حل مشكلة فيروس الفدية بالخطوات واسترجاع الملفات المفقودة

حل مشكلة فيروس الفدية ضروري يتم في أسرع وقت لأنه بيمنعك من الوصول لنظام التشغيل وبيشفّر كل البيانات الموجودة على جهازك، وبيطلب المخترقين منك دفع فدية مالية بتتراوح قيمتها بين 300 و600 دولار، عشان كده ضروري تعرف طريقة حل المشكلة وخطوات استرجاع البيانات المشفرة بعد حلها.

تعريف فيروس الفدية 

• الخبراء بيأكدوا إنه منتشر في أكتر من 100 دولة من مختلف أنحاء العالم
• بيصيب الأجهزة اللي بتشتغل بنظام ويندوز
• بيبدأ عن طريق وصول رسالة أو رابط مجهول بيطلب من الشخص تحميله أو الضغط عليه لأنه بيحتوي على بيانات شخصية
• بعد الضغط على الرابط بتتشفر البيانات تلقائيًا وبيطلب الهاكر فدية بتزيد قيمتها مع مرور الوقت
• بيتقسم لنوعين الأول بتظهر رسالة زرقاء بتمنع الشخص من دخول نظام التشغيل الخاص بالكومبيوتر
• والتاني بيحذف كل الملفات الخاصة بيك على الجهاز ولكن ملفات نسخة الويندوز نفسها بتفضل موجودة
• بيخفي الهاكر أو المخترق كل البيانات الموجودة داخل الملفات الأصلية وبيستبدلها بملفات مشابهة ليها بتحمل اسم قريب منها ولكنها بتحتوي على شفرات
•  بيختار المخترق طريقة دفعك سواء بالبطاقة الائتمانية أو بالبيتكوين ومن أشهر فيروسات الفدية (Ransomware أو WannaCry)

طريقة حل مشكلة فيروس الفدية  

• في البداية راقب الأسماء الجديدة للملفات عشان تتأكد إذا كان فيروس الفدية ولا لأ
• عن طريق مقارنة الحروف الجديدة المشتركة بين الملفات وبعضها لأنك لو لقيت حروف مشتركة بين كل الملفات معناه إن جهازك أصيب بالفيروس
• استخدم أي برنامج من برامج الـ antivirus عشان تمحيها من جهازك
• برامج كتير بينصح بيها الخبراء عشان تتخلص من فيروس الفدية ومن أكتر البرامج فاعلية:
• Microsoft Safety 
•  ID Ransomware
•  No More Ransom
•  Spyware Scanner 
•  Trend Micro 
•  MalwareBuster 
•  Avast Premium Security 
•  Kaspersky 
•  VirusTotal 
•  Emsisoft 

استرجاع الملفات المشفرة على الكومبيوتر

• عشان تحاول تستعيد بياناتك تاني اضغط باستمرار على زرار F8 للوصول لقايمة التشغيل المتقدمة 
•  اختار Repair your computer واضغط على enter
• هتظهرلك قايمة تكتب فيها اسم المستخدم وكلمة السر لحسابك على الويندوز وبعدها تختار استعادة النظام/ System Restore
• أحيانًا الطريقة دي بتنجح لكن لازم تستشير فني متخصص لو مش قادر ترجّع بياناتك تاني بأمان

حماية الجهاز من الإصابة بفيروس الفدية 

• بلاش تفتح أي رابط/ link مش موثوق في مصدره وافحصه بواسطة موقع virustotal عشان تتأكد إنه آمن قبل فتحه 
• اتأكد إن Microsoft Defender دايمًا متفعّل واعمل نسخة احتياطية من بياناتك على الويندوز 
• حدّث نظام التشغيل والتطبيقات اللي على ويندوز باستمرار واتأكد من نوع الملف وحجمه وتاريخه وتعليقات الناس عليه قبل تحميله

خطوات استخدام الإنترنت بأمان 

•  تجنب كتابة المعلومات الشخصية زي العنوان والتليفون ومكان العمل على حسابات السوشيال ميديا
•  فعّل إعدادات حماية حسابك على أي تطبيق أو موقع بتستخدمه مهما كانت درجة استخدامك ليه قليلة
• تجنب فتح الروابط أو الصور أو الفيديوهات مجهولة المصدر واتأكد من صاحب الرسالة الأول
• تجنب الانجذاب لصور أو فيديوهات أو رابط مجهول المصدر أو الهوية أثناء تصفح الإنترنت
• الغي خاصية الإعلانات المفاجئة من المتصفح (Browser) اللي بتستخدمه
• تجنب استخدام الإنترنت أو الشواحن العمومية لأنها خالية من الرقابة وبتسهل اختراق الموبايل أو الكمبيوتر
• اتأكد من التطبيقات أو الأشياء اللي بتحملها وإنها من مصدر موثوق منه
• استخدم كلمات سر قوية ومكونة من أكتر من عنصر وتجنب استخدام نفس كلمة السر في أكتر من شيء
• اتأكد من مصداقية مواقع التسوق الأونلاين الأول عن طريق الـ(URL) لازم يكون فيه https
• تجنب نشر محتوى زي الصور أو الكتابة عن أشياء شخصية بطريقة مبالغ فيها لأنها أول ما تنزل بتكون غير محمية
• وتجنب إضافة أشخاص غريبة على السوشيال ميديا  وجدد الـ(Antivirus) أول بأول
• اتأكد إن أي موقع بتتعامل معاه كاتب مكانه أسفل الصفحة والإيميل المخصص ليهم وخالي من الأخطاء الإملائية وبيحتوي على معلومات كتير
• اعمل نسخة احتياطية للصور والمعلومات واتأكد من تطابق كشف حسابك البنكي لنشاط شرائك
• استخدم الـ(Multi-Factor Authentication) في كل الحسابات عشان يتم إرسال رسالة تأكيد في حالة وجود نشاط غريب عليها
• امسح الـ(Cookies) وتاريخ السيرش أول بأول على الكمبيوتر والموبايل وغير إعدادات البلوتوث وخليه خفي (Invisible)
• بلاش تستعمل شبكة واي فاي مش موثوق في مصدرها