بطارية اللاب توب الأصلية جودتها في أغلب الأحيان بتبقى أعلى من أي بطارية تانية ممكن تشتريها، ومع الوقت والاستخدام بيقل عمرها الافتراضي، بسبب بعض السلوكيات اللي ممكن تبقى مش واخد بالك منها لكن دورها أساسي في ضعفها، وبالتالي لازم تعرف الخطوات اللي تساعدك تحافظ على البطارية لأطول فترة ممكنة:
- افصلها عن الجهاز وشغله بالشاحن لو في إمكانية عشان تقلل عدد مرات شحنها
- بيزيد عمرها الافتراضي كل ما بتقل دورات الشحن بالذات مع استخدامك له في الألعاب ومشاهدة الأفلام باستمرار اللي بتضعفها
- ابعد اللاب توب عن الشمس المباشرة ودرجة الحرارة العالية قدر الإمكان
- بلاش تفرغها بالكامل وأول ما تلاحظ إن الجهاز قرب يفصل وصل الشاحن فورًا
- ماتشحنهاش لحد 100% والأحسن تفصل الشاحن لما توصل لـ85%
- اقفل أي تطبيق أو صفحة مش بتستخدمها
- قلل درجة سطوع الشاشة لأنها بتستهلك كتير منها
- قلل الصوت قدر المستطاع أو خليه صامت لو مش بتسمع حاجة
- فعل وضع توفير الطاقة سواء كان من خلال Power and Sleep في windows 8/8.1/10 أو Energy Saver في أجهزة الماك
- اقفل الواي فاي والبلوتوث لو مش هتستخدمهم
- قلل مدة تشغيل أي CD في جهازك والأحسن تنقل اللي عليه للجهاز لأن دوران الـCD جوه الجهاز بيستهلك طاقة كبيرة
- لما تخلص اقفل جهازك من خلال Shut down بدل ما تسيبه شغال على وضع الاستعداد Stand by
- تنضيف بطارية اللاب توب بقطعة قماشة مبللة مرشوش عليها كمية بسيطة كحول هيزود كفائتها
- نضف الجهاز باستمرار وبالذات فتحات التهوية
- حط الجهاز على سطح مكتب وبلاش تحطه على المخدات لأنها بتمنع دخول الهواء لفتحات التهوية وبالتالي بيسخن وبتتأثر البطارية
