فرش المكياج: أنواعها واستخداماتها وطريقة تنضيفها

فرش المكياج متنوعة وأشكالها مختلفة حسب استخدام كل نوع منها، هنقدملك دليل شامل لكل نوع وطريقة استخدامه الصحيحة عشان وضع المكياج يكون أسهل.

فرشة المكياج المائلة

• بتستخدم في ملء الحواجب والفراغات لأن أطرافها فيها زاوية مايلة وبالتالي سهولة تغطيتهم
• ممكن تستخدميها لوضع الآيلاينر الجل

فرشة البودرة

• موجودة في أحجام كبيرة وصغيرة وبتستخدم في وضع البودرة المضغوطة أو السائبة على الوجه بعد الفاونديشن
• استخدامها بيكون أسهل في حالة توزيع البودرة من منتصف الوجه للخارج
• ممكن تستخدميها لوضع الـBlush

فرشة الفاونديشن

• بتساعدك على الوصول للتغطية المثالية للفاونديشن
• غير مناسبة لكل أنواع الفاونديشن ولكنها مناسبة للنوع السايل
• بعش الأشخاص ممكن يوزعوا الفاونديشن باستخدام أصابعهم أو البيوتي بلندر والفرشة تكون للخطوة الأخيرة

فرشة الآي شادو

شعيراتها مسطحة ورفيعة وبالتالي بتساعد على وضع برايمر العين والآي شادو بسهولة

فرشة دمج اللون

• بتستخدم في دمج ألوان الآي شادو
• كل ما كان طرفها أكبر ومدور.. زادت درجة دمج الألوان وشكله الناعم
• في منها نوع إسفنجي وممكن تستخدميها في دمج الفاونديشن عند حدود الوجه على خط الشعر

الـCrease Brush

• فرشة تانية للآي شادو ولكنها رفيعة ومائلة
• بتستخدم للخطوط أو الأماكن فوق العين الأكتر دقة أو هتساعدك في تحديد الألوان في حالة وضع أكتر من لون على جفن العين
• مناسبة لوضع لون تاني للآي شادو غير اللون الأساسي

فرشة الكونتور

• مسطحة ومايلة وبالتالي أسهل لنحت شكل الوجه والانحناءات اللي فيه بشكل طبيعي
• ممكن تستخدميها في وضع البرونزر على الوجه والرقبة والأكتاف

فرشة الـBlush

• في منها شكلين.. شكل مدور مناسبة لوضع الـBlush
• والشكل التاني مائل مناسب لتحديد شكل الـBlush أكتر أو لوضع البرونزر على عضمتين الوجه لتحديدهم

فرشة الآيلاينر

طرفها رفيع جدا عشان تكون مناسبة لوضع الآيلاينر السايل بشكل محدد وسهل

فرشة الشفايف

• بتستخدم في وضع الروج خاصة للسيدات اللي شفايفهم رفيعة أو صغيرة لتقليل فرص تلطيخه
• مناسبة لوضع ملمع الشفايف كطبقة تانية

فرشة تحديد الشفايف

طرفها بيكون أرفع من فرشة الشفايف لأنها بتستخدم في وضع محدد الشفايف البودرة أو السايل

فرشة الحواجب

• عبارة عن فرشة ليها ناحيتنين.. الناحية الأولى عبارة عن فرشة رفيعة ومستقيمة والتانية مشط صغير
• بتستخدم في تسريح وتهذيب شكل الحواجب وممكن تستخدميها في التخلص من بودرة الحواجب الزايدة
• في شكل تاني منها فيه ناحية مخصصة لوضع بودرة الحواجب

فرشة الماسكارا والحواجب

• من أهم أشكال فرش المكياج خاصة في الاستخدام اليومي
• بتساعد في تسريح الحواجب شكلها يكون طبيعي أكتر
• ممكن تستخدمي نفس الفرشة للرموش والحواجب لتتقيلها

البيوتي بلندر

• بتستخدم لوضع الفاونديشن السايل والمضغوط والكونسيلر
• بتساعد على توزيع شكل المنتج اللي بتحطيه وتوحيد شكله
• بلليها بسيط قبل الاستخدام وتخلصي من المياه الزايدة فيها عشان تمزجي الفاونديشن بالطريقة الصحيحة عن طريق الحركات الدائرية اللي فيها طبطبة على الوجه لتجنب امتصاصها للمكياج
• ممكن تستخدمي طرفها الرفيع لوضع الكونسيلر أو الفاونديشن على الأماكن الصغيرة في الوجه
• طرفها مناسبة لوضع الهايلايتر على عضمتين الوجه أو أسفل الرقبة

الـFan Brush

• بتستخدم في وضع الهايلايتر أو البرونزر على عضمتين الوجه
• أو للتخلص من زيادات المكياج على الوجه، فمثلا لو زودتي كمية الآي شادو على جفن العين ممكن تستخدميها للتخلص من الزيادات

فرشة الكونسيلر

• في منها أحجام مختلفة لكن شعيراتها بتكون شديدة بسيط وكثيفة
• بتستخدم في وضع الكونسيلر السايل خاصة أسفل العين

فرشة الـStippling

• ليها أكتر من استخدام، بسبب اختلاف طول شعيراتها وكثافتها فهي مناسبة لوضع أكتر من طبقة مكياج
• ممكن تستخدميها لوضع البرايمر والفاونديشن والـBlush
• مناسبة لوضع البودرة لكنها أسهل في الاستخدام مع المنتجات السايلة
• وزعي المنتج بيها عن طريق الحركات الدائرية لضغط الفرشة على وجهك وبعدين وزعيه المنتج بضغط أقل بسيط على كل الوجه

فرشة الكابوكي

• ليها أكتر من استخدام لأن شعيراتها متماسكة وليها أكتر من حجم
• مناسبة لوضع البودرة السائبة على الوجه والجسم عن طريق تحريكها في حركات دائرية كبيرة
• أو لوضع الفاونديشن والـBlush عن طريق توزيع المنتج اللي فيها بحركات طبطبة بسيطة على الوجه وبعدين توزيعه بحركات دائرية

فرش المكياج الأهم

بالرغم من اختلاف أنواع وأشكال فرش المكياج إلا إنها غير مناسبة لكل الأشخاص خاصة المبتدئين في تعلمه، ودي قائمة بأهم الفرش اللي هتحتاجيها بشكل دوري:

 الآي شادو المسطحة

 الـCrease

 الحواجب

 الكونسيلر

البيوتي بلندر

 الفاونديشن/Blush/البرونزر

 الشفايف

 الكونسيلر

طرق تنضيف فرش المكياج

مهم تنضفيها بشكل مستمر لأن تراكم المكياج بيسبب البكتيريا اللي بتتنقل للوجه وبتسبب ظهور مشاكل جلدية وأنواع مختلفة من العدوى، فمهم:

• تغسلي فرش البودر والبلاشر مرة أو مرتين في الاسبوع
• فرش الميكاب السائل زي الفونديشن والكونسيلر لازم تتغسل بعد كل استخدام
•  استخدمي معلقة صغيرة من شامبو الأطفال مع مياه دافية وحركي الفرشة في المياه لحد ما تتخلصي من بواقي المكياج
•  افركي الفرشة على بطن ايدك لحد ما تتأكدي إنها نضيفة
•  ممكن تستخدمي الخل بدل الشامبو
•  اشطفي الفرش كويس بعد الغسل وسيبيها تنشف
•  البيوتي البلندر أو إسفنجة المكياج ممكن تنضفهيا عن طريق نقعها في مياه وكمية بسيطة من ملطف الهدوم
•   نضفي الروج بأنواعه والإيلاينر والكحل بمناديل وكحول