ضريبة الدخل صدرت في قانون 91 سنة 2005 والهدف من قانون ضريبة الدخل هو تحقيق العدالة الضريبية وبتستهدف بعض الأشخاص أو الشركات اللي بيزيد دخلهم عن حدّ معين.
تعريف ضريبة الدخل
- هي ضريبة من مصادر الموازنة العامة للدولة وعبارة عن مبلغ بيفرض على الأشخاص بشكل إجباري سواء أشخاص بيشتغلوا عمل حر أو شركات بتقدم خدمات وبتمارس أنشطة تجارية
- بتقتطع الدولة جزء من الأرباح بنسبة محددة ومقررة
- بيتعدل القانون باستمرار لتحقيق العدل الضريبي وتحسين الشرائح الضريبية
قيمة ضريبة الدخل
- من تاريخ يوليو سنة 2020 عدلت وزارة المالية نسب الضرائب المفروضة على الدخل
- بتتحسب النسبة المئوية من الدخل السنوي
- بتختلف النسب حسب طبيعة الضريبة نفسها وحسب الصناعة لكن النسب المفروضة على الدخل الطبيعي سنويًا:
- 2.5% من الدخل لأصحاب الدخول من 15 لـ 30 ألف جنيه سنويًا
- 10% لأصحاب الدخول أكتر من 30 ألف جنيه لـ 45 ألف جنيه سنويًا
- 15% لأصحاب الدخول أكتر من 45 ألف جنيه ـ 60 ألف جنيه سنويًا
- 20% لأصحاب الدخول أكتر من 60 ألف جنيه لـ 200 ألف جنيه سنويًا
- 22.5% لأصحاب الدخول أكتر من 200 ألف جنيه لـ 400 ألف جنيه سنويًا
- 25% لأصحاب الدخول أكتر من 400 ألف جنيه سنويًا
طريقة رفع الإقرار الضريبي إلكترونيًا للشخص الطبيعي
- ادخل على موقع مصلحة الضرائب المصرية وبعدها اختار الإقرار المناسب لطبيعة شغلك ومصدر دخلك
- اعرف التواريخ المطلوبة منّك سواء شخص طبيعي أو اعتباري (شركة أو مؤسسة)
- ضروري تسجل الدخول في البداية ولو مش عندك حساب ضروري تعمل حساب سواء كممول أو كمحاسب
- ادخل على إدخال البيانات يدويًا
- اكتب رقم التسجيل الضريبي الموحد (مكتوب على البطاقة الضريبية) وهو الرقم المكون على 9 أرقام وهو الرقم المكتوب تحت على اليمين
- املا البيانات المطلوبة منّك ومنها الاسم والعنوان والبريد الإكتروني
- بتختار إقرار الدخل الطبيعي تحت عنوان ضريبة الدخل وبعدها هتظهر جداول كتير
- المهم بالنسبة لك جدول إيرادات المهن غير التجارية اللي تقدر تملاه حسب دخلك والأحسن تستعين بشخص خبير لإدخال البيانات في خاناتها الصحيحة
- اضغط باستمرار على علامة الحفظ المؤقت (فوق على اليمين) وفي نفس الوقت لمعاينة الإقرار اضغط على العلامة اللي بتحمل نفس الاسم تحت كلمة الحفظ المؤقت
- بعدها بتروح البنك وبتسأل عن شباك دفع ضريبة الدخل وبتسدد إيصال ضريبة الدخل اللي بتستلمه
- اختار غلق الفترة الضريبية واكتب السنة اللي دفعت عنها الضرائب وبعدها اكتب رقم القسيمة
- وممكن تدفع بخدمات الدفع الإلكتروني سواء عن طريق ميزا أو Visa أو Mastercard
