المحتويات
الباتيه من معجنات المطبخ الأوروبي، مناسب لوجبات الفطار مع كوباية الشاي أو النسكافيه، تقدر تختار حشو حادق أو حلو، وتضيف المكونات اللي بتفضلها، أغلب الناس بتشتريه من الأفران والمحلات لكن طريقة عمل الباتيه في البيت خطواتها سهلة.
العجينة
المكونات
- 3 كوبايات دقيق
- ربع كوباية سمنة
- معلقتين كبار لبن بودرة
- معلقة كبيرة خميرة فورية
- معلقة صغيرة سكر
- مياه دافية للعجن
- رشة ملح
الطريقة
- اخلط الدقيق مع اللبن البودرة والخميرة والملح والسكر
- سيح السمنة وضيفها على خليط الدقيق في العجان أو افركها بإيدك
- ضيف المياه الدافية بالتدريج لحد ما تبقى عجينة متماسكة
- سيب العجينة تتخمر لمدة ساعة
- افرد العجينة بالنشابة وقطعها بالطول أحجام متساوية
- ضيف أي حشوة مفضلة ولف العجينة
- حط الباتية في صينية مدهونة زيت وسيبها نص ساعة تتخمر
- ادهن وش الباتيه ببيضة مخفوقة (ممكن ترش حبة البركة/ زعتر/ سمسم)
- دخل الصينية الفرن على درجة حرارة عالية لمدة 30 دقيقة أو لما وشها يحمر
طريقة عمل الباتيه بحشوة الجبن
المكونات
- نص كوباية جبنة شيدر مبشورة
- حبتين فلفل أخضر مقطع مكعبات
- نص كوباية جبنة رومي مبشورة
- معلقة صغيرة زعتر مجفف
- نص كوباية جبنة موتزاريلا
- 3 معالق كبار زيتون أخضر حلقات
الطريقة
- في بولة عميقة.. اخلط كل المكونات كويس قبل الحشو
حشوة السجق
المكونات
- نص كيلو سجق
- نص معلقة صغيرة بهارات لحمة
- نص معلقة صغيرة بودرة توم
- ملح/ فلفل أسود
- نص معلقة صغيرة بودرة بصل
الطريقة
- في الكبة.. افرم السجق فرم خشن
- شوح السجق في معلقة صغيرة زيت وضيف البهارات وقلب كويس
حشو البيتزا
- حبتين طماطم مبشورة
- 3 حبات مشروم مقطع شرايح
- معلقة كبيرة صلصة طماطم
- حبتين فلفل أخضر مقطع مكعبات
- معلقة صغيرة كاتشاب
- نص كوباية زيتون أسود حلقات
- فص توم مفروم
- معلقة صغيرة زعتر مجفف
- ملح وفلفل أسود
- معلقتين كبار زيت
- كوباية جبنة موتزاريلا
الطريقة
- شوح التوم في الزيت وضيف الطماطم والكاتشاب وصلصة الطماطم
- زود معلقة كبيرة مياه وسيب الخليط يغلي
- ضيف الفلفل الأخضر والمشروم والزيتون وقلب كويس
- تبل الحشوة بالملح والفلفل الأسود والزعتر
حشوة التفاح
المكونات
- حبتين تفاح مقطع مكعبات صغيرة
- كوباية سكر
- معلقة كبيرة قرفة
الطريقة
- اخلط التفاح مع السكر والقرفة
ممكن تستخدم (الشوكولاتة السايلة/ مكسرات مجروشة/ المربى/ الفواكه المجففة/ الجبنة الكريمي) في الحشو
