المحتويات
الكانيلوني من الوصفات السريعة وسهلة التحضير، ممكن تنقذك في يوم لو زهقان من الأكل، لأنها خفيفة وشهية، ممكن تعملها بحشوة اللحمة المفرومة التقليدية والبشاميل أو الفراخ أو الخضار، وتكون صحية خاصة لأطفالك، هنقولك طريقة عمل الكانيلوني بطريقة سهلة وبسيطة.
المكونات
العجينة
- كوباية ونص دقيق
- نص كوباية لبن
- 4 بيضات
- ربع معلقة صغيرة فلفل أسود
- معلقتين كبار زيت
- رشة ملح
الحشوة
- نص كيلو لحمة مفرومة
- 2 بصلة صغيرة مفروم
- ملح وفلفل أسود
- معلقة كبيرة سمنة
- رشة جوزة الطيب
للتزيين
- 3 معالق كبار صلصة
- معلقة كبيرة زيت
- كوباية ونص جبنة موتزاريلا
- نص كوباية جبنة شيدر مبشورة
طريقة عمل الكانيلوني
- اخلط الدقيق مع البيض واللبن والملح والفلفل الأسود والزيت كويس بالمضرب اليدوي
- سخن الزيت وضيف اللحمة المفروم والبصل والملح والفلفل الأسود وجوزة الطيب
- قلب اللحمة لحد ما يبقى لونها بني وتستوي
- في طاسة غير قابلة للالتصاق.. ضيف مقدار (مغرفتين) من العجينة وافردها في الطاسة
- سيبها على نار متوسطة لحد ما تظهر فقاعات صغيرة ويبقى لونها دهبي واقلبها على الجنب التاني لمدة دقيقة
- كرر الخطوتين السابقين مع باقي كمية العجينة
- افرد شريحة من الكانيلوني.. وضيف كمية حشو اللحمة المفرومة ولفها في شكل أسطواني
- رص الكانيلوني في صينية بايركس مدهونة بسمن أو زيت
- اخلط الصلصة مع الزيت ووزعها على الكانيلوني
- وزع الجبنة على الكانيلوني ودخل الصينية الفرن لمدة 10 – 15 دقيقة لحد ما الجبنة تسيح
طريقة عمل الكانيلوني بحشوة الفراخ
المكونات
- نص كيلو صدور فراخ
- بصلة مبشورة
- كوباية مشروم مفروم
- معلقة كبيرة زيت زيتون
- ملح وفلفل أسود
- كوباية جبنة موتزريلا
الطريقة
- قطع صدور الفراخ لقطع صغيرة جدا
- سخن زيت الزيتون وشوح البصلة لحد ما تصفر
- ضيف الفراخ وقلب كويس لمدة 5 دقايق
- ضيف المشروم وقلب الخليط مع بعض على نار متوسطة لمدة 10 دقايق
- تبل بالملح والفلفل الأسود
- احشي شرايح عجينة الكانيلوني بكمية مناسبة من الحشوة ولفها بشكل أسطواني
- وزع الجبنة الموتزاريلا على الكانيلوني ودخله الفرن لمدة 15 دقيقة
طريقة عمل الكانيلوني بحشوة السبانخ
المكونات
- نص كيلو أوراق سبانخ مسلوقة مقطعة صغير
- كوباية جبنة موتزاريلا
- كوباية جبنة فيتا/ ريكوتا
- معلقتين كبار بصل أخصر مفروم
- معلقة كبيرة عين جمل مفروم
الطريقة
- اخلط السبانخ مع الجبنة الريكوتا/ الفيتا والموتزاريلا والبصل الأخضر وعين الجمل
- ممكن تزود ملح وفلفل أسود (حسب الرغبة)
- احشي شرايح عجينة الكانيلوني بكمية مناسبة وضيف عليها بشاميل خفيف وكمية جبنة موتزاريلا ودخلها الفرن لمدة 15 دقيقة
