزوجية
- بيساعد على تقوية العلاقة بينكم وقضاء وقت أكتر مع بعض، وبيزود مهارات التواصل والكلام بينكم وبيسبب مشاعر سعادة عند تذوق النتيجة النهائية
- بيساعدك في الحفاظ على صحتك لأن بتختار مكونات الأكل بنفسك والتحكم في كمياتها وده بيساعدك في الحفاظ على صحتك ووزنك وبيضمن جودة الأكلة، وبالتالي بتبعد عن أكل الوجبات الجاهزة والسريعة
- ليه دور في الوقاية من الأمراض اللي ممكن تصاب بيها نتيجة الأكل المتكرر من المطاعم زي جرثومة المعدة أو التسمم
بينمي مهارة إدارة وتنظيم الوقت
تجهيز المكونات والطبخ بيساعدك تدرك قيمة تقسيم الوقت وإدارته بالطريقة المناسبة لروتين حياتك والوقت اللي محتاجه لتجهيز الأكل نفسه وبالتالي مع الوقت حكمك على الأشياء والوقت اللي بتحتاجه بيكون أكتر دقة
حيل تسهل بيها الطبخ
في خطوات بسيطة ممكن تعملها عشان تسهل الطبخ على نفسك مع الوقت، زي:
- افرم توم وبصل واحفظهم في برطمانات زجاج بكميات مناسبة لاستخدامك الأسبوعي
- اعمل جدول للأكلات اللي هتعملها على مدار الأسبوع عشان تسهل عليك التجهيزات فمثلا لو هتعمل خضار سوتيه في يوم.. اغسل الخضار وقطعه وصفيه كويس واحفظه في كيس حفظ الطعام
- قطع شرايح أو مكعبات بصل بأحجام مختلفة واحفظهم في علب عشان تستخدمهم على طول
- اعمل صلصة طماطم كافية لأكتر من أكلة واحفظها في برطمان محكم عشان تستخدمها في المكرونة/ البامية/ اللازانيا
- لو بتستخدم صوصات معينة زي صوص البيستو باستمرار.. جهزه واحفظه في برطمان محكم
- خلي دايما تلاجتك مترتبة واحفظ الطعام حسب أولوية استخدامه
- اغسل الخضار الورقي وصفيه كويس جدا واحفظه بالطريقة المناسبة ليه عشان يكون جاهز للاستخدام فمثلا لو بتستخدم الخس كتير.. اغسل ورقه وقطعه بالحجم المناسب وصفيه كويس واحفظه على مناديل المطبخ داخل علبة محكمة
- لو هتستخدم مياه ساخنة أو مغلية.. اغليها الأول في الغلاية وبعدين سيبها تسخن على النار
- جهز الأعشاب على الاستخدام على طول فمثلا لو عايزها مجففة.. جففها في البيت واحفظها في برطمان محكم
- أو ممكن تغلسها وتضيف لها زيت الزيتون في برطمان عشان تحتفظ بيها مدة أطول طازة
- علق سبورة صغيرة على التلاجة عشان تكتب عليها الطلبات الناقصة أول بأول
- جهز تتبيلة السمك/ الفراخ/ اللحمة في برطمانات زجاج واحفظها في التلاجة عشان توفر الوقت
- في أكلات معينة ممكن تحفظها مستوية زي البامية/ الفاصوليا/ البروكلي بس مهم تستخدم برطمانات زجاج محكمة
- خصص ركن في المطبخ للأدوات اللي بتستخدمها بشكل متكرر زي قشارة البطاطس/ طقم السكاكين
- جمد بواقي الشوربة في صينية مكعبات التلج عشان تستخدمهم حسب الحاجة بعد كده
- اعصر الليمون في زجاجة أو ممكن تحفظه سليم في الفريزر وتخرجه قبل الاستخدام بنص ساعة
