الكحك/الكعك والبسكويت والغريبة والبيتي فور هي الحلويات اللي بتمثل أهم طقس من طقوس عيد الفطر المبارك، كل منتج منهم ليه طريقته لكن بشكل عام الدقيق والزبدة أو السمنة مكون أساسي فيهم كلهم. الكحك ممكن يتحشي بحشوات مختلفة، سواء مكسرات أو ملبن أو عجوة، البسكويت كمان ليه أنواع كتيرة زي السادة والبرتقال وغيرهم، لكن ناس كتير بتواجهها مشكلة زيادة السعرات الحرارية في الكحك والبسكويت، خصوصا اللي بيعانوا من السمنة أو بيعملوا دايت، الوصفة دي هتخليك تعمل كحك وبسكويت دايت بسعرات حرارية قليلة.

الكحك

مكونات الكحك

3 معالق كبار مياه مغلية (25جم)

معلقة صغيرة ممسوحة خميرة

معلقة صغيرة عسل أبيض

معلقة صغيرة ريحة كحك

معلقتين كبار سمسم محمص

كوبايتين ونص دقيق شوفان (250 جم)

 أو طحن حبوب الشوفان كويس جدا في البيت

نص كوباية سمنة مقدوحة

سكر بودرة دايت للتزيين

 طريقة عمل الكحك

1- حطي الخميرة على المياه وبعدين العسل وقلبيهم كويس

2- حطي الدقيق في بولة كبيرة وبعدين السمسم وريحة الكحك

3- زودي عليهم السمنة وهي مغلية وقلبيهم كويس

4- ضيفي خليط الخميرة والمياه والعسل تدريجيا مع الدقيق

5- شكلي الكحك في صينية فيها ورقة زبدة

6- دخليه الفرن على درجة حرارة 190

7- لما يحمر.. زينيه بسكر البودرة

البسكويت

مكونات البسكويت

¾ كوباية ردة ناعمة

نص كوباية دقيق حبة كاملة

نص كوباية شوفان

معلقتين كبار جنين قمح مطحون

معلقة كبيرة دقيق ذرة أصفر خشن

بيضة

200 جم زبدة

نص معلقة صغيرة فانيليا

معلقتين كبار سكر دايت

معلقة كبيرة عسل

تلت كوباية لبن خالي الدسم

معلقة كبيرة بيكنج باودر

¼ معلقة صغيرة ملح

3 معالق كبيرة قرفة مطحونة

رشة جنزبيل مطحون 

طريقة عمل البسكويت

1- اخلطي كل المكونات الجافة وبعدين ضيفي الزبدة وقلبي

2- ضيفي اللبن والبيض والفانيليا واعجنيها لحد ما تتماسك

3- شكلي البسكويت ورصيه في صينية مدهونة ردة أو دقيق حبة كاملة ودخليه الفرن سخن

4- بياخد من 10 دقايق لربع ساعة ولونه مش بيتغير أوي