البسطرمة بتضيف نكهة مختلفة لباقي مكونات أي أكلة سواء بيتزا أو في سندوتشات مع البيض أشهر خليط مفضل عند المصريين، لكن أصلها بيرجع للمطبخ الأرمني والكلمة نفسها معناها (اللحم المتبل بالملح)، دخلت مع هجرة الأرمن لمصر، وكان بيتم تصنيعها في البيوت قبل ما تتحول لصناعة معروفة، وفي الفترة الأخيرة ناس كتير بقت بتخاف تشتريها بسبب التلوث وطرق التخزين غير المعروفة، بنقدم لك أفضل طريقة عمل البسطرمة في البيت بسهولة.
المكونات
- كيلو عرق بقري
- نص معلقة كبيرة ملح
- معلقة كبيرة حلبة مطحونة
- 3 معالق بابريكا
- نص معلقة كبيرة فلفل أسود
- ربع معلقة كبيرة شطة
- نص معلقة كبيرة كبابة صيني
- 3 معالق كبيرة توم مفروم
- نص معلقة كبيرة كمون
- ملح خشن
- خيط وقماش الشاش
طريقة عمل البسطرمة
- اغسل عرق اللحمة ونشفه كويس بورق المطبخ
- اربط العرق بخيط الشاش بشكل طولي
- رش ملح خشن على العرق وسيبه 4 أيام
- اغسل اللحمة من الملح وسبها تتصفى كويس
- لف اللحمة بقماش الشاش
- حطها في بولة وغطيها بلوح خشب وعليها حاجة تقيلة
- غير قماشة الشاش مرة كل 12 ساعة لمدة يومين
- علق اللحمة في مكان بارد لمدة 8 أيام تقريبًا
- اخلط الحلبة والبابريكا والملح والفلفل والكمون والشطة والكبابة والتوم المفروم كويس
- ضيف مياه لحد الخليط ما يبقى عجينة
- غطي اللحمة بالخليط وعلقه تاني لمدة 7 لـ 10 أيام
- قطع البسطرمة شرايح رقيقة جدًا وغطيها بكيس بلاستيك في التلاجة
