المحتويات
الأرز أساسي في معظم الأكلات اليومية لوجبة الغداء، جنب المشويات واللحوم والفراخ أو الخضار أو الأسماك، رغم إن أشكاله في مطبخنا المصري مش كتير، بالشعرية أو الأحمر أو الصيادية أو بالخلطة، هنقولك طريقة عمل الأرز بنكهات مختلفة من خلال إضافاتك لمكونات تعزز نكهته وفوايده الصحية.
طريقة عمل الأرز بالليمون والأعشاب
- من المطبخ اليوناني، وممكن تاكله مع أطباق الفراخ والأسماك والسي فوود
المكونات
- كوبايتين أرز
- معلقتين كبار زيت زيتون
- بصلة صغيرة مفرومة
- فص توم
- نص كوباية لسان عصفور (اختياري)
- عصير 2 حبة ليمون
- كوبايتين شوربة فراخ (ممكن تستبدلهم بمياه ومكعب مرقة)
- ملح
- معلقة كبيرة شبت مفروم
- ربع كوباية بقدونس مفروم
- معلقة صغيرة قشر ليمون
الطريقة
- اغسل الأرز كويس
- سخن الزيت وشوح البصل لمدة 4 دقايق وضيف التوم ولسان العصفور
- قلب لحد ما لسان العصفور يبقى لونه دهبي غامق وضيف الأرز
- ضيف المرقة وعصير الليمون
- بعد ما الخليط يغلي.. هدي النار وسيبه يستوي لمدة 15 -20 دقيقة
- وزع الشبت والبقدونس وقشر الليمون وقلب عشان يختلط ببعضه
طريقة عمل الأرز بالزعفران
- من المطبخ الإيراني، وممكن تاكله مع اللحوم أو الفراخ
المكونات
- كوباية أرز بسمتي
- ربع ملعقة صغيرة زعفران
- نص كوباية مياه مغلية
- معلقة كبيرة زبدة
- ربع معلقة صغير شمر
- فصين حبهان
- ربع معلقة صغيرة قرفة
- بصلة صغيرة مفرومة
- نص معلقة صغيرة كمون
- ربع كوباية لوز أو صنوبر
- ملح وفلفل أسود
- نص معلقة صغيرة قشر ليمون
الطريقة
- انقع الزعفران في المياه المغلية لمدة 10 دقايق
- سيح الزبدة وشوح الشمر والكمون لحد ما ريحتهم تظهر
- ضيف القرفة والحبهان والبصل وقلب لمدة 10 دقايق
- حط الأرز وقشر الليمون وقلب كويس وضيف كوباية ونص مياه
- تبل بالملح والفلفل الأسود
- سيب الأرز يتشرب لمدة 5 دقايق ووزع الزعفران بالمياه المنقوع فيها الأرز
- غطي الحلة لمدة 15 دقيقة على نار هادية
طريقة عمل الأرز بالطماطم
- من المطبخ الأسباني، وممكن تاكله مع الفراخ والأسماك
المكونات
- كوباتين أرز
- معلقتين كبار زيت زيتون
- بصلة صغيرة مفرومة
- نص ثمرة فلفل أحمر حار
- كوبايتين شوربة
- كوباية صلصة
- عصير نص حبة ليمون
- معلقة صغيرة بودرة توم
- نص معلقة صغيرة كمون
- معلقة صغيرة زعتر
- ملح وفلفل أسود
الطريقة
- سخن الزيت وشوح البصل والفلفل الأحمر لمدة 4 دقايق
- اغسل الأرز كويس وضيفه على البصل والفلفل لمدة 5 دقايق
- ضيف شوربة الفراخ والصلصة وعصير الليمون
- تبل بالملح والفلفل الأسود والكمون وبودرة التوم والزعتر
- بعد ما يتشرب الشوربة.. هدي النار وغطي الحلة وسيبه لمدة 15 دقيقة
طريقة عمل الأرز بالصويا صوص
- من المطبخ الصيني، ممكن تاكله جنب أطباق الفراخ أو اللحمة
المكونات
- كوباية أرز مسلوق
- كوباية فلفل ألوان مقطع مكعبات صغيرة
- معلقة كبيرة زيت
- فص توم مفروم
- بصلة مقطعة صغير
- معلقتين كبار صويا صوص
- معلقة كبيرة كبار زيت نباتي
- ملح وفلفل أسود
الطريقة
- شوح البصلة والتوم في الزيت لمدة 3 دقايق
- ضيف الفلفل الألوان والأرز وقلب لمدة 3 دقايق
- تبل بالملح والفلفل الأسود والصويا صوص
