مرأة
دلال عبد العزيز: إزاي عبرت بصدق عن الأم المصرية؟
إزاي دلال عبد العزيز عبرت بصدق عن الأم المصرية؟
المحتويات
دلال عبد العزيز بتعتبر من أهم نجمات الوسط الفني من وقت بدايتها سنة 1977 مرورًا بفترة الثمانينيات وحتى رحيلها أمس، قدمت أعمال متنوعة للسينما والمسرح والتليفزيون وصل عددهم لأكتر من 200 عمل بين أفلام سينمائية ومسرحيات ومسلسلات درامية حاز أغلبها على نجاح كبير وإشادات متنوعة بين آراء النقاد والجمهور.
نشأتها
- ولدت دلال عبد العزيز في 17 يناير 1961 في إحدى قرى محافظة الشرقية
- كانت بتعبر دائمًا عن اعتزازها وفخرها بنشأتها في الشرقية وكانت بتتكلم عنها في أغلب اللقاءات التليفزيونية
- حبها للفن بدأ من الطفولة لأنها كانت بتحب تقف مدة طويلة قدام المراية عشان تجسد شخصيات مختلفة
- وبتفضل التمثيل والتقليد والغناء عن الأنشطة المنزلية لتانية
- كانت بتحفظ مشاهد شقيقتها الكبرى المشتركة في نشاط المسرح المدرسي من سن صغير (حتى قبل دخولها للمدرسة)
- كانت بتروح المدرسة مع اختها قبل حتى سن الدراسة وكان بينبهر الأساتذة بموهبتها الفطرية في الحفظ والتمثيل
- بعد دخولها سن المدرسة اتدربت على الإلقاء والحفظ والتمثيل داخل المسرح المدرسي حتى إتمام دراستها بالثانوية العامة
دخولها للوسط الفني
- بعد إتمام دراستها بالثانوية العامة ساعدها فرد من عائلتها على الالتحاق بالتليفزيون ومقابلة المخرج نور الدمرداش
- نجحت في اختباره ليها ووقفت أمام الكاميرا لأول مرة في مسلسل بنت الأيام عام 1977 ومن بعدها توالت الأعمال عليها
قصة حبها لسمير غانم
- بيعتبروا من أشهر ثنائيات الفن المصري عبر تاريخه
- استمر زواجهم لأكتر من 37 سنة وأنجبوا الفنانتين دنيا وإيمي سمير غانم
- اشتركت معاه في بدايتها في مسرحية أهلًا يا دكتور سنة 1981 وبدأت قصة حبهم خلالها
- صرحت في حوارات كتير إنه طريقته في التعامل معاها بلطف جذبتها إليه على الرغم من تصريحات سمير غانم المتكررة إنها هي اللي جذبته للزواج
- انتشرت قصة حبها لسمير غانم في الوسط الفني كله وأغلب الممثلين الكبار وقتها تنبأوا بقرب زواجهم
- من ضمنهم محمود مرسي وفريد شوقي وفؤاد المهندس وكريمة مختار وميرفت أمين وإسعاد يونس
قرب دلال عبد العزيز من قلوب المشاهدين
- حوارتها اللي كانت بتحكي فيها مواقف من حياتها بتشبه أغلب المواقف اللي بتعيشها الأم المصرية كانت سبب في قربها للناس أكتر
- زي القصة اللي حكيتها عن عدم تبادلها للهدايا مع زوجها سمير غانم لأنه في أول سنة جواز بادرت بتقديم هدية عيد ميلاده اللي بيسبق عيد ميلادها بيومين
- واتفاجئت إن وقت عيد ميلادها مقدمش هدية ليها لأنه حسب وجهة نظره مش من المفترض إنه يرد الهدية بعدها بيومين
- السنة اللي بعدها انتظرت واكتفت بتهنئته بعيد ميلاده فقط بدون هدية ووقت عيد ميلادها اكتفى بتهنئتها واتصرف بالمثل
- لما سألته عن سبب عدم تقديمه للهدية قالها إنها كان المفروض (تقدّم السبت وتشتري الهدية عشان تتردلها)
- القصص دي بيتفرج عليها ملايين المشاهدين على التليفزيون ومواقع التواصل الاجتماعي وأغلب التعليقات عليها إيجابية
- قربها من أزواج بناتها وكلامها عنهم بحميمة بمفردات مشابهة لأغلب الناس قرّبها أكتر من قلوب الناس وزوّد مصداقيتها عند المشاهدين
- زي حوارها اللي اتكلمت فيه عن هدايا عيد الأم اللي تلقّتها من بناتها وأزواجهن
- قالت إنه في أغلب أعياد الأم بناتها بيشتركوا في هدية واحدة كبيرة زي خاتم ثمين ولكن أزواج بناتها بيشتروا هدايا ليها في عيد ميلادها
- عفويتها وتلقائيتها مثلًا في التعبير عن عدم تذكرها إذا كانوا بيشتروا هدية أو لأ بيأكد إحساس صدقها اللي بيوصل للمشاهدين سواء في الحوارات أو حتى في تجسيدها لشخصيات مختلفة عنها
دلال عبد العزيز وأدوار الأم
- رغم إن فنانات كتير بيرفضوا أداء دور الأم إلا بعد سن معيّن إلا إنها لعبته في سن صغير نسبيًا
- في عام 2001 وكان عمرها حوالي 40 سنة قامت ببطولة فيلم أسرار البنات اللي مثلت فيه دور أم لفتاة مراهقة
- في نفس السنة قامت بدور الأم في مسلسل للعدالة وجوه كثيرة مع يحيى الفخراني وإخراج محمد فاضل
- الشخصيات كانت مختلفة على الرغم إن العامل المشترك هو الأمومة، لأن في الفيلم جسدت دور الأم المهزوزة المتوترة الخائفة على ابنتها
- أما في المسلسل فجسدت الأم المتسلطة قوية الشخصية اللي بتفرض شكل حياة معيّن على ابنتها
- بعدها جسدت دور الأم في أفلام كوميدية كتير منها آسف على الإزعاج ولاتراجع ولا استسلام والبدلة وسمير وشهير وبهير وقلب أمه
- جسدت أدوار الأم في أعمال تراجيدية زي فيلم عصافير النيل وفيلم سوق الجمعة وفيلم كارما
أدوار الأم في الدراما التليفزيونية
- في السنين الـ 10 الأخيرة زاد تواجدها في الدراما التليفزيونية من خلال أعمال قوية مثلت فيها دور الأم بصدق شديد
- مشاهد كتير بيتادولها رواد مواقع التواصل الاجتماعي ليها من مسلسلات مختلفة وأكد أغلبهم عليها إنهم بيشوفوا فيها الأم والخالة أو العمة أو حتى الجدة القريبة من القلب
دورها في مسلسل سابع جار
- زي مشاهدها في مسلسل سابع جار اللي كانت بتشبه أغلب الأمهات المصريات في تفاصيل حياتهم زي طريقة الكلام واستخدام المفردات
- حتى في طريقة لبسها ومشيتها وحركة إيديها أثناء الكلام وقعدتها سواء داخل البيت أو خارجه كانت مألوفة لقطاع واسع من المتفرجين
- العلاقة بين أي أم وخالة هي علاقة وطيدة وراسخة وليها قواعدها بداية من الأصول والواجبات الاجتماعية حتى أدق تفاصيل الجلوس والملابس والأنشطة اللي بتتعمل وقت جلوسهم سوى
- دلال عبد العزيز قدرت في مشاهد كتير من سابع جار تجسيد العلاقة دي بشكل عفوي مع اختها في المسلسل (جسدت دورها شيرين)
- زي مشاهد نصح اختها ليها بإتّباع الوصفات الطبعيية لتخفيف الآلام
- أغلب المتفرجين كانوا بيحسوا كأنهم بيتفرجوا على أفراد من أسرتهم في المشهد مش ممثلين بيجسدوا شخصيات بعيدة عن حقيقتهن
أدوار الأم في مسلسلات تانية
- أدوار كتير مثلتها بعفوية وصدق كانت مؤثرة في أذهان ومشاعر المشاهدين خصوصًا وقت عرضها لأول مرة
- زي مشهد تلقيها خبر استشهاد ابنها في مسلسل الهروب
- وحتى مشهدها الأخير في مسلسل ملوك الجدعنة ويعتبر الأخير ليها على الكاميرا اللي وقفت قدامها لمدة 37 سنة
