المحتويات
الاظافر من الأشياء اللي بتحتاج عناية مستمرة لتحسين وتقوية شكلها ولتجنب انتقال الجراثيم والبكتيريا منها للجسم عن طريق الأكل، وبتحتاج إتباع خطوات معينة للحفاظ عليها وتقويتها.
خطوات تنضيف اظافرك
اعمل الخطوات دي بالتريب كل 3 أيام عشان تتجنب إصابتك بالجراثيم وتحافظ على شكلها
- استخدم مبرد الأضافر أو طرف منديل (Wipes) عشان تنضفها من الداخل وإيدك جافة تماما عشان يكون أسهل
- اغسل إيدك كويس بالمياه والصابون
- انقع أطراف ضوافرك في خليط من المياه الدافية والصابون 3 دقايق
- ادعكها بفرشة مخصصة ليها أو فرشة أسنان جديدة وبعدين نشفها بالطبطبة
- امسحي ضوافرك بالآسيتون لمسح أي بقايا مانيكير واغسلي إيدك بعدها
- اخلط معلقتين ونص كبار بيكنج صودا مع معلقة كبيرة مياه دافية ووزع الخليط على ضوافرك وبعدين اغسله
- اعمل الخليط ده مرة أسبوعيا لتبييضها وممكن تستبدله بمعجون الأسنان المبيض
- ادعك ضوافرك بكريم جسم أو زبدة الكاكاو أو جل الصبار
- لو لونها مايل للأصفر.. ادعكها بزيت الشاي أو عصير الليمون أو زيت الليمون 5 دقايق وبعدين اغسلها
- أو ممكن تنقعهم في خليط بكميات متساوية من الخل والمياه لمدة 20 دقيقة
- ادهن ضوافرك بسيروم مخصص ليها أو بزيت الجوجوبا/ العنب/ اللافندر/ خليط من نص معلقة جل صبار مع نص معلقة زيت خروع
طرق الحفاظ على اظافرك نضيفة
- اهتم بقص الضوافر أول بأول.. بالنسبة للنساء الأفضل تكون قصيرة مع بردها أول بأول
- اغسل الجانب السفلي منها بالمياه والصابون كويس في كل مرة بتغسل فيها إيدك
- اخلط (بيكربونات الصوديوم + عصير ليمونة أو خل) وافركها بفرشة أسنان صغيرة لتنضيفها
- البس جوانتي أثناء تنضيف الأطعمة (زي الطين على البطاطس أو البطاطا) أو الأطباق أو المنزل من الأتربة
- استخدم طرف المبرد أو خلة أسنان للتخلص من الأتربة تحتها باستمرار
- عقم أدوات العناية بها قبل الاستخدام واستخدم أدواتك الشخصية في صالونات التجميل
- تجنب قضمها
- تجنب قطع الجلد الزائد لأنه بيقوم بدور حواجز تمنع العدوى
- اهتم بترطيبها باستخدام منتجات متخصصة أو زيت اللوز
طرق تقوية الاظافر الضعيفة
- البيوتين نوع مهم من فيتامين (ب) ومن أهم الفيتامينات اللي بتساعد على تقوية وتطويل الضوافر وموجود في الموز والمشروم والسردين والبيض والمكسرات وفول الصويا
- حمض الفوليك مهم لصحة الاظافر والشعر وموجود في اللحوم الحمرا والأسماك والجبن
- فيتامين (أ) بيحافظ عليها من التكسر والضعف وموجود في البطاطا والجزر والخضار الورقي
- اهتم بجرعة فيتامين (سي) اليومية من أكلات زي البرتقال والفراولة والكيوي
- استخدم مقوي الضوافر الطبيعي أو الجاهز لأنه هيقلل من سهولة كسرها
- تجنبي تركيب الاظافر عشان اللصق المستخدم في تركيبها بيقلل نموها
- نشفهم دايما من المياه وابردهم كل أسبوع
- اهتم بترطيبهم يوميا بكريم إيد أو جسم أو سيروم ترطيب أو فازلين
- تجنب استخدام أظافرك في فتح العلب أو تحريك حاجة
- تجنبي تقشير المانيكير بأظافرك لأن ده بيسبب تقشر طبقة الاظافر الأساسية
خطوات عمل سيروم مقوي للاظافر في البيت
سخن المكونات دي:
- معلقة كبيرة زيت لوز (لتلميع الأظافر)
- نفس الكمية من زيت جوز الهند (لتكثيف الأظافر)
- معلقة كبيرة زيت زيتون (لتقوية الأظافر)
اخلطهم في بولة يتدفوا وبعدين حطهم في زجاجة مانيكير فاضية
وزعه على أظافرك يوميا مرتين الصبح وبالليل
