طريقة عمل الكريب: العجينة وحشوات مختلفة

الكريب من المعجنات السهلة في تحضيرها ولذيذة، بيحبها معظم أفراد الأسرة وخاصة الأطفال، وممكن يكون حادق من خلال إضافة حشو بأنواع مختلفة سواء الجبن أو البانيه أو الشاورمة أو البطاطس المحمرة، أو حلو بالفاكهة أو صوص الشوكولاتة، تقدر تخليه وجبة غداء أو عشاء وممكن يكون حلو للضيوف، هنقولك طريقة عمل الكريب في البيت بطرق مختلفة وسهلة مع حشوات حادقة وحلوة جديدة.

طريقة عمل الكريب

العجينة الحادقة 

المكونات 

• كوباية ونص دقيق
• ربع معلقة صغيرة ملح
• رشة فلفل أسود
• معلقة كبيرة ملح
• نص كوباية لبن حليب
• نص كوباية مياه
• بيضة

الطريقة 

• اخلط كل المكونات وقلب كويس لحد ما تتجانس مع بعضها وتبقى عجينة سايلة
• سخن طاسة مدهونة بالزيت.. حط كمية من العجينة ووزعها على الطاسة
• اقلب الكريب على الجنب التاني بعد ما يحمر ويستوي

العجينة الحلوة 

المكونات 

• كوبايتين لبن حليب
• كوباية ونص دقيق
• معلقة كبيرة سكر
• معلقة كبيرة فانيليا
• 2 بيض
• معلقة صغيرة قشر ليمون

الطريقة 

• اخفق البيض مع الفانيليا وقشر الليمون المبشور
• ضيف اللبن وبعدين الدقيق بالتدريج عشان ميكلكعش
• قلب الخليط كويس لحد ما يبقى عجينة متماسكة
• سخن طاسة مدهونة بالزيت.. حط كمية من العجينة ووزعها على الطاسة
• اقلب الكريب على الجنب التاني بعد ما يحمر ويستوي

العجينة من غير بيض 

المكونات 

• كوباية دقيق
• كوباية لبن حليب دافية
• 3 معالق كبار زبدة
• معلقة صغيرة سكر/ ملح (حسب نوع الحشو)
• رشة فانيليا أو رشة فلفل أسود (حسب نوع الحشو)

الطريقة 

• اخلط الدقيق مع كميات الملح أو السكر مع الفانيليا أو الفلفل الأسود
• ضيف اللبن والزبدة واخلط المكونات كويس لحد ما تتجانس ويبقى عجينة سايلة
• سخن طاسة مدهونة بالزيت.. حط كمية من العجينة ووزعها على الطاسة
• اقلب الكريب على الجنب التاني بعد ما يحمر ويستوي

طريقة عمل حشوات حادقة للكريب 

حشوة الدجاج والسبانخ

المكونات

• نص كيلو فراخ مخلية مقطعة شرايح
• كوبايتين أوراق سبانخ
• نص حبة بصل مفرومة
• معلقتين كبار زيت زيتون
• فصين توم مفروم
• ملح وفلفل أسود
• 3 معالق كبار دقيق
• نص كوباية جبنة بارميزان
• كوباية ونص لبن حليب

الطريقة

• شوح البصل في الزيت لحد ما يبقى طري وضيف شرايح الفراخ والتوم
• بعد ما تدخل الفراخ في السوى.. تبل بالملح والفلفل الأسود
• ضيف الدقيق وقلب عشان يتجانس مع المكونات وضيف اللبن بالتدريج
• بعد ما الخليط يغلي ويبدأ يتقل.. ضيف الجبنة البارميزان
• على شريحة الكريب.. ضيف كمية من أوراق السبانخ وعليها الفراخ
• اقفل الكريب بالطريقة اللي تفضلها (رول أو مثلث)
• ممكن تضيف كمية موتزاريلا أو جبنة رومي مبشورة

حشوة السجق الكريمي

المكونات

• نص كيلو سجق
• ربع كوباية بصل مقطعة صغير
• نص كوباية جبنة كريمي
• ربع كوباية زبدة
• نص كوباية شيدر
• ملح وفلفل أسود
• نص كوباية كريمة طبخ

الطريقة

• شوح السجق مع البصل وضيف الجبن والكريمة وقلب لحد ما الجبنة الشيدر تسيح والمكونات تتجانس
• تبل بالملح والفلفل الأسود وارفع الخليط من على النار
• على شريحة الكريب.. ضيف كمية خليط السجق
• اقفل الكريب بالطريقة اللي تفضلها (رول أو مثلث)
• ممكن تضيف كمية موتزاريلا أو جبنة رومي مبشورة

حشوة اللحمة بالمشروم

المكونات

• نص كيلو شرايح لحم بقري
• كوباية مشروم مقطع شرايح
• معلقة كبيرة زيت زيتون
• معلقتين كبار زبدة
• فص توم مفروم
• رشة جوزة الطيب
• ملح وفلفل أسود
• معلقة كبيرة سكر بني
• معلقتين كبار خل بلسمي
• نص كوباية جبنة ريكفورد

الطريقة

• اخلط الخل والسكر البني على النار وسيبه يغلي لمدة 10 دقايق لحد ما يتقل
• افرك شرايح اللحمة بالملح والفلفل الأسود وزيت الزيتون وشوحها على نار عالية لحد ما توصل لدرجة السوى المفضلة
• في نفس الطاسة.. سيح الزبدة وشوح المشروم والجبنة الريكفورد وضيف جوزة الطيب والملح والفلفل الأسود
• على شريحة الكريب.. ضيف كمية اللحمة وخليط المشروم وعليهم خليط الخل البلسميك
• اقفل الكريب بالطريقة اللي تفضلها (رول أو مثلث)

طريقة عمل حشوات حلوة للكريب

حشو صلصة الفاكهة

المكونات

• 2 حبة تفاح
• كوباية وربع فراولة مقطعة صغير
• علبة كمبوت خوخ أو 2 فريش
• 2 حبة كيويتلتين كوباية مربى (تفاح/ فراولة)

الطريقة

• قطع التفاح والكيوي مكعبات صغيرة وضيف عليهم الفراولة
• ضيف المربى وقلب كويس لحد ما يبقى خليط متجانس
• حط الخليط في التلاجة لمدة 30 دقيقة
• على شريحة الكريب.. ضيف كمية من صلصة الفاكهة
• اقفل الكريب على شكل مثلث
• ممكن تزين الكريب بصوص كراميل

حشوة التفاح والقرفة

المكونات 

• 3 حبات تفاح مقشرة ومقطعة مكعبات
• 3 معالق كبار سكر بني
• معلقة صغيرة قرفة
• معلقة صغيرة زبدة

الطريقة 

• سيح الزبدة على نار متوسطة وضيف السكر البني وقلب لحد ما يدوب وضيف التفاح والقرفة
• قلب لمدة 15 دقيقة لحد مايبقى التفاح طري
• على شريحة الكريب.. ضيف كمية من صلصة الفاكهة
• اقفل الكريب على شكل مثلث
• ممكن تزين الكريب بصوص كراميل أو سكر بودرة أو كريم شانتيه