إصلاح خدوش الأسطوانات من الحاجات المهمة اللي لازم تعرفها، لأن خدوش الأسطوانات بتأثر على جودتها ومع الوقت ممكن تسبب في تعطلها عن العمل، بيترتب عليها مشكلة كبيرة خصوصًا لو عليها معلومات مهمة، وعشان كده هنقولك طريقة تقدر تقلل فرص وجود الخدوش على الأسطوانات:
إصلاح خدوش الأسطوانات
- بلل قطعة قماش بمياه وحط عليها نقطة صابون غسل الصحون
- نضف بيها الأسطوانة من كل الاتجاهات.. من المركز لحد الأطراف
- بلاش تنضفها في حركة دائرية لأن الخدوش هتزيد.. وبعد ما تنضفها لازم تنشّفها كويس
- حط معجون الأسنان على الأسطوانة وبلل صباعك وادعك الخدش برفق في اتجاه مستقيم من الداخل للخارج
- حط فازلين على الخدش مباشرة وسيبه دقيقتين وبعدين امسحه بمنديل
- أو ادعكه بقطعة موز.. لكن الطريقة دي بتحتاج وقت وأكتر من مرة عشان تزيل الخدش
- لازم تمسح الأسطوانة كويس بقطعة قماش جافة قبل استخدامها
- لو مفيش نتيجة واضحة لازم تكرر الخطوات باستمرار يوميًا لمدة أسبوع على الأقل
الحفاظ على الأسطوانة من الخدوش
- احتفظ بيها في حافظة بلاستيك مش ورقية
- امسكها من الأطراف بلطف وبلاش تمسكها من الجوانب
- ابعدها عن متناول الأطفال والحيوانات الأليفة
- بلاش تحط الأسطوانات فوق بعضها وخزّنها بشكل رأسي مش أفقي
- مهم تشيلها من اللاب توب أو جهاز الـ DVD لما تخلّص المهمة اللي بتعملها وبلاش تسيبهم داخل الجهاز لمدة طويلة
- ابعد عنها أي أدوات معدنية وقلل احتكاك الأسطوانة قدر المستطاع بأي سطح
