المحتويات
MCV مصطلح mean corpuscular volume ومعناه (متوسط حجم الكريات)، والكريات هي خلايا الدم بتنقسم لـ3 أنواع: خلايا الدم الحمراء وخلايا الدم البيضاء والصفائح الدموية، تحليل MCV بيقيس متوسط حجم كريات الدم الحمراء اللي بتحمل الأكسجين من الرئتين لكل أجزاء الجسم، وفي حالة حدوث أي خلل في حجم الكريات الحمراء تكون كبيرة جدا أو صغيرة جدا، بيكون ده علامة عن وجود اضطراب في الدم زي الأنيميا ونقص الفيتامينات وأمراض تانية.
أسباب اللجوء لتحليل MCV
بيطلب الدكتور عمل تحليل الدم الكامل وبيشمل MCV في حالة ظهور أعراض زي:
- التعب والإرهاق بسهولة بدون مجهود
- النزيف غير الطبيعي
- ظهور الكدمات بدون سبب
- الشعور ببرودة في الأطراف
- شحوب البشرة
طريقة إجراء تحليل لـMCV
- عن طريق أخذ عينة دم من الذراع
- مش بيستدعي أي استعدادات زي الصوم قبل الفحص
- لكن لو بتاخد أي دواء لازم تسأل الدكتور عن جرعتها قبل الفحص
المعدل الطبيعي
المتوسط الطبيعي لحجم كريات الدم الحمراء بيكون:
- للبالغين والأطفال والمسنين: 80 – 95 فيمولتر
- للأطفال حديثي الولادة: 96 – 108 فيمولتر
- في بعض الحالات بيظهر معها النتائج في المعدل الطبيعي زي: بعض حالات فقر الدم الانحلالي/أمراض الغدد الصماء ما عدا الغدة الدرقية/ الأنيميا الناتجة عن مرض مزمن/ مرض الكلى (وأحيانا قد تظهر معه نتائج منخفضة)
لو النتيجة منخفضة
ده معناه إن حجم كريات الدم الحمراء أصغر من الطبيعي، وإشارة لإصابة بحالة مرضية زي:
- أنيميا نقص الحديد
- الثلاسيميا أو أنيميا البحر المتوسط (وهي نوع من فقر الدم الوراثي)
- فقر الدم بسبب مرض مزمن
- التسمم بالرصاص
لو النتيجة مرتفعة
ده معناه إن حجم كريات الدم الحمراء أكبر من الحجم الطبيعي، علامة عن حالة مرضية زي:
- فقر الدم بسبب نقص فيتامين ب12
- نقص حمض الفوليك (فيتامين ب9)
- مرض الكبد
- قصور الغدة الدرقية
- إدمان الكحوليات
- التسمم بأول أكسيد الكربون
- نقص الأكسجين المزمن (لمرضى الانسداد الرئوي المزمن)
عوامل بتأثر على نتائج تحليل MCV
ممكن يكون المعدل أكبر أو أقل من الطبيعي بسبب:
- نقل الدم قبل التحليل مباشرة
- الإصابة بأكتر من نوع أنيميا في وقت واحد
- الدورة الشهرية عند المرأة
- تناول بعض الأدوية
- النظام الغذائي
- بعض التمارين الرياضية
