طريقة عمل العيش بأنواعه المختلفة

العيش بيدخل في كل وجباتنا اليومية، ويعتبر من الأطعمة الأساسية على سفرة معظم المطابخ العالمية، وكمان مصدر ممتاز للطاقة لأنه بيحتوي على الكربوهيدرات سريعة الهضم،  وحمض الفوليك وفيتامينات ب، في المطابخ العالمية فيه مئات الأنواع، بنقدم لك طريقة عمل العيش بأنواع مختلفة.

طريقة عمل العيش الفينو

المكونات

• 3 كوبايات دقيق (مخبوزات)
  
• معلقة كبيرة خميرة فورية
  
• معلقة كبيرة بيكنج بودر
  
• معلقتين كبار سكر
  
• رشة ملح
  
• ربع كوباية زيت
  
• نص كوباية لبن بودرة
• مياه (للعجن)

الطريقة

• اخلط الدقيق مع الخميرة والسكر والملح واللبن البودرة والبيكنج بودر
• ضيف الزيت والمياه بالتدريج وقلب المكونات لحد ما تكون العجينة ناعمة (بإيدك أو بالعجان الكهربائي)
• سيب العجينة تتخمر لمدة ساعة
• قسم العجينة كرات متوسطة بنفس الحجم 
• شكل كرات العجينة لشكل بيضاوي/اسطواني وحطها في صينية مدهونة زيت
• دخل العيش الفرن على درجة حرارة 180 لحد ما يحمر

طريقة عمل العيش البلدي

المكونات

• 3 كوبايات دقيق
  
• معلقة صغيرة خميرة فورية
  
• رشة ملح
  
• رشة سكر
  
• نص كوباية ردة (للفرد)
  
• مياه للعجن
  

الطريقة

• اخلط الدقيق مع الخميرة والملح والسكر
• ضيف المياه للدقيق بالتدريج مع التقليب
• استمر في العجن لحد ما تبقى متماسكة
• رش في طبق ردة وحط العجينة ورش ردة عليها من فوق
• سيب العجينة تخمر لمدة ساعة
• قسم العجينة كرات متوسطة نفس الحجم
• رش شوية من الردة وافرد عليها كرات العجينة لحجم متوسط
•  في طاسة تيفال سخنة.. حط العجينة وقلب على الناحية التانية لحد ما تستوي

طريقة عمل العيش السن

المكونات

• كوبايتين دقيق
  
• معلقة كبيرة خميرة فورية
  
• كوبايتين ردة
• رشة ملح
  
• رشة سكر
  
• ماء للعجن
• نص كوباية ردة (للفرد)

الطريقة

•  اخلط الدقيق والسكر والخميرة والملح والردة
• في العجان الكهربائي..ضيف المياه بالتدريج مع العجن لحد ما تبقى عجينة متماسكة
• سيب العجينة تخمر لمدة ساعة 
• شكل العجينة كرات نفس الحجم وافردها
• سخن طاسة تيفال..حط عليها العيش وقلبه على الناحية التانية لحد ما يستوي

طريقة عمل عيش التورتيلا

المكونات

• كوبايتين دقيق
  
• معلقة كبيرة زبدة سايحة
  
• رشة ملح
  
• مياه للعجن

الطريقة

• اخلط الدقيق مع رشة الملح 
•  ضيف الزبدة على الدقيق في العجان الكهربائي
•  ضيف مياه بالتدريج وكمل عجن لحد ما الخليط يبقى عجينة متماسكة
• قسم العجينة لكرات متساوية وافردها 
•  سوي العيش في طاسة تيفال سخنة على النار لحد ما يستوي

طريقة عمل العيش البتاو الصعيدي

المكونات

• نص كيلو
• معلقة كبيرة خميرة فورية
• نص كيلو دقيق درة
• رشة ملح
• نص كيلو دقيق أبيض
• مياه للعجن

الطريقة

• اخلط دقيق الدرة مع الدقيق الأبيض والملح والخميرة 
• ضيف مياه بالتدريج على العجينة في العجان الكهربائي
• العجينة لازم تكون سايلة شوية وسيبها في مكان دافي عشان تختمر لمدة ساعتين
•  حط كمية بالمغرفة في صينية رفيعة ودخله فى الفرن لحد ما يستوي
•  كرر الخطوة لحد ما العجينة تخلص

الباجيت الفرنسي

المكونات

• 3 كوبايات ونص دقيق مخبوزات   
• معلقة صغيرة ملح 
• معلقتين كبار سكر
• كوباية ونص مياه سخنة
• معلقتين كبار خميرة فورية 
• نص كوباية مياه فاترة 

الطريقة

• اخلط الدقيق والملح والسكر والخميرة في العجان الكهربائي
• ضيف المياه السخنة بالتدريج على سرعة متوسطة
• استمر في العجن لحد ما الخليط يبقى عجينة ناعمة ومتماسكة 
• قسم العجينة نصين متساويين وحطها في صينية فيها دقيق
• غطي العجينة بفوطة وسيبها تخمر ساعتين
• اعجن كل جزء مرة تانية وسيبها تتخمر تاني نص ساعة
• اخلط السكر مع المياه الفاترة 
• شكل العجينة على شكل بيضاوي (زي رغيف الفينو الكبير)
• ادهن العيش بخليط السكر بالفرشة
•  دخله الفرن على درجة 180 درجة لمدة 20 دقيقة

طريقة عمل العيش الصاج السوري

المكونات

• 3 كوبايات دقيق
• 3 معالق صغيرة سكر
• معلقة صغيرة بيكينج بودر
• رشة ملح
• معلقة كبيرة خميرة فورية
• ربع كوباية زيت
• نص كوباية لبن حليب دافي
• تلت أربع كوباية مياه دافية

الطريقة

•  اخلط الدقيق مع الخميرة والسكر والبيكنج بودر والملح
•  ضيف الزيت وقلب كويس وضيف اللبن واستمر في التقليب
•  بعد ما تتجانس المكونات..اعجن بالمياه الدافية لحد ما تبقى عجينة ناعمة ومتماسكة
•  غطي العجينة وسيبها تتخمر نص ساعة
•  قسم العجينة كرات متوسطة الحجم
• رش الرخامة بالدقيق وافرد العجينة بالنشابة لحد ما تبقى رفيعة
• في طاسة تيفال سخنة.. حط رقايق العيش
• لما يتنفخ العيش اقلبه الناحية التانية وكرر لحد ما الكمية تخلص
• ممكن تحتفظ به في الفريزر وتستخدمه كل ما تحتاج

طريقة عمل عيش الصودا الأيرلندي

المكونات

• 4 كوبايات دقيق مخبوزات
  
• معلقة صغيرة ملح
• كوبايتين لبن حليب
• معلقة ونص كبيرة بذور كراوية
  
• نص كوباية زبدة بدرجة حرارة المطبخ
  
• معلقتين صغيرين بيكربونات صودا
  
• معلقة صغيرة خل
  

الطريقة

• اخلط الدقيق مع بيكربونات الصودا والملح ومعلقة بذور كراوية
• افرك كمية الزبدة مع الدقيق
•  اعمل حفرة في الدقيق وضيف اللبن والخل
•  اعجن الخليط كويس لمدة 10 دقايق
• شكل العجينة دايرة وقطع سطحها بالسكينة ورش الباقي من بذور الكراوية
• حطها قي صينية ودخلها الفرن على درجة حرارة 180 لمدة 25 دقيقة