النوتيلا من أكتر أنواع الشوكولاتة اللي بيحبها أطفال وكبار، وبتستخدم في وصفات حلويات شرقية وغربية متعددة، عشان كده هنقولك على خطوات عملها في البيت بطريقة سهلة.
مكونات النوتيلا
2 كوباية بندق محمص
كوباية كريمة طهي
نص كوباية لبن كامل الدسم
كوباية ونص لبن بودرة
2 كوباية مكعبات شوكولاتة بالحليب وممكن كوباية منهم تبقى شوكولاتة غامقة
معلقة كبيرة زيت نباتي
طريقة عمل النوتيلا
- لو البندق غير محمص.. افرده على ورقة زبدة في صينية ودخله الفرن وهو سخن على درجة حرارة 180
- خرجه أول ما لونه يبقى دهبي.. ولو بقشره افركه بين فوطة عشان تشيله
- اطحن البندق وهو سخن مع الزيت النباتي لحد ما يتحول لقوام كريمي
- سخن اللبن السايل والبودرة والكريمة على النار لحد قبل الغليان مع التقليب المستمر
- سيح الشوكولاتة في الميكروويف أو في طبق فوق حلة مياه سخنة وتسيبها عشر دقايق
- اخلط الشوكولاتة السايحة مع البندق كويس وبعدين ضيف خليط الألبان
- احفظها في برطمان إزاز محكم.. بتقعد لحد شهر في التلاجة
