المحتويات
السينابون من أشهر أنواع الحلويات الأمريكية، نكهتها وريحة القرفة أهم ميزة لها، بتحتاج لخطوات دقيقة لكن سهلة لتحضيره في البيت.. بنقدم لك طريقة عمل السينابون في البيت بالخطوات وبطريقة سهلة.
المكونات
العجينة
- كوبايتين وربع قيق
- معلقة كبيرة خميرة فورية
- تلت كوباية سمنة نباتي
- نص كوباية سكر
- معلقة صغيرة ملح
- بيضتين
- كوباية لبن
الحشو
- نص كوباية سكر بني
- معلقتين كبار قرفة
الصوص
- كوباية سكر
- نص كوباية جبنة كريمي
- معلقة صغيرة فانيليا
- نص كوباية زبدة
- نص معلقة صغيرة عصير ليمون
طريقة عمل السينابون
- اخلط الخميرة مع السكر واللبن الدافي وسيبها 10 دقايق
- اضرب السمنة مع البيض
- ضيف الدقيق لخليط البيض والسمنة بالتدريج
- ضيف الخميرة وقلب كويس لحد ما يبقى عجينة متماسكة
- ممكن تزود دقيق لو احتاجت
- شكل العجينة لكرات حجمها متساوي وغطيها
- سيب العجينة لمدة ساعة أو 2 لحد ما تتخمر
- شغل الفرن 10 دقايق واطفيه وحط كرات العجين جواه
- اخلط السكر البني مع القرفة
- اخلط الجبنة مع الزبدة لمدة 4 دقايق وبعدين حط السكر
- اضرب الخليط بمضرب البيض لمدة 3 دقايق
- ضيف الفانيليا والليمون واضربهم دقيقة
- افرد العجينة بسُمك 1 سم
- افرد معلقة سمنة على العجينة ووزع خليط السكر والقرفة
- لف العجينة على شكل رول واقفل الطرف بالسمنة
- بسكينة حامية.. قطع الرول بالتساوي
- رص العجينة على ورق زبدة وسيبه نص ساعة
- دخله الفرن على درجة 200 لمدة 10 دقايق
- بعد ما يستوي.. رش عليه صوص الجبنة
نصايح مهمة لطريقة عمل السينابون الأصلي
- خلي المكونات زي البيض أو اللبن أو الزبدة بدرجة حرارة المطبخ العادية عشان تدي فرصة للخميرة تتنفخ أحسن
- بلاش تفرط في العجن لأنه هينشف العجينة بعد الخبز
- بعد خلط المكونات في العجان.. العجينة هتكون لزجة جدا، خرجها وادهن حلة العجان بكمية زيت صغيرة وكمل عجن وبعد كدة سيبها تتخمر
- حط العجينة في التلاجة قبل ما تشكلها عشان تكون سهلة في تشكيلها
- استخدم سكينة حادة أو خيط الأسنان الطبي لتقطيع العجينة عشان تبقى دواير مثالية
- سيب مسافة 2 سم بين كل رول لأن حجمها هيزيد بعد ما تتخبز
