المحتويات
بلح الشام من الحلويات الشرقية اللذيذة اللي بيفضلها ناس كتير، تقدر تقدمه مع الشاي للضيوف، خطواته سهلة وبسيطة، لكن محتاجة دقة زي التحمير في زيت سخن وغمسه بالشربات البارد عشان يكون مقرمش، كمان تقدر تستبدل الشربات بصوص الشوكولاتة.
طريقة عمل بلح الشام
المكونات
- كوباية دقيق
- كوباية مياه
- 100 جرام زبدة بدرجة حرارة المطبخ
- 4 بيضات
- معلقة صغيرة فانيليا
- زيت للقلي
للشربات
- كوبايتين سكر
- نص كوباية مياه
- عصرة ليمونة
الطريقة
- اغلي المياه وضيف عليها الدقيق والزبدة وقلب باستمرار لحد ما تتحول المكونات لعجينة
- سيب العجينة لحد ما تبرد تماما
- ضيف البيض والفانيليا وقلب كويس لحد ما العجينة تتجانس
- حط العجينة في كيس الحلواني، وسخن الزيت كويس جدا وشكل العجينة من كيس الحلواني لأصابع حوالي 5 سم
- لتحضير الشربات.. اغلي السكر مع المياه والليمون لمدة 5 دقايق لحد ما يبقى سايل سميك شوية
- بعد ما يبقى بلح الشام لونه دهبي.. اغمسه في الشربات البارد
طريقة عمل بلح الشام بالنشا
المكونات
- كوباية دقيق
- معلقة كبيرة نشا
- تلت أربع كوباية مياه
- ربع كوباية زبدة
- 3 بيضات
- ربع معلقة صغيرة ملح
- نص معلقة صغيرة فانيليا
- كوبايتين شربات
- زيت للقلي
الطريقة
- اغلي المياه والزبدة وضيف الدقيق والنشا والملح
- قلب كويس لحد ماتتجانس المكونات في شكل عجينة
- سيب العجينة تبرد.. وضيف البيض والفانيليا وقلب لحد ما يتجانس مع العجينة
- حط العجينة في كيس حلواني.. وشكلها لأصابع وحمرها في زيت سخن
- خرج بلح الشام من الزيت وحطه في الشربات
بلح الشام بدون بيض
المكونات
- كوباية وتلت دقيق
- كوباية وربع مياه
- نص معلقة صغيرة فانيليا
- معلقة كبيرة زبدة
- معلقة كبيرة زيت
- رشة ملح
- معلقة كبيرة نشا مدوبة في تلت كوباية مياه
- شربات
الطريقة
- على نار متوسطة.. اغلي المياه مع الزبدة والزيت
- ضيف الدقيق والفانيليا، والملح وقلب كويس لحد ما المكونات تتجانس
- ارفع المكونات من على النار.. وضيف النشا واخلطها كويس لحد ما يبقى خليط متماسك
- حط العجينة في كيس الحلواني وشكلها لأصابع
- سخن الزيت واقليها لحد ما يبقى لونها دهبي واغمسها في الشربات البارد
