المحتويات
الحزن من المشاعر الضرورية اللي بنحس بيها كلنا في وقت معيّن من حياتنا نتيجة ضغوط الحياة والمواقف الصعبة اللي بنعيشها، لكن الاستغراق فيها لمدة طويلة بدون حل تأثيره مدمر مش بس على صحة الإنسان وشغله وإنتاجه في الحياة، ولكن بيخلق مسافة كبيرة بين الشخص وبين المقرّبين له ممكن يتسبب في تدمير علاقاته الاجتماعية بالآخرين.
تأثير الحزن على الصحة
- دراسات أثبتت إنه بيزود نسبة الإصابة بأمراض القلب خاصة لو بيصاحبه عزلة وشعور بالوحدة
- والنسبة الأعلى عند الستات لأنهم بيميلوا لكتم المشاعر والغضب والتعامل عادي بدل التعبير عنهم
- دراسة أثبتت إن القلق العاطفي المفاجئ ممكن يضعف عضلة القلب بشكل كبير
- وسموها متلازمة القلب المنكسر وبيرتبط بفقدان شخص عزيز عليك ونسبته أكتر عند الستات
- بيعلي هرمون التوتر في الجسم وبيضعف الجهاز المناعي وبالتالي بتكون أكتر عرضة للأمراض
- بيسبب الأرق وعدم القدرة على النوم بانتظام وعمق وبيزود أعراض أي تعب بتعاني منه قبله
- بيأثر على الذاكرة وبيسبب اضطرابها وتشوشها وعلى الأداء المعرفي زي الإدراك والتركيز
- الدراسات أثبتت إن الحزن المزمن ممكن يبقى إدماني من الناحية النفسية لأنه بيحفز مراكز المكافأة في المخ المرتبطة بالإدمان
- وبيسبب الإجهاد الشديد والتعب المزمن اللي ليه عواقب متتالية زي الإصابة بارتفاع ضغط الدم
- بيسبب اضطرابات الجهاز الهضمي ومشاكل مرتبطة بالشهية بسبب ارتباط المخ بالقناة الهضمية
- بيأثر على صحة البشرة وبيسبب ظهور مشاكل جلدية زي الحبوب والإكزيما كرد فعل
- أحيانًا بتظهر بعض الكدمات على الجلد وبتاخد مساحة كبيرة منّه وبتتسمى كدمات الحزن
- وهي بقع زرقاء أو بنفسجية ومتورمة بتظهر بشكل مفاجئ على الجسم خاصة الذراعين والساقين بشكل تلقائي
- بيرجع سببها للتعرض للتوتر والقلق والضغط النفسي الشديد وده سبب تسميتها بـ(كدمات الحزن)
- لأن ارتفاع هرمون الكورتيزول المرتبط بالتوتر والقلق، بيسبب تغير في بعض العمليات الحيوية زي عملية انحلال مادة الفايبرين (المسؤولة عن منع تطور وتكون الجلطات)
- وقت ظهورها لازم تستشير طبيب متخصص فورًا عشان تبحث في سببها
العلاقة بين الحزن وضعف العلاقات الاجتماعية
- دراسة في جامعة جنيف بتقول إن مشاعرنا بتأثر على تفاعلنا مع اللي حوالينا
- وإحساسنا بالألم والحزن بيقلل تعاطفنا مع معاناتهم ومشاكلهم ومش بنحس بيهم كفاية
- بسبب قلة القشرة الانعزالية الأمامية والقشرة الحزامية الوسطى في المخ
- وبتغير في النشاط العصبي في الدماغ فبتغير وجهة نظرنا عن اللي حوالينا وبنشوفهم بشكل مختلف
- وبتوصل إننا ممكن نشوف تعبيرات وشهم المحايدة على إنها سلبية أو إنهم واخدين موقف مننا
- ممكن ده يوصل لمشكلة معاهم بسبب سوء الفهم أو العصبية الزيادة
- بنبقى مركزين أكتر مع سبب الحزن وبنفكر في نفسنا بس وبيقل اهتمامنا بحد تاني والسؤال عنه
- دراسة بتأكد إنه بيزود الرغبة في التواصل في الشات أكتر من الكلام في الموبايل أو وجهًا لوجه وبيخلينا أكتر عزلة عن المجتمع وبتزيد الحساسية من أقل المواقف
- الدراسة بتقول إن السعادة بتخلينا منفتحين أكتر على التواصل مع الناس وتكوين صداقات جديدة
الفرق بين الحزن والاكتئاب
الحزن هو عاطفة إنسانية بيمر بها الشخص اللي بيعيش مواقف صعبة وسلبية والشخص الحزين بيعبر عن مشاعره بالبكاء أو الانغلاق على نفسه وبيبدأ يتلاشى مع الوقت.
لكن الاكتئاب هو اضطراب عقلي بيأثر على حياة الشخص بشكل قوي وبيمنعه من تأدية روتينه اليومي بشكل طبيعي وبيحتاج للتدخل والمساعدة من دكتور نفسي متخصص.
وبالتالي نقدر نعتبر الحزن جزء من أعراض الاكتئاب اللي بيظهر في أعراض زي فقدان الأمل والرغبة في أداء النشاطات اليومية وامتناع الشخص عن الأشياء اللي بيحبها مع زيادة فرص اضطرابات الشهية وصعوبة التركيز والشعور بالذنب وبيوصل أحيانًا للتفكير في الانتحار.
كيفية تخطي حالة حزن
- ابعد عن أي مكان أو حاجة أو شخص بيفكرك بالموضوع خصوصًا لو حزنك في بدايته
- استبدل الأفكار المؤلمة بجوانب أفضل واشغل نفسك بنشاط تاني بتحبه وركز في حياتك دلوقتي وإنك بتتحسن
- فكر في الدروس اللي اتعلمتها مهما كانت قاسية
- خلي عندك هدف كبير واسعى لتحقيقه ضمن جدول زمني معيّن عشان تتجنب أي استغراق في تجارب مؤلمة ممكن تبقى سبب رئيسي في مضاعفة آلامك وأحزانك
- فكّر نفسك إن الحزن مش ضعف لأنه استجابة عاطفية وشعورية طبيعية عند كل البشر وبالتالي بلاش تحس بالذنب إنك بتمر به
- بلاش تكتم البكاء لأن دراسات كتير أكدت إن دوره أساسي في تخفيف مشاعر الضيق والحزن
- تمارين التنفس أساسية في تخطي أي حزن ومنها كتم النفس والعد من 1 لـ 5 قبل تفريغه ببطء مرة تانية وتكرار التمرين مش أقل من 3 مرات
- اكتب مشاعرك وسجّلها بصوتك على تليفونك أو حتى احكيها لشخص مقرّب ليك عشان تقلل حدتها وتتخطى تأثيرها السلبي عليك
- استشير طبيب نفسي لو مش قادر تتخطى حدة المشاعر السلبية لأنها ممكن مع الوقت تتحول لاكتئاب مزمن صعب السيطة عليه
أكلات ضروري تجنبها أثناء الحزن
- العيش الأبيض بيتحول لسكر والحلويات بتأدي لرفع سريع لمستوى السكر في الدم وانخفاض مفاجئ وده هيسبب الصداع والإرهاق
- الأرز والمكرونة واستهلاك الكربوهيدرات بيزود مستويات السكر في الدم وده بيزود حدة الشعور بالضيق والإرهاق
- القهوة والشاي وأغلب المشروبات اللي بتحتوي على كافيين بتأثر على أنماط النوم ومزاجك وتيزود القلق والتوتر
- البطاطس المحمرة والأطعمة المقلية غنية بالدهون المتحولة وبتأثر على وظائف المخ
- اللحوم الحمراء والمصنعة غنية بالدهون المشبعة اللي بتأثر على مستويات الأنسولين في الدم
- الآيس كريم والدوناتس والحلويات ومشروبات الطاقة والمشروبات الغازية والعصاير بتحتوي على نسبة عالية من السكر والدهون المتحولة اللي بترفع مستويات السكر
- دريسنج السلطة والصلصات زي الكاتشب و الرانش والسيزر فيهم كميات صوديوم عالية بيأثر على الجهاز العصبي وبيحبس السوايل في الجسم وبيزود الإحساس بعدم الراحة
