المحتويات
عقدة اوديب مصطلح ظهر على إيد فرويد سنة 1899 وبيدل على انجذاب الطفل الذكر لأمه والغيرة الشديدة من الأب وبتظهر وقت التطور الجنسي للطفل، ودراسات كتير بتقول إنها بتحصل لبعض الأطفال بشكل طبيعي وممكن تظهر في علامات بسيطة بدون أعراض قوية ملموسة
شرح عقدة أوديب
- هو مصطلح بيستخدم في التطور النفسي الجنسي لفرويد وبيوحي المصطلح بغيرة الطفل الذكر من أبوه وتعلقه العاطفي والجنسي بأمه
- بيحس الطفل بالمنافسة الشديدة مع الأب لجذب انتباه الأم والحالة دي بتحصل عند الطفل سواء ذكر أو انثي
- بتسمى بحالة عقدة أوديب (للأطفال الذكور) وعقدة إلكترا (للإناث) لما بيحسوا بالغيرة تجاه أمهم وبيحبوا يجذبوا انتباه الأب
- حسب النظرية فالمشاعر الجنسية من الطفل تجاه أحد الأبوين طبيعية في التطور الجنسي للطفل لأنها رغبات مكبوتة وغير واعية خصوصًا لأنهم النموذج اللي بيشوفوه لأطول وقت ممكن
أصل تسمية عقد اوديب
- اتسمت بسبب مسرحية اسمها (أوديب ملكًا) كتبها الكاتب اليوناني سوفوكليس وبتحكي عن قصة ابن ملك اتربى بعيد عنّه وخلال الأحداث بيقتل أبوه وبيتزوج من أمه
مراحل التطور الجنسي عند فرويد
- المرحلة الفموية بتبدأ من وقت الولادة حتى سن 18 شهر ووقتها مصدر المتعة بيبقى الفم في ممارسات زي اللعق والمضغ والعض
- المرحلة شرجية من سن 18 شهر حتى 3 سنوات وبتظهر المتعة في طرد الفضلات وتطور بعض العادات الصحية لاستخدام المرحاض والتدريب على التحكم في الإخراج
- المرحلة القضيبية وبتحصل من سن 3 سنوات لـ 5 سنوات وبتظهر في شكل بعض المشاعر الجنسية اللي بتظهر من الطفل الذكر تجاه الأم (وهي المرحلة الأساسية اللي بتظهر فيها عقدة أوديب)
- من سن 5 سنوات حتى 12 سنة بتبدأ مرحلة الكمون ووقتها بتختفي المشاعر الجنسية تجاه الأم
أعراض عقدة اوديب
- الأعراض في أغلب الأوقات غير ملحوظة وبتظهر أحيانًا في أغلب الأشكال بطريقة مش ظاهرة للأهل لكن بعض الأعراض ممكن تبقى ملحوظة زي:
- رغبة الطفل في استمرار غياب والده أطول فترة ممكنة
- تصريح الطفل المستمر بالرغبة في الزواج من والدته
- إصرار الطفل على النوم بين الأبوين وتحديدًا جنب الأم والالتصاق المستمر فيها
- غيرة الطفل الشديدة وقت اقتراب الأب من الأم أو حدوث أي تلامس ولو طبيعي بينهم
علاج عقدة أوديب
- استشارة طبيب نفسي متخصص في علم نفس الأطفال ضروري لفهم الموقف وطريقة احتوائه
- عوّد طفلك ينام لوحده عن طريق بعض الخطوات زي:
- كلمه عن مميزات النوم لوحده وإنه هيكون شخص شجاع ومستقل وعنده أوضة خاصة
- تجنب العصبية واتعامل معاه بهدوء عشان ماتزودش خوفه وتوتره لو عمل كده بالإجبار
- خليه يحب أوضته وحسسه إنه صاحبها ومتحكم في كل حاجة فيها
- فهمه إن كل واحد عنده أوضة خاصة بيه ودي أوضته
- عوده يقعد يلعب فيها لوحده فترة عشان يتغلب على مشكلة أنه يكون فيها لوحده
- في الأول ادخل معاه وافضل جنبه لحد ما ينام
- لو بيخاف من الضلمة وفرله ضوء خفيف وقت النوم
- اسأله لو بتقابله مشاكل في النوم وطمنه وحاول تحلها وتهيأله الجو المريح فيها
